Rom Teeb 3 - Yennu Gbounpaauŋ Mɔɔr

¹ Tɔn, nyɔlante ki Juu teeb la ki gar binba ki tee Juu teebi? Bi punpotu mɔk nyɔɔtii?

² Li mɔk nyɔɔt bonchiann. Sinsinn tee Yennu din jii u sennu mɔbona na ki guun Juu teebe;

³ ki bi siab-i diŋŋi kii tee yadateenteeb, li want nan Yennu ki tee barmɔnii daanɔ amii?

⁴ Aaii, li ki want nna kaa. Niib kur-i bo-i tee fai damm, ŋaan Yennu ŋanin tee barmɔnpakirɔɔe. Li waa nan la sɔb Yennu gbouŋ ni biaŋinba nee a “Niib-i bu fin Yennu buut, bi sa la ki a mɔk mɔnii, ki bia di mɔniie.”

⁵ Ŋaan ti toonbiit-i fiit wann nan Yennu mɔk mɔnii, bee ki ti sa yeti? Wa dat ti tuba na paak, ki ti ji yet a u mɔk biitii? (Nisaarik dudukite ki n yet nna.) Aaii, n kan yet nna kaa.

⁶ Yennu-i kii be fanu, u bo kan fit kii bu tingbouŋ na niib buuti.

⁷ Tɔn, sɔɔ-i boi a “N faak na-i want nan Yennu set tee barmɔnii daanɔ, ki bia tee ki niib-n turɔ baakir, bee teen ki u sa dat n tubir a n tee biitdaanɔ?”

⁸ Siab bia dukii a “Ŋaant ki tin tun toonbiit a bonŋann-n tan baar.” Nisiab sukiin ki yeen a mine yet nna. Yennu sa dat bi tuba kaman nan la jaŋ namm biaŋinba.

Nirɔ kaa ki tee niŋanɔ

⁹ Ki li tee nlee? Timm nba tee Juu teeb na, ti binbeŋ chee binba ki tee Juu teeb binbeŋ amii? Aaii, ti ki chee bi. N poŋ dɔŋ yet a biit yikoo be Juu teeb nan binba ki tee Juu teeb ni

¹⁰ kaman nan la sɔb Yennu gbouŋ ni a “Sɔɔ kaa ki tee niŋanɔ, aaii, nan yenɔkɔɔwa gbaa.

¹¹ Sɔɔ kaa ki mɔk minu, sɔɔ kaa ki loon Yennu.

¹² Sɔɔ kur kpet sɔnuwa, sɔɔ kur tuun biite; sɔɔ kaa ki tuun toonŋana, sɔɔ kaa nan yenɔkɔɔwa gbaa;

¹³ a bi mɔi yaa nan kaayaant nee, ki fai nyi bi jerima ni, ki linba nyi bi mɔi ni tee kaman nan waauk lɔbii nee;

¹⁴ mɔpora nan mɔtont kuukɔɔe nyi bi mɔi ni.

¹⁵ Bi sa kpi nirɔ yiama;

¹⁶ a ki siaminba kur ki bi gar, parbiir tuu tan baar leŋe.

¹⁷ Bi ki mi sɔnu nba ki bi sa tɔkin ki lin baar nan parmaasiri.

¹⁸ Bi binbeŋ ni, bi ki tiin Yennu.”

¹⁹ Tɔn, ti mi nan Yennu sennu-i yet linba, li yeen ki teen binba be li yikoo ni, li paake ki niib kur sii muu bi mɔi, ki tingbouŋ na teeb kur be Yennu buut ni, ki u tɔɔnn sɔɔ kaa ki mɔk mɔnii.

²⁰ Sɔɔ kaa ki sa fit wei sennu na nba senn biaŋinba ki teen niŋanɔ Yennu tɔɔnn; sennu na paake te ki nifosaarik bann nan u tuun toonbiit.

Biaŋinba ki Yennu te ki nifosaarik tee niŋanɔ u tɔɔnn

²¹ Ŋaan mɔtana, Yennu mɔŋ nba lon sɔnsau nba sa te ki nifosaarik-n teen niŋanɔ na ji be yeenin nie, ki u sɔkiniinba maan nan sennu nee wantit li po, ŋaan li ki nyi sennu na saku ni kaa.

²² Yennu te ki nisaarii kur nba teen Yisa Masia yada nee tee niŋamm u tɔɔnn, li nyii ba teen Yisa Masia yada nie, ki lukitin kaa,

²³ kimaan nifosaarii kur tun toonbiit ki ki be fanu kaman nan Yennu nba loon biaŋinba na.

²⁴ Yennu ninbatinu paake ki u yet a bi tee niŋamm u tɔɔnn; li tee piiniie, kimaan Yisa Masia pa bi paak ki nyinnib daabsin ni.

²⁵ Yennu te ki Yisa Masia nyii yeenin ni, ki bia te ki u sɔn nba nyii u ni na tee marouŋ ti biit paak, ki ti-i teen linba na yada, Yennu sa nyik chab ti biit; ŋanne wann nan Yennu be fanu. Yoo nba gar, Yennu din ki dat nisaarii tuba bi toonbiit paaki, kimaan u sukuru paak;

²⁶ ŋaan mɔtana u nyik chabit ki loon wun wann nan u set be fanu, ki bia yet a wunba teen Yisa yada na mun tee niŋanɔ ŋɔɔ Yennu tɔɔnn.

²⁷ Li paak, siar be ki ti mɔk parbifaant nannii? Aaii, li ki tee a nifosaarik nba waa sennu na paak kaa ki ti sa la tinnu, ŋaan li tee ta teen Yisa Masia yada na paake.

²⁸ Ti dukii ki yeen a nisaarik yada teenu paake ki Yennu yet a u tee niŋanɔ; ki li ki tee a wa waa sennu na paak kaa.

²⁹ Yennu tee Juu teeb kuukɔɔ Yennuee? Aaii, u tee Juu teeb nan binba ki tee Juu teeb Yennue.

³⁰ Yennu tee Yen-yenɔkɔɔe ki sa yet a Juu teeb nan binba ki tee Juu teeb na, ki bi kur-n teen niŋamm u tɔɔnn bi yada teenu paak.

³¹ Tɔn, ta yet a nifosaarik laat tinnu u yada teenu nie na, ŋanne te ki sennu na tee yannii? Aaii, li ki tee nna kaa. Ti lek see sennu na poe.