Rom Teeb 12 - Yennu Gbounpaauŋ Mɔɔr

Nirɔ nba sa tun Yennu toona biaŋinba

¹ Li paak, n naa waas, Yennu ninbatinu paake te ki n barimi ma yi jii i gbanant ki turɔ, ki lii tee mannu nba fo, kii waa ŋɔɔ kuukɔɔ, ki li sa maŋɔ; ŋanne tee Yenjiantu nan barmɔnii.

² I daa te ki i binbeŋ tee kaman nan tingbouŋ na niib binbeŋ na, ŋaan ŋaant ki Yennu-n lebit i dudukit nan barmɔnii, kii ŋamm i binbeŋ fanu; ŋanne ki i sa bann Yennu yanbɔɔt nba ŋan ki bia tee fanu ki gbenn.

³ Yennu nba tinin ninbaauk na paake ki n yeen sɔɔ kur a sɔɔ daa dukii u par ni a u tee nijaann ki gar wa tee biaŋinba; ŋaan ŋaant ki sɔɔ kur-ii dukii ki bann yada nba ki Yennu turɔ na bikinu.

⁴ Tɔn, nirɔ gbanant bɔkite, ki mɔk bont kur nan li toonn, ŋaan taan ki tee gbananyennkɔɔ.

⁵ Li mun bia tee nnee nan ta yab bonchiann, ŋaan timm nan Masia lakin tee gbananyennkɔɔ, ki ti kura na gbanant taan ki tukin ki ji teen gbananyenn.

⁶ Li paak, sɔɔ kur-n jii u piinii nba ki Yennu Seyeeŋ turɔ na ki tun biaŋinba ki Yennu turɔ yaak na. A piinii na-i tee fii sɔkint Yennu maan naie, li ŋan fan tun a yada biaŋ;

⁷ ki a piinii na-i tee a somm leeb, li ŋan fan somm a leeb; li-i tee a teen wanntɔɔ, li ŋan fan wann leeb;

⁸ li-i tee ki a kpaan a leeb kpaanii, fan tun nna; fin nba mun pi piinii, i tuun nna kaman nan burchimɔ na; wunba mun mɔk yaak niib paak, li ŋan wun tun yaak toonn maŋ bonŋann; ki wunba mun mɔk ninbatinu nan niib, li ŋan wuu mɔk ninbatinu nan parpeenn.

⁹ Ŋaant ki loomm-ii tee barmɔnii loomm, ŋaan kii soor linba ŋan na fanu, ŋaan kii nân biit.

¹⁰ I loon leeb man bonŋann kaman nan nirɔ nan u naa bik nba tuu loon leeb biaŋinba na, ki kot kii baakit leeb;

¹¹ kii tee nikakitii, ki daa tiin gbannyakiri, ŋaan kii tuun ti Yomdaanɔ toona nan i para kura,

¹² ŋaan kii mɔk parpeenn i dindann paak, kii mɔk mintir i fardinu sinsuuk ni, ŋaan kii mei Yennu yoo kur;

¹³ ŋaan paat linba ki i mɔk na ki tur Yennu niib nba ki mɔki, ŋaan kii gaan saamm kii chantirib i ŋei ni.

¹⁴ Binba mukisi, yin jiimm a “Yennu mɔsonŋann-ii be i paak.” Mɔmɔmm, yii jiimm nna, i daa teemm mɔpor gbaa.

¹⁵ Wunba mɔk parpeenn, yii mun-ii mɔk parpeenn mun; ki wunba mun mɔk parbiir, yii mun-ii mɔk parbiir mun.

¹⁶ Yii mɔk man dudukyennkɔɔ ki daa mɔk dontinmɔŋ; ŋaan kii saak toona nba ki mɔk dontinmɔŋi, ki daa dukii nan i mɔk ninyentiri.

¹⁷ I daa tuun biit ki jiint biit paaki; kotir i mɔŋ kii tuun linba ki niib kur sa la ki li ŋan.

¹⁸ Yii yabir i mɔŋ man kii mɔk parmaasir nan niib kur.

¹⁹ N naa walonkai, i kpan daa tuun biit ki jiint biit paaki, ŋaan ŋaant ki Yennu-n pa pann maŋ ki dat bi tuba ki jiin. Li sɔb Yennu gbouŋ ni a ti Yomdaanɔ yet a “Min kuukɔɔe mɔk yaak nba ki sa dat niib tuba; mine sa jiin ki tun biit maŋ.”

²⁰ Yii tee kaman nan la sɔb Yennu gbouŋ ni a “A dataak-i mɔ kon, fan dinnɔ, nyunyukiru-i soorɔ, fan turɔ nyun wun nyu; a ki fi-i tee nna, a dintɔ feie.”

²¹ Daa ŋaant ki biit-n nyannani, ŋaan jii toonŋana ki nyann biit.