Rom Teeb 5 - Yennu Gbounpaauŋ Mɔɔr

Binba ki Yennu yet a bi tee niŋamm

¹ Tɔn, ta teen Yisa yada na paake, ki Yennu yet a ti tee niŋamm u tɔɔnn, ki parmaasir ji be timm nan Yennu sinsuuk ni ti Yomdaanɔ Yisa Masia paak.

² U paake ki Yennu tint ninbaauk ti yada maŋ paak; ki ti la u ninbatinu maŋ ki mɔk parpeenn, kimaan ti mɔk dindann nan ti tan sii mɔk binbenŋaŋ nba ki Yennu sa turit na.

³ Ti bia mɔk parpeenn ti fardinu ni, kimaan ti mi nan fardinu baat nan sukurue,

⁴ ki sukuru mun baat nan binbenŋaŋ, ki binbenŋaŋ maŋ mun baat nan dindann,

⁵ ki dindann maŋ ni ti tan kan di fei, kimaan Yennu jii loomm nba ki u mɔk na ki teen ti para ni, u Seyeeŋ nba ki u turit na paak.

⁶ Kimaan yoo nba ki ti daa din ki mɔk sommir na, Masia din gaar timm biitdamm paak ki kpo, ki li tee yoo nba ki Yennu din ganne.

⁷ Li paar nan nirɔ-n gaar nipeemɔ paak ki kpo, ŋaan li pasiar a sa la sɔɔ wun gaar niŋanɔ paak ki kpo;

⁸ ŋaan Yennu wann nan u set loonit bonchiann kimaan ta din tee biitdamm na Yisa Masia din gaar ti paak ki kpo.

⁹ U sɔn paak, ki Yennu yet a ti tee niŋamme; li paak mun u kpan sa nyinnit tubdatu nba baat ti paak na ni.

¹⁰ Ti din tuu tee Yennu dataie, ŋaan mɔtana jik u teent u yɔɔsinbae kimaan u Bija nba din kpo na sɔn paak, ki ta tee u yɔɔs na, birsuk ji kaa nan u sa tinnit u manfoor paaki.

¹¹ Ŋaan li kur kaa na; ti bia mɔk parpeenn Yennu nba sommit bonchiann biaŋinba ti Yomdaanɔ Yisa Masia paak, kimaan u paake ki Yennu teent u yɔɔsinba mɔtana.

Adam nan Masia labaar

¹² Tɔn, niyenɔkɔɔe din te ki biit baar tingbouŋ na ni, ki u biit na paake te ki kuun be. Li paake te ki kuun kpi niib kur, kimaan nisaarik kur tun toonbiita.

¹³ Biit din be tingbouŋ na niewa ki Yennu din tan tur Moses sennu na, ŋaan sennu-i kaa, sɔɔ kan fikis nirɔ ki yet a u biir sennu maŋi.

¹⁴ Adam yoo neewa ki tan tuu Moses yoo, ki kuun lek mɔk yikoo sɔɔ kur paak, ki li kpi binba mɔk biit nba ki tee kaman nan Adam biit nba din tee biaŋinba na. Tɔn, Adam din tee wunba din yaa wun wei poor na ninnauŋo.

¹⁵ Ŋaan bi bannlee na ki jan, kimaan Yennu piinii nba ki u pit yann na ki tee kaman nan Adam toonbiit na kaa. Li tee mɔniie nan niib bonchiann kpo niyenɔkɔɔ toonbiit paake; Yennu ninkpabauŋ yab, ki u piinii nba ki u teen niib bonchiann ki li nyii yenɔkɔɔ Yisa Masia ninkpabauŋ na mun bia yab.

¹⁶ Bɔkitu be Yennu piinii nan niyenɔkɔɔ Adam toonbiiuk sinsuuk ni; kimaan niyenɔkɔɔ Adam toonbiiuk maŋ poorpoe ki Yennu din bu u buut ki yet a u toonbiiuk maŋ ŋan nan tubdatu; ŋaan ŋɔɔ Yisa Masia piinii nba ki u pit yann na tee nyikinchab, toonbichiauŋ poorpoe.

¹⁷ Niyenɔkɔɔ maŋ toonbiiuk paake ki kuun kpi sɔɔ kur, ki li nyii niyenɔ maŋ boore; ŋaan linba wei niyenɔkɔɔ Yisa Masia toonn na gar nnawa; niib kur nba la Yennu ninbatinu nba yab, nan u piinii nba tee nyikinchab piinii na, bi sa di naan kii mɔk manfoa Yisa Masia paak.

¹⁸ Niyenɔkɔɔ maŋ toonbiiuk paake te ki sɔɔ kur ŋan nan tubdatu, nnee mun, niyenɔkɔɔ toonŋann paake te ki sɔɔ kur laat tinnu nan manfoor.

¹⁹ Niyenɔkɔɔ nba ki bi yiu Adam na mɔyêtuk paake te ki niib kur teen biitdamm; li mun tee nnee nan niyenɔkɔɔ nba ki bi yiu Masia na mɔsaku paake te ki niib bonchiann teen niŋamm Yennu boor.

²⁰ Sennu na baar a lin ŋamm fiit wann toonbiit nba yab biaŋinbae; ki toonbiit nba yab na, Yennu ninbatinu mun yab ki gar nna.

²¹ Li paak, biit nba din kpi nifosaarii ki te ki bi kpenn biaŋinba na, nnee mun ki Yennu ninbatinu paak te ki u yet a bi tee niŋamm u boor, ki turib manfoa nba kaa gbennu, ti Yomdaanɔ Yisa Masia paak.