Rom Teeb 7 - Yennu Gbounpaauŋ Mɔɔr

Jakunt nan pookɔɔnt labaar

¹ N naa waas, i kur mi sennu na po, li paak, i sa fit soor ma yaa n yet linba na paaka. Sennu na so wunba be u manfoor nie.

² Li paak, sennu na nɔɔk ni, li kpaa talas nan poo-n taan nan u sɔrɔ yoo nba ki u sɔrɔ daa be u manfoor ni, ŋaan u sɔrɔ na-i taŋŋi kpo yoonba, sennu na ji ki so poo na.

³ Ŋannimi, yoo nba ki u sɔrɔ daa be u manfoor ni na, ŋaan ki u nyii jab, bi sii yiu poochonchonne; ŋaan li-i tee ki u sɔrɔ kpoie, sennu na ji kan soorɔ, li-i tee ki u ji kun jaganɔ u sɔrɔ na kuun poorpo, u ji kii tee poochonchonni.

⁴ N naa waas, li mun tee nnee ki turi; i tee Masia gbanant bɔkire, ki din kpoe ki sennu na ji ki soini; ŋaan mɔtana i gaa nan Masia wunba din fiir kuun ni nee, a tii tuun linba ŋan ki tur Yennu.

⁵ Yoo nba ki ti din tuun ti gbanant loomm nee, ki sennu na te ki ti mɔk nianbiiuk ki li tuun ti gbanant ni, ki li baat nan linba tee kuun ti paak.

⁶ Mɔtana ŋanin, sennu na ki diati, kimaan ti din kpoe ki sennu na ji ki mɔk ti yaaki. Li paak, ti ji fit tuun ki teen Yennu nan manfopaann nba ki u Seyeeŋ turit; ti ji ki tuun nan sennkper nba ki bi din sɔb gbouŋ ni na kaa.

Sennu nan biit labaar

⁷ Li paak, ti sa yet a nlee? Ti sa yet a sennu na ki ŋan amii? Ti kan yet nna kaa. Sennu na-i bo-i kaa, n bo kan bann biit nba tee linba. Sennu na-i bo-i kii wann a n daa mɔk niauŋ n lɔɔ bont paaki, n bo kan bann niauŋ nba tee linba,

⁸ ŋaan ki biit la yaak sennu na ni, ki te ki nianbooru booru bonchiann fiir n par ni. Sennu na-i bo-i kaa, biit bo sii tee bonkpeenne.

⁹ Yoo nba ki n din ki mi sennu maŋ na, n din mɔk manfoore; ŋaan ma tan bann sennu maŋ, ki biit nba be n par ni na fiir, ki n kpo.

¹⁰ Sennu nba bo yaa li baat nan manfoor na, ki li baar nan kuun ki turin.

¹¹ Biit la u sɔnu sennu na nie ki kpannin, ki leŋe ki li kpiin.

¹² Sennu na tiauŋ ŋanin yeene, ki bia tee barmɔnii nan linba fan.

¹³ Tɔn, li want nan linba ŋane baar nan kuun n paak amii? Aaii, li ki want nna kaa. Biit nee jii linba ŋan na ki baar nan kuun turin, a lin wann biit nba tee linba. Ŋanne ki ti ji bann nan biit tee bonbilankante.

Bona ŋannlee nba ki nisaarik loon

¹⁴ Ti mi nan sennu na tee Yennu Seyeeŋ yare, ŋaan min ŋanin tee nisaarike, ki tee biit daabir,

¹⁵ kimaan linba ki n tuun na, n ki mi li paaki, kimaan n ki tuun toonŋana nba ki n looni; ŋaan toonbiit nba ki n nammir na, ŋanne ki n tuun.

¹⁶ Mi-i tun toonbiit nba ki n bo ki loon ki n tun na, li want nan n sak nan sennu maŋ ŋane.

¹⁷ Li paak, li ki tee n mɔŋ kaa tuumiri, ŋaan biit nba be n ni nee te ki n tuun.

¹⁸ N mi nan bonŋansiar kaa n par ni; n loon ki n tun linba ŋan, ŋaan n kan fit ki tuumiri;

¹⁹ kimaan ma loon ki n tun toonŋana nba na, n ki tuumiri, ŋaan toonbiit nba ki n ki loon ki n tun na, ŋanne ki n tuun.

²⁰ Li paak, mi-i tuun linba ki n bo ki loon mii tuumi, li ji ki tee min kaa tuumi, ŋaan li tee biit nba be n ni nee tuun.

²¹ N la ki bonsiar be n ni yoo kura, mi-i yaa n tun linba ŋan, ŋaan biit bia lek tuu be nanin.

²² Yennu sennu nee te ki n par peen,

²³ ŋaan ki n laat sennsiar nba tuun n gbanant ni, ki li ki sak nan sennu nba ki n par loon na, ki lorin nan dansarkɔɔrɔ na, a n sak biit nba be n ni na.

²⁴ Aba, n tee parbiir daanɔe. Ŋmee sa fatin ki nyinnin gbanant nba saa nanin kuun ni na?

²⁵ N piak Yennu wunba fatin ki lun Yisa Masia ni na paak. Li paak, n mɔŋ waa Yennu sennu na n par ni, ŋaan ki n gbanant waa biit sɔnu na.