Rom Teeb 9 - Yennu Gbounpaauŋ Mɔɔr

Israel teeb labaar

¹ N tee Masia nirɔe ki ki fa faaki. Yennu Seyeeŋ nee yen n dudukit ki teen siara a n ki fa faak, linba ki n yaa n pak na tee mɔniie;

² a n mɔk parbiir bonchiann nba kaa gbennu,

³ n mɔŋ booru paak. Li-i bo-i sa fit ki n set n niib paak ki Masia-n biirin, n bo sa sak nna.

⁴ Ŋamme tee Israel teeb, ki Yennu din gannib ki din te ki bi tee u waas, ki din taan namm nan yentsaakar, ki turib mɔlora, ki bia turib u sennu, ki wannib barmɔnii jiantu, ki senn mɔsona ki turib.

⁵ Bi yejamm din tee nijaanae, ki Masia nba din kpant nisaarik na, u din tee bi booru ni yenɔe. Yennu nba yen bont kur na, u sa la paku ki li kii mɔk gbennu. Mɔmɔmm.

⁶ N ki yeen a Yennu mɔsonn na ji kan tun kaa, kimaan Israel yaaboona kur kaa tee Israel teeb nan barmɔnii.

⁷ Abraham yaaboona kur kaa mun tee u yaaboona nan mɔnii, kimaan Yennu din yet Abraham a “Aisak booru tan sii tee a yaaboonae.”

⁸ Li paak, binba ki Abraham marib nifosaarik maaru na ki tee Yennu waasi. Binba tee Yennu mɔsonn maaru waas na, ŋamme set tee Yennu waas.

⁹ Yennu mɔsonn na din tee a “Yoo nba ki n tan sa jen na, li yooe ki Sara sa mar bonjabik.”

¹⁰ Ŋaan li kur kaa na. Ti yaa Rebeka din mar waas bannlee ki bi taa baa, wunba tee ti yeja Aisak.

^11-12 Yoo nba ki bi daa din ki marib ki bi ki tun linba ŋan amii linba bi na, ki Yennu din yet a bikperik na tan sii tee waarɔ po na jiamɔ. Yennu din yet nna a u loomm na-n saan tɔɔnn. Li paak, u loomm na tee wun gann niibe, li ki tee bi toona paak kaa ki bi tee u niibi; ŋaan li tee wa loon ki gann nee.

¹³ Li tee kaman nan Yennu nba yet u gbouŋ ni biaŋinba nee a “N loon Jakɔb ki gar Esɔ.”

¹⁴ Ki ti ji sa yet a bee? Ti sa yet a Yennu ki tun linba ŋan amii? Aaii, ti kan yet nna kaa.

¹⁵ Yennu din yet Moses a “Binba ki n loon ki n tinib ninbaauk na, ŋamme ki n sa tinib ninbaauk.”

¹⁶ Li ki tee nisaarik loomm amii binbeŋ kaa, ŋaan li tee Yennu ninbatinue.

¹⁷ Li sɔb Yennu gbouŋ ni ki tur Faro a “Min Yennu dinna naan linba na paake a n jiia ki wanna n paŋ, ki te ki n sann-n mɔɔnt lin tingbouŋ na kur.”

¹⁸ Li paak, binba ki Yennu loon ki wun tinib ninbaauk na, ŋamme ki u tiinib ninbaauk, ki bia teen siab nikangbata kaman nan wa loon biaŋinba.

Yennu wutoor nan ninbatinu labaar

¹⁹ Tɔn, li pasiar ki i yenɔ-n boin a ki li-i tee nnaie, nlee ki Yennu laat nisaarik biiti? Ŋmee sa fit ki yêt linba ki Yennu senni?

²⁰ Ŋaan n yɔɔk, a tee ŋmee ki sa pak jiin Yennu? Bobir kan fit boi bobmaarɔ a “Bee ki a maan ki n tee nna?”

²¹ Bobmaarɔ mɔk yaak ki sa jii yɔuk bur ki maa bobŋann nan bob-biiuk.

²² Nnee ki Yennu tun ki loon wun wann u wutoor ki niib kura-n bann u paŋ. Li paak ki u mɔk mintir nan binba ki u wutoor sa baar bi paak ki li bo jaŋ nan wun biirib na;

²³ ki bia poŋ dɔŋ gann niib nba ki u tinib ninbaauk na a wun donnib ki wann wa mɔk burchint bonchiann biaŋinba.

²⁴ Li tee timm nba ki u gann nee; ki li ki tee Juu teeb kuukɔɔ kaa, ŋaan li tee binba ki tee Juu teeb na mun biake.

²⁵ Li tee kaman nan Hosea nba din sɔb Yennu gbouŋ ni biaŋinba, a Yennu yet ki yaa a “Niib nba din ki tee n niib na, ŋamme ki n sa jiib ki bii tee n niib; a ki booru nba ki n din ki loon na, ŋamme ki n sa yiimm booru nba ki n loomm.

²⁶ a ki siaminba ki bi din yetib a bi ki tee n niib na, a leŋe biak ki bi sa yiimm ‘Manfodaanɔ Yennu na waas.’ ”

²⁷ Yennu sɔkinii Aisaya din fiit yeenin ni ki wann Israel teeb po ki yet a “Israel teeb-i lekii yab kaman nan mɔkgbeŋŋir tanbiinii na, ŋaan bi waaminnae sa la tinnu;

²⁸ kimaan ti Yomdaanɔ sa dat tingbouŋ na teeb tuba yian yian ki gbenn kaman nan wa yet biaŋinba na.”

²⁹ Li tee kaman nan Aisaya nba din yet nee a “Ti yabint Yomdaanɔ-i bo-i kii tennit waas, li bo tan sa tun ki turit kaman nan la din tun ki tur Sodom nan Gomora doi ni niib biaŋinba nae.”

Israel teeb nan barŋanii labaar

³⁰ Tɔn, ti sa yet nlee? Binba ki tee Juu teeb na din ki kor a bin teen niŋamm Yennu boori, ŋaan ki Yennu yet a bi tee niŋamm u tɔɔnn, bi yada na paak.

³¹ Ŋaan Israel teeb nba din kor a bin la sennu nba sa te ki Yennu yet a bi tee niŋamm u tɔɔnn na, ki bi ji kɔŋ.

³² Bee ki bi din kɔŋi? Bi din ki kor a wun yet a bi tee niŋamm u tɔɔnn bi yada paaki; bi din kor a Yennu-n yet a bi tee niŋamm u tɔɔnn bi toona paake; bi gbiat tanne ki baa,

³³ tann nba ki bi sɔb li po Yennu gbouŋ ni a “Gotir, min Yennu bir tann Sion doo ni, linba sa te ki niib-n gbiat ki baa; a li tee tangbeŋŋire, ki bi sa birint li paak ki baa. Ŋaan wunba teenɔ yada, u kan di fei.”