Barŋanii nba ki MAK din sɔb nae na 6 - Yennu Gbounpaauŋ Mɔɔr

Biaŋinba ki Nasaret doo ni teeb din yêt Yisa

¹ Li poorpoe ki Yisa nan u poorpoweiteeb nyii leŋ ki ŋmat kun u mɔŋ doo ni.

² Ki foon daar ki u tan kɔɔ Yenjiantu diiuk ni a wun saa wann nibur nba din be leŋ na Yennu maan. Niib na nba gbat u wannu na ki li teen bi kura yaarlituk, ki bi boi bi leeb a “Yanboor lannpoe ki u mɔk mani? U teen nlee ki tuun bakitnauŋ toonjaana na? U la linba na kur lee?

³ Kanpinta na kaa na-aa? Mari bija na kaa-aa? Ŋɔɔ kaa tee Jems nan Josef nan Judas nan Simon yɔɔrɔ na-aa? U niipoob kaa be nna na-aa?” Ki bi yêenɔ.

⁴ Ŋanne ki u betib a “Yennu sɔkinii ki kɔŋŋit nibaakir see u mɔŋ mɔŋ doo ni nan u tiauŋ niib boor ni, nan u mɔŋ mɔŋ ŋaak ni.”

⁵ U din ki tun bakitnauŋ toonjaana leŋi, see baatib baŋŋa nnee ki u din yii u nii bi paak, ki bi la laafia,

⁶ kimaan niib maŋ nba ki teenɔ yada na; ki linba na yaar ŋaan litɔ bonchiann. Ŋanne ki Yisa lin digbanbis ni ki want niib Yennu maan.

Biaŋinba ki Yisa din tun u poorpoweiteeb piik nan bannlee na

⁷ Ki u din tan lakin u poorpoweiteeb piik nan bannlee ki turib paŋ a bii nyint narinbiit niib ni, ki yaa wun tumm bannlelee;

⁸ ki u betib a “Yoo nba ki i saa, i daa jikit siar ki saa, see patdiakai kuukɔɔ. I daa dia jeeti, i bia daa dia sunsomm paka, i bia daa wuu likirii i jafaanba ni.

⁹ Yi pir taasaat, ŋaan i bia daa jikit liata ki pukii.”

¹⁰ Ki u bia betib a “Li-i tee ki i baar ŋaak nba ni, ki bi gaari, yii be leŋ nan i nyinu daar.

¹¹ Li-i tee ki i baar doo nba ni, ki niib na ki gaari, ki bia ki gbiintir i mɔmaan, yin nyi doo maŋ ni, ki pit i taapant ni tant bir li doo ni, ki lin teen siarbiiuk ki turib.”

¹² Ki u poorpoweiteeb fiir saan ki mɔɔntir Yennu maan ki beer niib a bin nyik bi biit,

¹³ ki bia nyint narinbiit niib bonchiann ni, ki bia jii kpan ki sɔɔr baatib bonchiann paak, ki bi la laafia.

Jɔɔnn wunba din wuur niib Yennu nyunwuru na kpinu labaar

¹⁴ Tɔn, Bat Herod din gbat Yisa labaar kimaan u sann din doo bonchiann, ki nisiab yeen a “Jɔɔnn wunba daan wuur niib Yennu nyunwuru na fiir kuun ni. Ŋanne te ki u mɔk paŋ ki tuun bakitnauŋ toona na.”

¹⁵ Ki siab mun yaa a “U tee Yennu sɔkinii Elaijae;” ki leeb mun bia yaa a “U tee Yennu sɔkinii kaman nan yaayoo ni sɔkiniinba na sɔɔe.”

¹⁶ Bat Herod ŋanin nba gbat yoonba ki u yet a “U tee Jɔɔnn wunba ki n daan te ki bi pot u yur, ŋaan ki u jen fiir be u manfoor nie.”

¹⁷ Kimaan Herod daan te ki bi soor Jɔɔnn ki baanɔ bant ki kɔɔnɔ dansarik, ŋɔɔ Herod waarɔ Filip ŋaapoo paak; ki bi din yi poo maŋ Herodias, ki Herod din fat kɔɔnɔ.

¹⁸ Ki Jɔɔnn din tuu beer Herod a Yennu sennu ki chabɔ nan wun fat u waarɔ ŋaapoo ki kɔɔni.

¹⁹ Linba na paak Herodias ji din nân Jɔɔnn, ki loon wun kpiu, ŋaan ki fiti, kimaan Herod mɔŋ mɔŋ din ki saki.

²⁰ Herod mun din tiin Jɔɔnn, kimaan u mi nan Jɔɔnn tee popeendaanɔ wunba tiin Yennu. Li paak ki u din tinn Jɔɔnn. Ŋaan Jɔɔnn nba mɔɔntir Yennu maan na, ki li ŋmat Herod yan ni bonchiann, ŋaan ki u lek gubint ki gbiintir u maan maŋ.

²¹ Li poorpo ki Herodias lora din tan soor Jɔɔnn. Herod maaru jaamm daar tan baar, ki u yiin u naan kpaaka, nan lanjimanba yudamm, nan Galilee tiŋ ni saakab kur.

²² Ŋanne ki Herodias bonpobik baar ki waa siak, ki Bat Herod nan u saamm para penn, ki u boi bonpobik maŋ a “Bee ki a loon ki n turani? Min sa tura linba kur ki a loon,”

²³ ki tur bonpobik na mɔsonn ki betɔ a “N sa tura linba kur ki a loon, hali li-i lekii baar ki n tura n naan na bɔkir gbaa.”

²⁴ Ŋanne ki bonpobik na nyii, ki saa boi u naa a “N tan sa yetɔ a n loon bee na?” Ki u naa jiin a “Betirɔ a a loon Jɔɔnn wunba wuur niib Yennu nyunwuru na yure.”

²⁵ Li yoo na ki bonpobik na ŋmat yiama ki saan Bat Herod boor ni ki betɔ a “N loon Jɔɔnn wunba wuur niib Yennu nyunwuru na yure ki a kpeen tatilaauk ni ki turin mɔtana.”

²⁶ Ki linba na tur bat na parbiir bonchiann, ŋaan u ji din kan fit yêt bik maŋ nba loon linba na, kimaan u dɔŋ senn mɔsonn saamm maŋ boor niwa.

²⁷ Ŋanne ki u tun yupotitɔɔ li taakpaak ni, ki betɔ a wun jen nan Jɔɔnn yur turɔ. Ki yupotitɔɔ na saan dansarik ni ki saa pot Jɔɔnn yur,

²⁸ ki kpeenn tatilaauk ni, ki jen nann ki tan tur bonpobik maŋ, ki u mun jiir ki tur u naa.

²⁹ Jɔɔnn poorpoweiteeb nba gbat yoonba, ki bi baar ki tan jii u gbanant ki pii.

Yisa nba dinn jab tusa ŋaŋŋmu biaŋinba

³⁰ Li poorpoe ki Yisa toomiinba maŋ ŋmat jen u boor ni ki tan yetɔ linba kur ki bi tun ki bia wann niib.

³¹ Nigbouŋ lek din tut, ki siab baat ki siab ŋmat, ki Yisa nan u poorpoweiteeb kɔŋ yaak nan bin di jeet. Li paak ki u betib a “Ŋaant ki ti yaat saan muuk ni ti kuukɔɔ, ki foi waan.”

³² Ŋanne ki bi kɔɔ burgbetir ni ki poot saan muuk ni, bi kuukɔɔ.

³³ Ba din saan yoonba ki niib bonchiann lab ki bannib, ki nyii bi doi ni ki tin ki kokin mɔkgbeŋŋir kpiŋ ki dɔŋ chetib.

³⁴ Ki Yisa nba tan nyii burgbetir na ni, ki u la ki nigbanu na poŋ tikir ki muk, ki ninbaauk soorɔ bonchiann, kimaan bi binbeŋ din naan nan pei nba ki mɔk pekpaarik nee. Ki u piin li yoo ki wantib maan bonchiann.

³⁵ Yoo nba tan gar ki u poorpoweiteeb tan baar u boor ni ki yetɔ a “Yoo gara, ki nna na mun tee muuk nie.

³⁶ Nyikin niib maŋ ki bin saan doo ni nan digbanbis nba kpia na ni ki la jeet ki daa ki di.”

³⁷ Ŋanne ki u mun jiin yetib a “I mɔŋ-n turib jeet ki bin di.” Ki bi ŋmant boiɔ “A loon ki ti jii pɔŋ kobii ŋannlee ki saan daa jeet ki tan turib a bin di-ii?”

³⁸ Ki u boib a “I mɔk boroboro kuna ŋaŋŋae? I saan got man.” Ba saan got ki bann yoonba ki bi jen ki tan betɔ a “Li tee boroboro kuna ŋaŋŋmue nan janbis ŋannlee.”

³⁹ Ŋanne ki u bet nibur maŋ a bin bɔkit kar mɔpaauŋ paak wora wora nna.

⁴⁰ Ki bi bɔkit kobik kobik, nan piiŋŋmuŋmu, ki kar paabu paabu.

⁴¹ Ki u jii boroboro na, nan janii ŋannlee na, ŋaan yaat got sanpaapo, ki tur Yennu niipoouk, ŋaan ŋmit ŋmit boroboro kuna na ki tur u poorpoweiteeb a bin tor niib maŋ; ki u bia ŋmit ŋmit janii ŋannlee na, ki bi tor sɔɔ kura.

⁴² Ki sɔɔ kur dii gboo ki bia tenn.

⁴³ Ki u poorpoweiteeb lakin jeet nba tenn na, ki li gbee kpanchubit piik nan ŋannlee.

⁴⁴ Jab nba din dii jeet maŋ din tee tusa ŋaŋŋmue.

Yisa nba din somm nyun paak biaŋinba

⁴⁵ Linba na poorpo ki Yisa te ki u poorpoweiteeb kɔɔ burgbetir na ni ki gar u tɔɔnn po ki doo mɔk-pootleer po, ki saan Betsaida; ŋaan ki ŋɔɔ biar a wun chab nibur maŋ.

⁴⁶ Wa chab niib maŋ gbenn yoonba ki u doo jɔsiar paak ki mei Yennu.

⁴⁷ Ki li din tan baar dajonyiɔk, ki burgbetir na daa be nyun sinsuuk ni, ŋaan ki u mun tan daa be jɔɔr maŋ paak u kuukɔɔ,

⁴⁸ ki tan la ki u poorpoweiteeb gbaa nan burgbetir kannu, kimaan bi din kan ki tookit wouŋo. Ŋanne ki u din fiir somm nyun paak ki baar bi boor ni, kojomɔɔk sanyafaar. Wa tan baar yoonba, ki u teen nan u yaa wun garib na.

⁴⁹ Ki bi la ki u somm nyun paak, ki bi mi a li tee kpeemɔe; ki bi yikin sanpaapowa,

⁵⁰ kimaan bi kur lauwa; ki jaŋmaanii soorib bonchiann. Li taakpaak ni ki u yetib a “Cheen i para man. Li tee mine; i daa tiin jaŋmaanii mani,”

⁵¹ ŋaan kɔɔ ki pukimm burgbetir maŋ ni; ki wouŋ na ji ŋmin soonn. Ki li bakitib bonchiann,

⁵² kimaan bi daa din ki bann wa won jii boroboro na ki tun bakitnauŋ toonn biaŋinba na paaki. Bi dudukit daa din ki soorir fanu.

Yisa nba din te ki baatib paak biaŋinba

⁵³ Ba tan nyii mɔkgbeŋŋir na ni ki doo kunkonn paak Genesaret tiŋ nna, ki bi lor bi burgbetir ki senn.

⁵⁴ Ki li chinchiauŋ kur po niib nba la Yisa, ki bi bannɔ yiama,

⁵⁵ ki bi tiin saa tingbouŋ maŋ loka kur po ki jii bi baatib ki baat u boor ni. Ba tuu gbat ki u be siaminba kur po, bi din tuu jii bi baatib lianii paake ki saan namm u boor ni.

⁵⁶ Wa tuu dɔkit doi nan digbanbis nba kura ni, ki niib bonchiann dia bi baatib ki tokiiɔ nan dai niwa ki barimɔ a bin lek sii u tiat mɔgbana, ki binba siir na kura la laafia.