Barŋanii nba ki MAK din sɔb nae na 8 - Yennu Gbounpaauŋ Mɔɔr

Yisa nba dinn niib tusa ŋanna biaŋinba

¹ Linba na poorpo, li din ki yukiri ki niburchiauŋ yaan lakin leeb Yisa boor ni; ki bi ki mɔk jeet; ki Yisa yiin u poorpoweiteeb na u boor ni, ki tan betib a

² “Ninbaauk soorin bonchiann nibur na paak, kimaan daa ŋanntaae na ki bi be nanin, ŋaan ki ki mɔk jeet ki di.

³ Mi-i muni kunnib nan komi, bi sa saa fib sɔnu niwa, kimaan bi siab sɔnii fɔka.”

⁴ Ki u poorpoweiteeb na boiɔ a “Ti sa la jeet lee muuk na ni ki lin jaŋ nibur na kuri?”

⁵ Ki u boib a “Boroboro kuna ŋaŋŋae be i boor ni nna na?” Ki bi betɔ a “Ŋannlore.”

⁶ Li yooe ki u te ki nibur na kur kar tiŋ ni. Ŋanne ki u jii boroboro kuna ŋannlore na, ki tur Yennu niipoouk li paak, ŋaan ŋmit ŋmit ki tur u poorpoweiteeb na a bin tor nibur maŋ.

⁷ Bi bia din mɔk janbis waan bi boor ni; ki u bia tur Yennu niipoouk li paak, ŋaan bet u poorpoweiteeb maŋ a bin jii torib biak.

^8-9 Ki sɔɔ kur din dii wa loon biaŋinba. Bi din tee kaman nan niib tusa ŋanna. Ki u poorpoweiteeb tikir jeet nba tenn na, ki li gbee kpanchubit ŋannlore. Ki u ji chab niib maŋ,

¹⁰ ŋaan ki ŋɔɔ nan u poorpoweiteeb kakit ki kɔɔ burgbetir ni, ki saan Dalmanuta tiŋ ni.

Farisiinba nba loon bakitnauŋ nyinn biaŋinba

¹¹ Li poorpoe ki Farisiinba siab baar Yisa boor ni ki tan tee serimii, a bin bikinɔ ki la u mɔbonkpetir, ki tan yetɔ a wun teen nyinn ki lin wann nan Yennu set mi u po.

¹² Li yoo ki u kurint u yan ni ŋaan boib a “Bee teen ki mɔtana nibooru na loon nyinni? Barmɔniie ki n beeri, n kan tun nyinn ki tur mɔtana niib na.”

¹³ Li poorpo ki u nyikib, ŋaan ŋmat kɔɔ burgbetir na ni, ki poot mɔkgbeŋŋir pootir na po.

Farisiinba nan Bat Herod datiŋ labaar

¹⁴ Tɔn, Yisa poorpoweiteeb din tamm ki ki dia jeet ki li yabi. Bi din dia boroboro kunn yennkɔɔe burgbetir na ni.

¹⁵ Ki Yisa kpaanib a “I mi man, kii guu i mɔŋ nan Farisiinba nan Herod datiŋ na man.”

¹⁶ Ŋanne ki bi ji piak bi leeb sinsuuk ni a “Ta ki dia boroboro nee ki u piak linba na.”

¹⁷ Ŋaan ki u bann ba piak linba na, ki boib a “Bee ki i piak ki yaa a i ki dia boroboro? I daa ki bann siar biakii? I dudukit ni bia daa ki yentii?

¹⁸ I mɔk ninbina, ŋaan bee ki i ki laati? I bia mɔk tuba, ŋaan bee ki i ki gbia?

¹⁹ I tian yoo nba ki n ŋmit ŋmit boroboro kuna ŋaŋŋmu ki dinn niib tusa ŋaŋŋmu na-aa? Kpanchubit ŋaŋŋae ki i tikir boroboro nba tenni?” Ki bi jiin a “Piik nan ŋannlee.”

²⁰ Ki u boib biak a “Ki yoo nba ki n ŋmit ŋmit boroboro kuna ŋannlore ki dinn niib tusa ŋanna na, kpanchubit ŋaŋŋae ki i tikiri?” Ki bi jiin a “Ŋannlore.”

²¹ Ŋanne ki u boib a “Ŋaan ki i bia lek daa ki bann siarii?”

Yisa nba din te ki jɔɔŋ nyɔɔnt biaŋinba

²² Ki bi din tan baar Betsaida; ki nisiab din jii jajɔɔnsɔɔ nna ki baar nanɔ Yisa boor ni, ki tan barimɔ a wun siiu.

²³ Ki Yisa soor u nuu ki nyii nanɔ doo kpiŋ po, ki siir mɔsant jɔɔ na ninbina ni, ki jii u nii ki yii u paak, ŋaan boiɔ a “A laat siarii?”

²⁴ Ŋanne ki jɔɔ maŋ got sanpaapo, ŋaan yet a “Nn, n laat niib, ŋaan bi naan nan tiinii nee ki somm.”

²⁵ Ki Yisa bia jii u nii ki yii jɔɔ maŋ ninbina paak; li yoo na ki jɔɔ maŋ ji got sirrr, ki sɔɔ ki u ninbina mɔk laafia, ki u ji laat bonsiar kur pur pur pur.

²⁶ Ki Yisa te ki jɔɔ maŋ kun u ŋaak ni, ŋaan ki u kpaanɔ a “I mi ki a ŋmat doo maŋ ni jik.”

Piita nba din pak barjaann ki jiin Yisa po biaŋinba

²⁷ Ŋanne ki Yisa nan u poorpoweiteeb din yaat ki saa Siisarea Filipi tingbouŋ ni. Ba daa be sɔnu paak ki saa na ki u boib a “Betirin man, niib na yaa a n tee ŋmee?”

²⁸ Ki bi betɔ a “Nisiab yeen a a tee Jɔɔnn wunba daan wuur niib Yennu nyunwuru nae, ki siab mun yaa a tee Elaijae, ki siab mun bia yaa a tee Yennu sɔkiniinba yenɔe.”

²⁹ Ŋanne ki u boib a “Ŋaan ki yimm ŋanin yaa a n tee ŋmee?” Ki Piita jiin ki yetɔ a “Fine tee Yennu Niganntɔɔ Masia na.”

³⁰ Ŋanne ki Yisa kpaamm a bii mi ki bin bet sɔɔ labaar maŋ.

Yisa nba din pak u fara dinu po biaŋinba

³¹ Ki Yisa ji want u poorpoweiteeb a “See ki min nisaarik Bik dii fara bonchiann, ki saakab nan Yennu jiantu yudamm nan sennu wannteeb-n tan yêtin, ki bia kpin; ŋaan li daa ŋanntaa daar ki n sa fiir kuun ni biak.”

³² U din pak linba na ki yent bi kura nummpoe fanu. Ŋanne ki Piita yiinɔ ki nyii nanɔ kpiŋ po ki saa yakii nanɔ a u ji daa mi ki yeen nna.

³³ Ki Yisa gbia jiant got u poorpoweiteeb na, ki ji mun yakii nan Piita a “Fin Sintaanii nba na, seetir nna na. A ki dukii linba tee Yennu yar po kaa, ŋaan dukii linba tee nisaarik yar poe.”

³⁴ Ŋanne ki Yisa yiin u poorpoweiteeb nan nibur nba waau na, ki tan betib a “Wunba-i loon wun wein, see ki u likin u saaŋmaŋ, ki jii u kuun dapunpunn kii waan,

³⁵ kimaan wunba ki saak wun jii u manfoor ki turin, ŋɔɔe tan sa kɔŋŋir, ŋaan wunba likin u saaŋmaŋ, min nan barŋanii na paak, ŋɔɔe tan sa la u manfoor nan barmɔnii.

³⁶ Nirɔ-i la tingbouŋ na mɔkint kura ŋaan kɔŋ u manfoor, nyɔlantpoe ki u sa la?

³⁷ amii nirɔ sa fit jii bee ki kpent u manfoori?

³⁸ Ki wunba-i tiin fei ki jiin min nan n wannu na po tingbouŋ na biitdamm nan tubkangbata damm paak, min nisaarik Bik-i taŋŋi jen nan n Baa Yennu paŋ nan u malakanba, n tan sa tinɔ fei nan man jiiu ki pukin n niib niwa.”