Barŋanii nba ki MAK din sɔb nae na 7 - Yennu Gbounpaauŋ Mɔɔr

Bi yejamm kaar labaar

¹ Tɔn, ki Farisiinba nan sennu wannteeb din tan nyii Jerusalem ki baar Yisa boor.

² Ŋanne ki bi la ki u poorpoweitesiab ki waa bi yejamm kaar, kimaan bi jak jeet di, ŋaan daa ki nit bi nii.

³ (Kimaan Farisiinba nan Juu teeb nileeb kur din tuu ki gbia bi di jeet see ki bi nit bi nii fanu kaman nan bi yejamm kaar nba din want biaŋinba na.

⁴ Li-i tee ki bi daa siar daak ni, bi tuu ki di see ki bi tan wuur sinsinna ki fit lian di. Bi bia din tuu dia kaa bonchiann ki pukin nanba po. Bi din tuu dia kaar nba senn nyunyuŋmanii sokiru, nan bi boba sokiru, nan bi dundɔɔnii wuuru poe.)

⁵ Ki Farisiinba nan sennu wannteeb maŋ boi Yisa a “Bee ki a poorpoweiteeb na ki dia ti damm kaar nba ki ti yejamm din wannit na, ŋaan kpan gbia bi di jeet ki ki nit bi nii?”

⁶ Ki Yisa jiin yetib a “Yennu sɔkinii Aisaya nba din yet linba po na set tee mɔniie. I tee kpinkpannii damme kaman nan wa din sɔb biaŋinba na a ‘Yennu yet a Niib na teenin nibaakir bi mɔi ni kuukɔɔe, ŋaan bi para set fɔk nanin bonchiann.

⁷ Bi jiantirin yanne, kimaan bi jii nisaarik kaa ki want niib, ki yaa a li tee min Yennu sennue.’ ”

⁸ Ki Yisa ŋamm yet a “I bakin Yennu sennue ki bir siar poa, ŋaan sak nisaarii kaar nba want linba na.

⁹ Yimm, i lek yêt Yennu sennu weiu a yin dia i mɔŋ mɔŋ kaare;

¹⁰ kimaan Moses din senn ki yet a ‘Sɔɔ kur-n teen u naa nan u baa nibaakir; ki wunba sukir u naa amii u baa, bin kpan kpiu.’

¹¹ Ŋaan yimm ŋanin yaa a nirɔ-i bet u naa amii u baa a ‘Ma bo sa turi linba na, li kpant Yennu yara;’

¹² a u ji mɔk yaak ki kan somm u naa amii u baa.

¹³ Ya want niib kaar maŋ biaŋinba na, i lek yêen Yennu bariie. I bia tee bonsia bonchiann ki li naan nan linba na booru.”

Linba be nisaarik par ni labaar

¹⁴ Ŋanne ki Yisa ŋamm din yiin niburchiauŋ na u boor ni, ki tan betib a “Yimm nba kur be nna na, gbiintir man ki bann ma yaa n pak linba na paak.

¹⁵ Bonsiar kaa ki sa kɔɔ nisaarik mɔb ni ki fit teenɔ jakint u par ni. Ŋaan linba nyi nisaarik par nie fit teenɔ jakint.

¹⁶ Wunba kur mɔk tuba, wun gbiint.”

¹⁷ Wa betib nna gbenn yoonba ki u nyik niib maŋ, ŋaan saan kɔɔ ŋasiak nna ni. Ki u poorpoweiteeb boiɔ a wun wannib barii maŋ paak.

¹⁸ Ŋanne ki u boib, “I mun bia lek daa tee yankpeenaee? I ki mi a linba kur ki nisaarik di, li ki teenɔ jakintii?

¹⁹ kimaan li ki kɔɔ u par ni kaa, ŋaan u poor nie ki li kɔɔ, ki bia kpant bint ki nyi.” (Wa yet biaŋinba maŋ want nan jeet kura ŋan.)

²⁰ Ki u bia ŋamm yet pukin a “Linba set nyi nisaarik par nie teenɔ jakint,

²¹ kimaan u par nie ki dudukbiit baat nan poo weiu nan jab weiu, nan nanyuktin, nan nikpinu,

²² nan bonchonchonn toona, nan nianchiauŋ nan biitbooru booru nan faak faaru, nan toon-yana, nan funfunn, nan sanjaauŋ, nan karinbaanii, nan jat toona.

²³ Linba na kure nyi nirɔ par ni ki teenɔ jakint u par ni.”

Poosɔɔ yada labaar

²⁴ Linba na poorpo ki Yisa nyii leŋ ki saan Taya nan Saidon bɔkir po, ki kɔɔ ŋasiak nna ni, ki ki loon sɔɔ-n bann nan u be leŋi; ŋaan u din kan fit bɔr u mɔŋi.

²⁵ Ki poosɔɔ nba ki narinbiiuk din be u bonpobik ni na gbat u po, ki u baar u boor ni ki tan gbaan u tɔɔnn ni.

²⁶ Poo maŋ din ki tee Juu nirɔ kaa; bi din marɔ Fonisia tiŋ nie, Siria tingbouŋ ni. Ki poo na barin Yisa a wun nyinn narinbiiuk na u bonpobik maŋ ni.

²⁷ Ŋanne ki Yisa betɔ a “Ŋaant ki ti dinn waas bi jeet sinsinn, kimaan li ki ŋan ki nirɔ-n jii waas jeet ki tur bɔi.”

²⁸ Ki poo na jiin a “N Yomdaanɔ, li set tee mɔniie, ŋaan bɔi nba tuu dɔɔ teebur lɔuŋ ni na mun ganii waas jebura nba baa na.”

²⁹ Ki Yisa betɔ a “A jiinu nba na paak, i kun; a sa saa baar sɔɔ ki narinbiiuk na nyii a bonpobik na niwa.”

³⁰ Ki poo maŋ set din fiir yaat kun ki saa baar ki la ki u bik na dɔɔ u dindɔɔnu paak, ki narinbiiuk na set nyiiwa.

Yisa nba din te ki muuk muut biaŋinba

³¹ Tɔn, ki Yisa ji din nyik Taya yakir na, ŋaan tɔkin nyii Saidon yakir, nan tiŋ nba ki bi din yi Doi-piik na mɔkmɔk ki saa baar Galilee mɔkgbeŋŋir ni.

³² Ki nisiab din baar nan jasɔɔ ki u tee muuk; ki bi barimɔ a wun yii u nuu jɔɔ maŋ paak.

³³ Ki Yisa gaarɔ ki bi nyii kpiŋ po, bi kuukɔɔ, ki u jii u niibira ki tun jɔɔ maŋ tuba ni, ŋaan siir mɔsant ŋaan sii jɔɔ maŋ jerinn,

³⁴ ki got sanpaapo ŋaan kurint sikin, ki bet jɔɔ maŋ a “Efata,” ki li paak tee “Muutir.”

³⁵ Li taakpaak ni na ki jɔɔ na ji gbia, ki bia fit piak barii fanu.

³⁶ Ŋanne ki Yisa kpaan niib na a bii mi ki bin bet sɔɔ linba ki u tun maŋ po; ŋaan ki bi lek ŋammi ki yarin barii maŋ.

³⁷ Ki binba kur gbat labaar maŋ, ki li teemm bakitnauŋ bonchiann; ki bi boi bi leeb a “Toonŋanboor bee ki jɔɔ na tuun na mani? ki tukpaa gbaa tan fit gbia, ki mui bia fit piak.”