Barŋanii nba ki MAK din sɔb nae na 4 - Yennu Gbounpaauŋ Mɔɔr

Tanburtɔɔ barjouk

¹ Ŋanne ki Yisa yaan din piin ki want niib Yennu maan Galilee mɔkgbeŋŋir kpiŋ, ki niburchiauŋ baar u boor ni. Wa din la ki nigbanu na yabit na, ki u kɔɔ burgbetsiar ni, ki sik nyun ni, ŋaan ki niib na biar ki see gbingbann.

² U din yiimm barjokit ki wantib barii bonchiann.

³ U din yin a, “Nnara, a jasɔɔ din doo u kpaab a wun saa bur dii.

⁴ Wa din buur na, ki bonboorii na yenninba yat ki baa sanjouk paak, ki nɔɔnii wei ki tɔkir.

⁵ Ki leer mun din baa tanpuut paak siaminba ki tant ki yabi. Tant nba ki yab na, ki li pia ki kpaat yiama,

⁶ ŋaan yennu nba tan toŋ yoonba, ki li jɔɔk. La din ki fit sikin jiina na paak, li kur din kpoe.

⁷ Ki leer mun din baa kunkonii ni, ki tan lakin pia ki kpaat namm, ŋaan ki kunkonii ŋmabirir ki li ki fit nan.

⁸ Ŋaan ki leer mun din baa tinŋaŋ ni ki pia, ki kpaat fanu, ki nan naanŋauŋ, ki yenninba nan dibin piinntataa, ki leernba mun nan piinnloobloob, ki siab mun nan kobik kobik.”

⁹ Yisa nba yin barjouk na ki gbenn yoonba ki u yet a “Wunba mɔk tuba ki sa gbat, wun gbiint.”

Barjokit maŋ yinu paak

¹⁰ Li poorpoe ki nisiab nba din be Yisa peŋ, nan u poorpoweiteeb piik nan bannlee na, din baar u boor yoo nba ki u din be u kuukɔɔ na, ki tan boiɔ barjokit na paak.

¹¹ Ki u yetib a “Yimm ŋanin, Yennu fiit woonin ni barii ki jii jiin u naan po ki wanniiwa, ŋaan binba ki be i ni na ŋanin gbia bonsiar kura nan barjokite

¹² a ‘Bin got ŋaan daa laat, ki bia gbiint ŋaan daa bant li paaki; kimaan bi-i la ki bann bi sa jen ki baar Yennu boor ni ki wun nyik chab bi biita.’ ”

Tanburtɔɔ barjouk na paak

¹³ Ŋanne ki Yisa boib, “I ki bann barjouk na paakii? Ki nlee ki i sa mi bann barjokit kura paaki?

¹⁴ Tanburtɔɔ na tee kaman nan wunba piak Yennu maan nee.

¹⁵ Ki nisiab naan nan bonboorii nba baa sanjouk paak nee; bi-i gbat Yennu maan yoonba, ŋaan Sintaanii tuu baar ki nyinnir bi para nie yiama.

¹⁶ Nisiab mun naan nan bonboorii nba baa tanpuut paak nie; bi tuu gbat ki gaar maan maŋ nan parpeenn na,

¹⁷ ŋaan maan maŋ ki fit siik baant bi para ni fanu, li paak bi ki diar ki li yuki; yoo nba ki niib dintib fara, amii muksuk tan baarib maan maŋ paak, bi tuu lue yiama.

¹⁸ Ki nisiab mun bia naan nan bonboorii nba baa kunkonii ni na. Bi gbia maan maŋ,

¹⁹ ŋaan tingbouŋ na fara, nan mɔkint loomm, nan bonbooru booru loomm tuu kɔɔ ki nyakin maan maŋ ki li kan nami.

²⁰ Ŋaan nisiab ŋanin naan nan bonboorii nba tuu baa tinŋaŋ ni nee. Ŋamm gbia maan maŋ ki gaan, ki li naan. Siab naan piinntataa, ki siab naan piinnloobloob, ki siab mun bia naan kobik kobik.”

Fitir labaar

²¹ Ki u bia boib a, “Sɔɔ mi ki kɔɔ nan fitir ŋaak ni ki chibin ŋmaŋ li paak, amii ki gurir gado lɔuŋ ni-ii? Aaii. See ki u jiir ki tɔɔn bonsiar nba fɔk paak.

²² Barii nba kur woo, see ki li tan woot nyii paanu ni, ki linba kur mun liik, see ki li likit.

²³ Sɔɔ-i mɔk tuba ki sa gbat, wun gbiint.”

²⁴ Ki u bia yetib a, “Gbiintir man, ŋaan kii mi ya gbia Yennu labaar biaŋinba. Ya gbat biaŋinba, nnee mun ki Yennu sa turi u maan ki lin gar ya gbat biaŋinba;

²⁵ wunba gbat ki gaar bonŋann, ŋɔɔe sa ŋamm gaar ki pukin, ŋaan wunba ki gbiintir, u sa kɔŋ linba ki u yaa a u mɔk waan na.”

Tanburu barjouk

²⁶ Ki Yisa bia ŋamm yet a, “Yennu naan naan nnae: li tee kaman nan nirɔ nba tuu bur tan u kpaab ni,

²⁷ ŋaan daa kur u tuu dɔɔr gɔɔn nyiɔk, ki tan fiir yennu ni, li yoo maŋ ki bonboorii na kura tuu pa ki kpaatir; ŋaan ki u tuu ki mi la tuun biaŋinba ki pa ki kpaatiri.

²⁸ Tiŋ nee tuu te ki bonboorii maŋ-n pa ki kpaatir ki bia naan, nyakirii tuu nyi sinsinn, li poor po ki faat-n nyi, ki dipukaa-n nyi ki wei.

²⁹ Dii maŋ-i beer yoonba, ki kpaarɔ na ji tuu piin li jaamue nan u dijaanjuk, kimaan jaamu yoo ji baare na.”

Bonboorik barjouk

³⁰ Linba na poor po ki Yisa boib a “Ti daa sa bikin Yennu naan nan lannpoe? Ti sa yin barjouk lanne ki lin yent niib nunii po?

³¹ Li tee kaman nan kanpotik binn nba ki sɔɔ jii ki bur kpaab ni, ki li waar ki gar tingbouŋ na bonboorii kura,

³² ŋaan bi-i burir, ki li tan pia ki kpaat ki li ji yab tiinii kura, ki mɔk yiingbeŋŋa; ki nɔɔnii ji tuu tan tia tiat li yiinii na paak.”

³³ Yisa din yiin barjokit bonchiann kaman nan na nee, ki nyint Yennu maan ki teen niib nan ba sa fit bann biaŋinba.

³⁴ U ki mi ki pak namm maan see barjokit kuukɔɔ. Ŋaan u din tuu tan ŋamm wann u poorpoweiteeb barjokit maŋ kur paak yoo nba ki bi tan biar be bi kuukɔɔe.

Wouŋ nan nyun nba sak Yisa mɔb biaŋinba

³⁵ Li daar maŋ dajouk ki Yisa bet u poorpoweiteeb ki yaa a “Ŋaant man ki tin poot mɔkgbeŋŋir na pootir man.”

³⁶ Li yooe ki bi nyik nibur na, ki kɔɔ wa kar burgbetir nba ni na; ki ŋamm nan ŋɔɔ lakin saan. Ŋaan burgbetlia bia din be leŋ.

³⁷ Ba be burgbetir maŋ ni ki ki mi yiitianpo, ŋamm tan sɔɔ wounpaaruk fikite, ki nyunpana piin liat kɔɔ burgbetir maŋ ni, ki li tan yaa lin gbee.

³⁸ Li yoo Yisa din dɔɔ burgbetir maŋ poor po ki kpaak yukpaktir paak ki gɔɔnt. Ŋanne ki u poorpoweiteeb fiinɔ ki yaa a, “Chanbaa, ta yaa ti kpo na, a baka kaa ti po-oo?”

³⁹ Ki u fiir set ki tian wounpaaruk na paak, ki bia bet nyunpana na mun a “Dɔɔt soonna.” Ki wounpaaruk maŋ gbenn, ki nyun na mun ji dɔɔ ki muu dik dik.

⁴⁰ Ŋanne ki u boi u poorpoweiteeb maŋ a “Bee ki i mɔk gbananjekinti? I bia daa ki mɔk yada-aa?”

⁴¹ Ki jaŋmaanii din soorib bonchiann, ki bi boi bi leeb a “Jaboor bee na? ki wouŋ nan nyunpana saak u mɔb.”