Barŋanii nba ki MAK din sɔb nae na 3 - Yennu Gbounpaauŋ Mɔɔr

Nuukpeenn daanɔ paaku po

¹ Ŋanne ki Yisa din bia kɔɔ Yenjiantu diiuk ni, ki jasɔɔ din be leŋ ki u nuu kpo.

² Ki nisiab din be leŋ ki gorii Yisa, a bin laan u sa te ki nuukpeenn daanɔ maŋ-n paak foon daarii, ki bin biirɔ.

³ Ŋanne ki Yisa yiin nuukpeenn daanɔ na a “Baat nna,”

⁴ ŋaan boi niib na a “Ti sennu chab a tii sommit niib foon daar amii ti biiribi? Ti fat niib ki lu amii ti kpibi?” Ŋaan ki bi ji din ŋmina.

⁵ Ki u got ki lintib nan wutoor, kimaan u par din biir bonchiann bi ninkoonii na paak; ki u ŋmant ki bet jɔɔ maŋ a “Tantir a nuu maŋ.” Ki u tant u nuu maŋ ki li la laafia.

⁶ Li yoo na ki Farisiinba din ŋmat nyii, ki ŋamm nan Bat Herod poorpojɔɔmu din lor soor nan leeb ba sa teen biaŋinba ki kpi Yisa.

Niib bonchiann nba din waa Yisa poor biaŋinba

⁷ Ki Yisa nan u poorpoweiteeb din fiir ki sik mɔkgbeŋŋir na kpiŋ, ki niburchiauŋ din waa u poor po, binba din nyii Galilee nan Judea

⁸ nan Jerusalem nan Idumea nan Jɔɔdann mɔk-pootir, nan Taya nan Saidon tingbouŋ ni, ki bi yab bonchiann ki tikir u boor; ba din gbat nan u tuun toongbeŋŋa na paak, ki bi din baar u boor ni mɔkgbeŋŋir na kpiŋ.

⁹ Ki u bet u poorpoweiteeb a bin la burgbetir turɔ a wun kɔɔ ki kar ki wann niib maŋ Yennu maan, a ki nibur na tan daa tutɔ,

¹⁰ kimaan wa din te ki baatib bonchiann paak na paake din te ki binba kur yiar ji din nakii a bin siiu.

¹¹ Narinbiit nba din tuu lau yoonba kura din tuu baa u tɔɔnne ki faa wuyikiŋ ki yeen a “Fine tee Yennu Bija.”

¹² Ki u din kpaamm nan nunmɔnn a bi daa mɔɔntirɔ nan niibi.

Yisa nba din gann u toomiinba piik nan bannlee biaŋinba

¹³ Li poor po ki Yisa doo jɔɔr paak ŋaan yiin binba ki u loon bin baar na, ki bi baar u boor ni.

¹⁴ Ki u gann niib piik nan bannlee, ki yib toomiinba, a bii be u boor ni, a wuu tuumm ki bii mɔɔntir u barŋanii,

¹⁵ kii bia kii mɔk yikoo kii nyint narinbiit niib ni.

¹⁶ Wa din gann niib nba piik nan bannlee na, bi sanae na: Simon, wunba ki Yisa din purɔ Piita na;

¹⁷ Jems nan u naa bik Jɔɔnn binba din tee Sebedee waas na, binba ki Yisa din purib Boanejes, ki li paak tee satianii waas;

¹⁸ nan Andru nan Filip, nan Batolomiu, nan Matiu, nan Tomas, nan Jems wunba din tee Alfeus bik, nan Tadeus, nan Simon wunba din loon ŋamm Juu teeb-ii yen bi mɔŋ,

¹⁹ nan Judas wunba din tan nyii Yisa poor na.

Narinbiit bat Beelsebul labaar

²⁰ Li poor po ki Yisa kun; ki niburchiauŋ din tikir ŋɔɔ nan u poorpoweiteeb boor ni, ki bi tan kɔŋ yaak nan jeet dinu.

²¹ U ŋaateeb nba din gbat nna, ki bi baar a bin soorɔ, kimaan niib din yeen a u waate.

²² Ki Yennu sennu wanntesiab nba din nyii Jerusalem na mun din yet a “Narinbiit bat Beelsebul nae be u yur ni, ki u nyint narinbiit niib ni ŋɔɔ Beelsebul yikoo ni.”

²³ Ki Yisa din yiin wannteeb maŋ a bii baat na, ŋaan yimm barjokit ki boib a “Sintaanii sa sak nyinn u mɔŋii?

²⁴ Naan niib-i ŋmat ki kɔn tookit bi leebi, bi naan maŋ kan fit seti.

²⁵ Ki ŋaak niib-i ŋmat kɔn nan leebi, bi ŋaak maŋ kan fit seti.

²⁶ Ki Sintaanii-i ŋmat kɔn nan u mɔŋi, u kan fit seti, u joontu terike na.

Yisa nba fit ki biir Sintaanii paŋ biaŋinba

²⁷ “Sɔɔ kan fit kɔɔ paŋ daanɔ ŋaak ni ki saa jan u mɔkinti, see ki u dɔŋ ki lorɔ ŋaan yen ji fit biir u ŋaak maŋ.”

²⁸ Ki Yisa ŋamm yetib a “Barmɔniie ki n beeri na, Yennu sa nyik chab nifosaarii bi biit nan bi barbiit kura;

²⁹ ŋaan wunba kur piak barbiit ki teen Yennu Seyeeŋ, Yennu kan mi ki nyik chab li daanɔ faba nan yoo nba kaa gbennu.”

³⁰ Linba din te ki Yisa din pak nna maŋ tee nnae, kimaan ba din yet a “Narinbiiuk be u yur ni na.”

Yisa naa nan u waarii labaar

³¹ Li yoo na ki Yisa naa nan u waarii din baar ki see nanyer po, ŋaan tun sɔɔ a wun yiinɔ na.

³² Ki niburchiauŋ din kar ki lintɔwa, ki u be sinsuuk ni; ki bi yetɔ a “A naa nan a waarii nan a niipoob be nanyer po ki loona.”

³³ Ki u boib a “Ŋmee daa tee n naa, ki lamme mun tee n waarii?”

³⁴ ŋaan got binba kar u boor ni na ki yet a, “N naa nan n waariie be nna na.

³⁵ Wunba kur tuun Yennu loomm, ŋɔɔe tee n waarɔ nan n niipoo nan n naa.”