Rom Teeb 6 - Yennu Gbounpaauŋ Mɔɔr

Toonbiit nan yentinu labaar

¹ Li paak, ti sa yet nlee? Ti bia sii be ti toonbiit tumu nie ki Yennu ninbatinu na-n pukin amii-ii?

² Aaii, ŋann kaa. Li tee kaman nan ti kpo nee, ki li paak biit ki mɔk ti yaaki. Ŋannimi ti kan biar toonbiit tumu ni.

³ Timm nba ki bi wurit Yennu nyunwuru nan Yisa Masia sann ni na, li tee kaman nan ti lakin kpo nanɔ nee.

⁴ Li paak, ti din kpoe nan Yisa Masia ki bi lakin piit nanɔ Yennu nyunwuru ni; ki u Baa Yennu din jii u paŋ ki fiinɔ kuun ni, nnee ki ti mun fiir a tii be manfopaann ni.

⁵ Li-i tee ki timm nan Masia lakin kpo, nnee biak ki ti bia sa lakin ki fiir kuun ni nan wa din fiir biaŋinba na.

⁶ Ti mi nan ti binbenkper na lakin ki kpo nan Yisa u dapunpunn paak, a ti binbenkper na ji daa mɔk yaak, ki ti ji kii tee daaba biit paŋ ni.

⁷ Nirɔ-i kpo, u nyii biit paŋ niwa.

⁸ Ta kpo nan Masia na, ti mɔk yada nan ti sii be nanɔ.

⁹ Ti mi nan Yennu fiin Masia kuun niwa ki u ji kan mi kpo; kuun ki mɔk u yaaki.

¹⁰ U din kpo ti biit paake taar yomm, ŋaan wa ji be u manfoor ni na, u be ki teen Yennue.

¹¹ Li paak, i mun dukin nan li tee kaman nan i kpoe ki biit ji ki mɔk i yaaki, ŋaan Yisa Masia paak i ji be i manfoor ni Yennu boor.

¹² Li paak, i daa te ki biit-n yent i gbanant ki te ki i tuun biit loommu.

¹³ Daa teen i gbanant siar po yaak ki li tuun toonbiit, ŋaan jii i mɔŋ ki tur Yennu, ŋaan kii tee kaman nan i nyii kuun nie ki kɔɔ manfoor ni na; jiin i mɔŋ kur ki tur Yennu ki wun jii-i ki tun yentinu toona.

¹⁴ Biit daa mɔk i yaak, kimaan sennu na ki yeniini, ŋaan Yennu ninbatinu nee yeni.

Yentinu daaba labaar

¹⁵ Tɔn, sennu na nba ki yenti, ŋaan ki Yennu ninbatinu nee yent na, ti sa biar toonbiit tumu ni amii? Aaii, ti kan teen nna kaa.

¹⁶ Fi-i jii a mɔŋ ki pet ki tur nirɔ ki tee u daabir ki saak u mɔb, li tee mɔniie nan a set tee u daabire. Fi-i sak ki tuun toonbiit, a tee biit daabire, ki li joontu tee kuume; ŋaan fi-i sak Yennu mɔb, a tee mɔsakdaanɔe, ki ŋanne sa te ki a teen niŋanɔ Yennu boor.

¹⁷ Sianyoo, biit din mɔk i yaak, ŋaan mɔtana i mantik saak barmɔnii wannu nba ki bi din wanti na; li paak, ki n teen Yennu niipoouk.

¹⁸ Mɔtana i ji ki tee biit daaba, ŋaan yentinue ji mɔk i yaak.

¹⁹ (Yimm nisaarii nba ki fit bant Yennu maan yian na paake ki n yaa n pak nisaarik yan ki wanni u labaar.) Ya din jii i mɔŋ ki tuun toonbiit ki li nɔb na, mɔtana jiin man i mɔŋ kii tuun yentinu toona kii tee popeendamm.

²⁰ Ya din tuu tee biit daaba na, i din tuu ki tee yentinu yabi.

²¹ Toona nba ki i din tuun ki li mɔki fei mɔtana na, li mɔk nyɔlante ki turiini? Li toonbooru baat nan kuume.

²² Ŋaan mɔtana i ji nyii biit daabsin niwa ki ji tee Yennu daabae; li paak, ki i teen popeendamm, ki mɔk manfoor nba kaa gbennu; ŋanne tee i nyɔɔt.

²³ Kimaan biit nyɔɔt tee kuume, ŋaan Yennu piinii tee manfoor nba kaa gbennue, ti Yomdaanɔ Yisa Masia paak.