Rom Teeb 8 - Yennu Gbounpaauŋ Mɔɔr

Yennu Seyeeŋ wannu labaar

¹ Tɔn, mɔtana Yennu kan bu ki biir binba be Yisa Masia ni,

² kimaan ma tee Yisa Masia yɔɔ na paake, ki Seyeeŋ nba teent manfoor na fatin biit nba baat nan kuun na nuu ni ki lun.

³ Yennue tun u mɔŋ Bija tingbouŋ na ni, a wun gaar gbanant nba naan nan timm biitdamm gbanant na, ki tan gaar ti paak ki kpo ti biit paak. Ki u kuun maŋ paak, Yennu biir biit nba be timm nisaarii para ni na paŋ. Sennu na ki fit tun nna, kimaan timm nisaarii ki fit diar fanu.

⁴ Yennue tun nna, a timm nba ki ti binbeŋ waa Yennu Seyeeŋ na ki li ki tee ti nisaarii loomm na, sa sak ki wei barmɔnii sɔnu, sennu nba wann biaŋinba.

⁵ Binba binbeŋ waa nisaarik loomm na jiit bi dudukit ki tee nisaarik loomm nie, ŋaan binba binbeŋ waa Yennu Seyeeŋ na mun jiit bi dudukite ki tee Seyeeŋ na loomm ni.

⁶ Fi-i jii a yan ki gaan nan nisaarik loomm, li tee kuume, ŋaan fi-i jii a yan ki gaan nan Yennu Seyeeŋ loomm na, li tee manfoore nan parmaasir.

⁷ Fi-i jii a yan ki gaan nisaarik loomm ni, a tee Yennu dataake, ki ki saak Yennu sennu, ki set kan fit ki sakiri.

⁸ Wunba waa nisaarik loomm kan fit penn Yennu pari.

⁹ Yennu Seyeeŋ-i set be i ni, i benu ki waa nisaarik loommu, ŋaan li waa Yennu Seyeeŋ na loomme. Wunba ki mɔk Masia Seyeeŋ maŋ u ni, li daanɔ ki tee Masia yɔɔ.

¹⁰ I gbanant nba lek kpo biit paak na, ŋaan Masia-i be i ni, i sei mɔk manfoor, kimaan Yennu yet a i tee niŋamm u boor.

¹¹ Ki ŋɔɔ Yennu nba fiin Yisa kuun ni na, u Seyeeŋ na-i be i ni, ŋɔɔ nba fiin Masia kuun ni na, ŋɔɔe bia sa tur i gbanant manfopaann u Seyeeŋ nba be i ni na paak.

¹² Li paak, n naa waas, i mi man tin wei gbanant loomm.

¹³ Li-i tee ki i waa gbanant loomm, i sa kpowa, ŋaan li-i tee ki i kpi gbanant loomm Yennu Seyeeŋ paŋ na paak, i sa la manfoor.

¹⁴ Binba ki Yennu Seyeeŋ ŋmakitirib sɔnu na, ŋamme tee Yennu waas.

¹⁵ U Seyeeŋ nba ki u turi na, u ki te ki i tee daaba nan jaŋmaandamm kaa, ŋaan u te ki i tee Yennu waase ki yi Yennu a “Ti Baa.”

¹⁶ Yennu Seyeeŋ maŋe te ki ti mɔŋ sei mi bonŋann nan ti tee Yennu waas.

¹⁷ Ta set tee u waas na paak, ti sa la u bonŋann nba ki u bir ki guun u niib nawa; ti bia sa lakin nan Masia ki gaarira. Kimaan ti-i di fara Masia paak, u tan sa donnit u peŋa.

Parpeenn nba ki ti sa la na labaar

¹⁸ N mi nan fara nba ki ti di mɔtana na, li kan fit yekin nan parpeenn nba ki ti tan sa la Yendɔuŋ ni na.

¹⁹ Dunia bona kur nba ki Yennu nann na guu nan ninmɔnne nan yoo nba ki Yennu tan sa nyinn u waas yeenin ni,

²⁰ kimaan dunia bona kur din biira ki ji ki mɔk nyɔɔti, li din ki tee li loomm kaa, li din tee Yennu loomme ki li teen nna; ŋaan ki u bia lek ŋaan ki li mɔk dindann.

²¹ Dasiar be ki dunia bona maŋ tan sa nyi kuun daabsin ni, ki kuun ji kan diar, ki li mun tan sii mɔk parpeenn nba ki Yennu waas tan sa gaar na.

²² Ti mi nan li yiar dunia bona maŋ ki tan tuu mɔtana kaman nan poo nba tuu mɔ matyiaru ki kurii biaŋinba na.

²³ Li ki tee dunia bona na kuukɔɔ kaa ki li yiari, ŋaan timm nba mɔk Yennu Seyeeŋ nba tee sinsinn piinii na mun kuriie ti para ni, ki guu yoo nba ki Yennu tan sa nyinn ki wann yeenin ni a ti tee u waase, ki te ki ti gbanant-n nyi daabsin ni.

²⁴ Ta la tinnu nee ki ti mɔk dindann na. Tɔn, nirɔ-i la linba ki u bo mɔk dindann li paak na, ŋann ŋanin, li ji ki tee dindann. Ki ŋmee jin sii mɔk dindann nan linba ki u poŋ lar paaki?

²⁵ Ŋaan ti-i mɔk dindann nan linba ki ti ki laat paak, ŋann ŋanin, ti ji tuu guu nan sukurue.

²⁶ Nnee mun ki Yennu Seyeeŋ na baar a wun sommit ti bakint ni, kimaan ti ki mi biaŋinba ki ti sii mei Yennu. Ŋɔɔ Yennu Seyeeŋ mɔŋe mei Yennu ki teent ki te ki ti kurii ki mei ti para ni ki ti mɔbona kan fit pak li paaki.

²⁷ Ki Yennu nba laat nisaarik par ni mi Seyeeŋ na dudukit nba tee, kimaan Seyeeŋ na mei Yennu u niib paak, ki li waa nan ŋɔɔ Yennu nba loon biaŋinba na.

²⁸ Binba ki Yennu yiimm na, ki u mɔk linba paak ki u yimme, ki bi mɔk loomm nanɔ, ki ti mi nan linba kur tuun, u te ki li teen bonŋann ki teen ŋamme.

²⁹ U poŋ din senn nan binba ki u yiimm na a bi binbeŋ-ii tee kaman nan u Bija binbeŋ nee, ki Bija na-n teen Bikperik, waas bonchiann sinsuuk ni.

³⁰ Ki Yennu yiin binba ki u senn na, ki binba ki u yiimm na ki u yet a bi tee niŋamm u boor, ki binba ki u yet a bi tee niŋamm u boor na, ki u donnib.

Yennu loomm labaar

³¹ Ti-i kpaa ti ninbina ki got linba na kur paak, ti sa yet a nlee? Li-i tee ki Yennu be ti po, ŋmee ji be ki sa biiriti?

³² Yennu ki minnit u mɔŋ Bija na, ŋaan jiiu ki turit; ŋɔɔ Yennu turit u Bija maŋ, ki nlee ki u ji kan turit linba kur biari?

³³ Ŋmee sa fikis Yennu nigannkabi? Yennue nyinnib ki bi ki tee biitdamm u boori.

³⁴ Ŋmee be ki sa bu bi buut ki biiribi? Sɔɔ kaa. Yisa Masia wunba din kpo ki fiir kuun ni na amii? Yisa Masia wunba be Yennu niidiitu po ki tee ti sindantinnɔ na amii?

³⁵ Ŋmee sa fit nyinnit Yisa Masia loomm ni? Ti fara amii maan amii sukit amii kon amii namu amii parbiir amii kuume? Aaii.

³⁶ Li teen ki turit kaman nan la sɔb biaŋinba Yennu gbouŋ ni na a “A paake ki ti be kuun fara ni sanyiɔk niwa ki tan tuu dajouk, ki ti tee kaman nan peeuk nba ki bi tuu tee siir a bin kpiu nee.”

³⁷ Ŋaan nan linba na kur li tee yanne, kimaan ti la nyannu kura Yisa Masia wunba loont na paak.

³⁸ N mi fanu nan siar kaa ki sa fit bɔkit timm nan Masia loomm ni; kuun amii manfoor amii malakanba amii kpanbara amii yentdamm amii linba tee mɔtana amii linba tan sa teen amii

³⁹ linba be sanpaapo amii tinpɔɔr ni amii; siar kaa naauŋ kur ni ki sa fit bɔkit timm nan Yennu loomm ni, loomm nba nyii ti Yomdaanɔ Yisa Masia ni na.