Rom Teeb 14 - Yennu Gbounpaauŋ Mɔɔr

Daa biir a lɔɔ

¹ Gaat man yadakanpɔɔna damm na, ŋaan daa nɔi namm mɔniɔk bi yada ni.

² Sɔɔ yadae te ki u di jeet kur, ki wunba yada ki paar na mun kɔɔ nant ŋmamu.

³ Ki wunba di jeet kura na daa gorii wunba kɔɔ jesiat na yanni, ki wunba mun kɔɔ jesiat na daa biir wunba di jeet kur na sanni, kimaan Yennu gaarɔwa.

⁴ Ki a tee ŋmee ki sa biir sɔɔ toontunnɔ? Li tee u mɔŋ Yudaanɔ nee sa yet wa dii nan wa baa, ki u set sa diwa kimaan ti Yomdaanɔ mɔk paŋ nba sa te ki wun di.

⁵ Tɔn, nisiab mun dukii a dayena ŋan ki gar dalia, ki siab mun jii daa kur ki li jame. Sɔɔ kur-n bann u mɔŋ dudukit ni wa teen linba yada.

⁶ Wunba dukii a dayena ŋan ki gar dalia na, u tee nna ki teen ti Yomdaanɔ baakire; ki wunba mun di jeet kur na, u tee nnee ki teen ti Yomdaanɔ baakir mun, kimaan u teen Yennu niipoouk jeet na paak; ki wunba mun kɔɔ jesiat na mun tee nnee ki teen ti Yomdaanɔ baakir, ki mun bia teen Yennu niipoouk.

⁷ Sɔɔ kaa ki be ki fo u yur paak, amii ki kpenn u mɔŋ loomm kuumi.

⁸ Ti-i fo, ti Yomdaanɔ paake te ki ti fo; ki ti-i kpo, u loomm paake te ki ti kpo. Li paak, ta fo amii ta kpo, ti tee ti Yomdaanɔ yabe.

⁹ Masia din kpo ki bia fiir kuun ni a wun teen footib nan kpeemm Yomdaanɔ.

¹⁰ Ki fin, bee teen ki a biir a naa biki? Bee teen ki a yisin a naa biki? Ti kur tan sa set Yennu tɔɔnn ki wun bu ti buut.

¹¹ Li sɔb Yennu gbouŋ ni a ti Yomdaanɔ Yennu yet a “Ma set be na, booru kur sa gbaan n tɔɔnn, ki sɔɔ kur sa yet a n set tee Yennu.”

¹² Li paak, sɔɔ kur tan sa fiit u mɔŋ ki tur Yennu.

Daa te ki a naa bik-n baa

¹³ Li paak, ti daa biir leeb sana, ŋaan kii mi i mɔŋ par ni nan i kan te ki i naa bik-n tun toonbiit ki baa.

¹⁴ Min nan ti Yomdaanɔ Yisa nba taan leeb ki ji tee niyenɔ na, ŋanne te ki n bann nan jeet kaa ki kɔɔ. Ŋaan sɔɔ-i dukin nan jesiat kɔɔ, ŋann ŋanin li kɔɔ u boor.

¹⁵ Fi-i te ki a naa bik par biir jeet nba ki a di na paak, ŋann ŋanin a ji ki tuun loomm toonn kaa. Nirɔ nba ki Masia din gaar u paak ki kpo na, a daa te ki wun nyik Yennu sɔnu a jeetdinu paaki.

¹⁶ Linba ki a dukii a li ŋan, a daa te ki niib-n pak biit li paaki.

¹⁷ Kimaan Yennu naan labaar ki tee jeetdinu amii nyunu labaar kaa, ŋaan li tee popeenn nan parmaasir nan parpeenn yar nba ki Yennu Seyeeŋ turite.

¹⁸ Wunba waa Masia nna, Yennu sii mɔk parpeenn nan li daanɔ, ki niib bia sii teeu nibaakir.

¹⁹ Li paak, ŋaant man ki tin yabir ki tun linba baat nan parmaasir, nan linba sa somm ti leeb.

²⁰ I mi ki a biir Yennu toona, jeet paak. Jeet kur ŋane, ŋaan li ki ŋan ki a di jeet nba sa te ki a naa bik-n baa.

²¹ Linba ŋan tee ki a nyik linba sa te ki a naa bik-n baa, li-i lekii tee nant ŋmamu amii daan nyunu.

²² Fa teen yada ki jikit saa jeetdinu po biaŋinba na, ŋaant ki lii be fin nan Yennu sinsuuk ni. Wunba tun linba ki u dukin nan li ŋan, ki ki mɔk birsuk li paaki, parpeenn tee u yare.

²³ Ŋaan wunba mɔk birsuk linba ki u di na paak, ŋaan dii, u mɔk biit, kimaan u ki dir nan yada. Nirɔ-i kii teen yada nan toonsiar ŋani, ŋaan tan tuun toonn maŋ, li tee biite.