Rom Teeb 2 - Yennu Gbounpaauŋ Mɔɔr

Yennu buut labaar

¹ Li paak, nifosaarik nba want u lɔɔ biit, u ki mɔk sɔnu, kimaan fa want a lɔɔ biit na, li want nan a mɔŋ mɔŋ mɔk biit, kimaan fa want a lɔɔ biit na, a mɔŋ mɔŋ mun tuun nnee.

² Ti mi nan Yennu tan sa bu binba tuun nna na buuta; ki u buut maŋ tan sii tee barmɔniie.

³ Fa want leeb biit ba tuun biaŋinba, ŋaan mun tuun nna na, a dukii nan Yennu kan dat a tubirii?

⁴ amii a yisin loonchiauŋ nan sukuru bonchiann nba ki Yennu mɔk nant na amii nlee? a ki mi nan Yennu mɔk burchint nana a wun te ki a nyik a biit na ŋaan kii be fanuee?

⁵ Ŋaan a par wakii ki a lek ki sak nan fan nyik toonbiit tumu na, li paak, a pukii a mɔŋ fara nba ki a tan sa la daar nba ki Yennu tan sa bu niib buut nan barmɔnii, ki u wutoor na tan sa nyi paanu;

⁶ kimaan sɔɔ kur sa la u toona nyɔɔt nba tee biaŋinba.

⁷ Nisiab mɔk mintir ki tuun toonŋana ki loon ki Yennu-n pakib ki turib nyɔɔt nan manfoor, ki ŋamme set sa la manfoor nba ki mɔk gbennu.

⁸ Ŋaan binba mɔk kunkɔna, ki ki sak linba tee barmɔnii na, ŋaan tuun toonbiit, Yennu wutoor sa do bi paak.

⁹ U sa jii fara nan muksuk ki tur nisaarii nba kur tuun toonbiit na; Juu teeb nee sa la li tubdatu sinsinn, ki binba ki tee Juu teeb na-n ji joont;

¹⁰ ŋaan Yennu sa jii paku nan nyɔɔt nan parmaasir ki tur binba kur tuun toonŋana na; Juu teebe sa gaar sinsinn, ki binba ki tee Juu teeb na-n joont;

¹¹ kimaan Yennu ki mɔk ningannii.

¹² Binba kur ki mi Yennu sennu ki tuun toonbiit, bi lek sa kpo bi toonbiit tumu na paaka, li ki tee ba ki dia sennu maŋ paak na kaa. Binba kur mɔk Yennu sennu na, ŋaan tuun toonbiit, ki Yennu sa jii sennu maŋe ki bu namm.

¹³ Li ki tee a binba gbia sennu nee tee niŋamm Yennu boori, ŋaan li tee binba tuun biaŋinba ki sennu na wann na, ŋamme tee niŋamm u boor.

¹⁴ Binba ki tee Juu teeb na, bi ki mɔk sennu na, ŋaan bi-i tuun sennu na nba wann biaŋinba nan bi tiauŋ yamie, bi mɔk bi tiauŋ sennu bi para ni, nan ba lek ki mɔk sennu maŋ na.

¹⁵ Ba tuun biaŋinba want nan sennu nba senn biaŋinba na be bi para ni, ki bi yangana mun wantib linba ŋan nan linba ki ŋani, kimaan sianyoo bi dudukit tuu tan sak bi toon-yena nan li ŋan, ŋaan yosau bi dudukit-n bia yêt bi toonlia paak nan li ki ŋani.

¹⁶ Tɔn, li tan sii tee nnee daar maŋ daar nba ki Yennu tan sa bu niib kur para ni buut Yisa Masia paak, kaman nan ma mɔɔntir barŋanii maŋ biaŋinba na.

Juu teeb nan sennu labaar

¹⁷ Gotir, a yi a mɔŋ Juu nirɔe, ki mɔk parbifaanu a sennu na tee a yare, a li paak a a tee Yennu yɔɔe,

¹⁸ ki mi linba ki Yennu loon fii tuun, ki a bia tumii sennu na ni ki mi linba ŋan nan tumu,

¹⁹ ki teen yada nan a fit want jɔɔnii sɔnu, ki bia tee yentu ki tur binba be bunbɔnn ni na;

²⁰ ki fit kpaan jatit na kpaanii, ki bia want binba ki mi, kimaan a mi barmɔnii na nba sɔb biaŋinba sennu gbouŋ na ni.

²¹ A want leeb barmɔnii na, ŋaan bee ki a ki want a mɔŋi? A want leeb a nanyuk ki ŋani, ŋaan fin jaamii?

²² Fin nba want niib a bi daa tuun bonchonchonn toona na, ŋaan fin chommii? Fin nba ki loon pata maan na, ŋaan a jaan jiantu diit ni bona-aa?

²³ Fin nba nyu bara sennu maŋ paak na, a yêen sennu maŋ ki dint Yennu fei,

²⁴ kaman nan la sɔb Yennu gbouŋ ni a “Yimm Juu teeb paake ki binba ki tee Juu teeb na piak ki sukii Yennu.”

²⁵ Fi-i sak Yennu sennu, a punpotu mɔk nyɔɔt, ŋaan fi-i kii sak sennu na, li ŋman a ki poti.

²⁶ Ŋaan binba ki tee Juu teeb ki ki pot, ŋaan sak sennu maŋ mɔbona ki waar, Yennu sa gaarib kaman nan wunba pot nee.

²⁷ Yimm Juu teeb mɔk sennu maŋ ki li sɔb gbouŋ ni; ki i bia porii puna, ŋaan yimme bia biir sennu na; ki binba ki pot bi puna ŋaan waa sennu na, ŋamme sa bu i buut ki biiri.

²⁸ Nirɔ nba tee Juu nirɔ paanu ni kuukɔɔ, u ki tee Juu nirɔ nan mɔnii. Potu nan mɔnii mun ki tee gbanant potu, linba be paanu ni.

²⁹ Juu nirɔ nan barmɔnii tee wunba tee Juu nirɔ u par nie. Potu nan mɔnii mun tee par nie, ki li potu tee Yennu Seyeeŋ tumu; li ki tee gbanant paanu ni kaa. Li daanɔ laat paku Yennu boore, li ki tee nisaarik boori.