Rom Teeb 16 - Yennu Gbounpaauŋ Mɔɔr

Foontii

¹ Tɔn, n loon ki n wanni ti niipoo Fiibe po; u be Kenkrea doo ni ki sommit Yisaweira leŋ; li-i tee ki u baar i boor,

² yin gaarɔ ti Yomdaanɔ Masia sann paak kaman nan Yennu niib nba bo sii gaan bi leeb biaŋinba na, ki sommɔ wa loon linba i boor, kimaan u mun tuu sommit niib bonchiann, nan n mɔŋ gbaa.

³ N foont Akuila nan u ŋaapoo Prisila binba tee n toontunleeb Yisa Masia toona ni na.

⁴ Bi din jii bi manfoa ki tinn n manfoor, li paak ki n teemm niipoouk; li ki tee n kuukɔɔ kaa teemm niipoouku, ŋaan min nan binba ki tee Juu teeb ŋaan tee Yisaweira na, bi mun bia teemm niipoouk bonchiann.

⁵ Ŋaan bia foont Yisaweira nba lakii ki jiantir Yennu bi ŋaak ni na. Ki foont n yɔɔŋaŋ Epanetus wunba din tee sinsinn nirɔ nba be Asia tiŋ ni ki din teen Masiaweirɔ na.

⁶ Ki foont Mari wunba din tuu tuun bonchiann ki teeni na;

⁷ ki foont Andronikus nan Junias binba tee n booru ni niib, ki min nan ŋamm din lakin kɔɔ dansarik; ki Masia toomiinba mib bonŋann na, ki bi din sint teen Masiaweira ki n tan wei na.

⁸ Ki foont n yɔɔŋaŋ Ampliatus wunba ki n loonɔ ti Yomdaanɔ paak na.

⁹ Ki foont Urbanus wunba tee ti toontunlɔɔ Masia toona ni na; ki foont n yɔɔŋaŋ Stakis mun biak.

¹⁰ Ki bia foont Apeles wunba din la bikinu ŋaan lek bia daa waa Masia nan barmɔnii na; ki foont Aristobulus ŋaateeb;

¹¹ ki foont n booru ni nirɔ nba ki bi yiu Herodion na; ki foont Nasisus ŋaateeb nba teen ti Yomdaanɔ yada na.

¹² Ki foont Traifena nan Traifosa binba tuun ti Yomdaanɔ toona na; ki foont n yɔɔŋaŋ Pesis wunba tuun ti Yomdaanɔ toona bonchiann na.

¹³ Ki foont Rufus wunba mantik waa ti Yomdaanɔ sɔnu bonŋann na; ki foont u naa wunba tuu loonin kaman nan wa loon u mɔŋ bik biaŋinba na.

¹⁴ Ki foont Asinkritus nan Flegon nan Hemes nan Patrobas nan Hemas nan Masia niib kur nba be namm na.

¹⁵ Ki foont Filologus nan Julia nan Nereus nan u niipoo, nan Olimpas nan Yennu niib kur nba be namm na.

¹⁶ Yii foont leeb kii kpammii man; Masiaweira nba be siar kur po foonti.

Kpaanii

¹⁷ N naa waas, n kpaaniie, i mi man binba bɔkitir Yisa niib ŋaan dɔkib u sɔnu ni na ŋaan bia ki saak wannu nba ki i gaar na; lɔkitirib man;

¹⁸ li nibooru ki waa ti Yomdaanɔ Masia, ŋaan waa bi mɔŋ niauŋo. Bi jikit mɔmante ki kpann binba yaa dudukit ki chee na.

¹⁹ Tɔn, sɔɔ kur gbat ya gaar Masia barŋanii biaŋinba, linba na paake ki n mɔk parpeenn nani. N loon ki yii mɔk yan ki saan jiin linba ŋan paak, ŋaan daa saak bonbiiri.

²⁰ Li kan yukir ki Yennu nba teent parmaasir na sa te ki yin fiir ŋmaa Sintaanii yur paak. Ti Yomdaanɔ Yisa Masia-n sommi.

Foontii biak

²¹ Tɔn, n toontunlɔɔ Timoti foonti; ki n ninjamm Lusius nan Jason nan Sosipata mun bia foonti.

²² Min Tesius nba sɔbin linba ki Pɔɔl pak gbouŋ na ni na foonti ti Yomdaanɔ sann paak.

²³ Gaius wunba gaar min Pɔɔl nan Masiaweira kur u ŋaak ni na, u mun foonti. Erastus, wunba tee doo na likguutɔɔ na, ŋɔɔ nan ti naa bik Kɔɔtus mun foonti.

²⁴ Ti Yomdaanɔ Yisa Masia-n somm i kura.

Joontu Yenmiaru labaar

²⁵ Li ŋan ki tin baak Yennu, kimaan u fit te ki i set waau fanu kaman nan ma mɔɔnt barŋanii ki jiin Yisa Masia po na, ki fiit woonin ni maan nba din bɔr bina bina na.

²⁶ Ŋɔɔ Yennu sɔkiniinba gaar ki sɔbir gbouŋ ni ki li fiit woonin ni; ki Yennu nba kaa gbennu na tur mɔb a booru kur-n bannir, a niib kur-n la yaak ki teen Masia yada ki sak u mɔb;

²⁷ ŋɔɔ Yennu kuukɔɔe tee yandaanɔ na; niib kur-n pakɔ mɔkmɔk nan yoo nba kaa gbennu, Yisa Masia sann paak. Mɔmɔmm.