Barŋanii nba ki MAK din sɔb nae na 2 - Yennu Gbounpaauŋ Mɔɔr

Yisa nba din te ki gbanankpeenn daanɔ paak biaŋinba

¹ Ki li din tan teen daa ŋannlelee, ki Yisa bia ŋmat Kapenaum; ki bi mɔɔnt nan u ŋmat ŋaak powa.

² Ki niib bonchiann din tikir hali nan yiar bonmintik nnawa tan kaa ŋaak maŋ ni ki sɔɔ sa fit baar tammɔb boor ni; ki u mɔɔntir Yennu maan ki teemm.

³ Ki niib banna din tan jii baatsɔɔ ki u gbanant kpo; ki bi teenɔ liaŋ paak a bin baar nanɔ Yisa boor.

⁴ Ba din ki fit baar u boor kimaan niib nba din yabit na paak, ki bi chɔɔ loot mɔpinn yur paak, ki sikin baatɔɔ na nan liaŋ na ki tan birɔ Yisa tɔɔnn ni.

⁵ Yisa nba din la ba teenɔ yada biaŋinba na, ki u yet baatɔɔ na a “N bik, n nyik chab a biita.”

⁶ Li yoo na ki Yennu sennu wanntesiab din kar leŋ maŋ ki boi bi para ni,

⁷ “Bee teen ki jɔɔ na piak nna? U jikit Yennu yikoo u yur paake. Ŋmee daa sa fit nyik chab nirɔ biiti, ki li ki tee Yennu kuukɔɔ kaa?”

⁸ Dudukit na nba din be bi para ni yoonba na, ki Yisa bann ki boib a “Bee ki i boi i para ni linba be na paaki?

⁹ Ma yet baatɔɔ na a ‘N nyik chab a biit’ amii ma yaa n yetɔ a ‘Fiit ki jii a liaŋ kii somm na,’ maan munnlee na sinsuuk ni lannpoe paarii?

¹⁰ ŋaan n sa wanni nan min nisaarik Bik mɔk yikoo tingbouŋ nna ni, ki sa fit nyik chab nirɔ biit;” ŋanne ki u jiant bet wunba ki u gbanant kpo na a

¹¹ “N beerae, fiit, ki jii a liaŋ kii kun a ŋaak ni.”

¹² Li taakpaak ni ki u fiir ki jii u liaŋ ki nyii bi kura ninbina ni; ki li bakitib bonchiann; ki bi piak dont Yennu sann ki yeen a “Ti daa ki mi la bakitnauŋ toona na booru.”

Biaŋinba ki Yisa din yiin sɔɔ ki u sann din tee Liifai

¹³ Li poorpoe ki Yisa bia din ŋmat mɔkgbeŋŋir na kpiŋ, ki niib bonchiauŋ tikir u boor ni ki lintɔwa, ki u din wantib Yennu labaar.

¹⁴ Ŋanne ki u din gar tɔɔnn po ki saa la jasɔɔ nna ki u sann din tee Liifai, wunba din tee Alfeus bik, ki u kar u toonn paak lampogaar diiuk ni; ki Yisa betɔ a “Fiit kii waan.” Ki u fiir ki waau.

¹⁵ Ki Liifai maŋ teen jaamm u ŋaak ni ki tur Yisa; ki lampogaarteeb bonchiann nan biitdamm bonchiann lakin kar nan Yisa nan u poorpoweiteeb ki di jeet, kimaan bi yab bonchiann ki waau.

¹⁶ Ki sennu wannteeb, binba din tee Farisiinba na, la ki Yisa di jeet nan biitdamm nan lampogaarteeb na; ki bi boi u poorpoweiteeb na a “Bee ki u lakin di nan lampogaarteeb nan biitdammi?”

¹⁷ Yisa nba gbat nna ki u betib a “Binba mɔk laafia ki loon tebtɔɔ; ŋaan binba yiar, ŋamme loon tebtɔɔ. Li ki tee niŋamm paak kaa te ki n baari, biitdamm paake ki n baar.”

Mɔloru labaar

¹⁸ Ŋanne ki Jɔɔnn wunba din wuur niib Yennu nyunwuru na poorpoweiteeb nan Farisiinba din lorin mɔi; ki nisiab din baar ki boi Yisa a “Jɔɔnn poorpoweiteeb nan Farisiinba poorpoweiteeb lorin mɔi; bee teen ki a poorpoweiteeb ki lorimi?”

¹⁹ Ki Yisa boib a “Poochianu-i be, saamm sa lor mɔi yoo nba ki pooyookir sɔrɔ daa be bi boor ni nawa-aa? Aaii. Pooyookir sɔrɔ nba daa be bi boor ni na, bi kan lor mɔi.

²⁰ Ŋaan sianyoo baat na ki bi tan sa nyinn pooyookir sɔrɔ na bi boor; li yoo maŋe ki bi sa lor mɔi.

²¹ “Ŋaan sɔɔ kan sak jii chabpaann ki lik takperi; li-i tee ki u teen nnaie, chabpaann na sa pat takper nae, ki li patimin na sa ŋamm pukin.

²² Nnee mun ki sɔɔ kan jii dapaanin ki liak dalenkper ni; li-i tee ki u teen nnaie, ki dapaanin na tan mɔ yoonba li sa yeer dalenkper nae, ki daan maŋ-n mɔɔn yann, ki linlenn na-n mun yeer. Li paak, bi tuu jikit dapaanin ki liakit linlenpaann nie.”

Juu teeb foon daar labaar

²³ Tɔn, Juu teeb foon dasiar, ki Yisa nan u poorpoweiteeb din gaar dii kpaab ni. Ba din saa maŋ ki u poorpoweiteeb na toktir dikara ki pinii ki ŋman ŋaan saa.

²⁴ Ŋanne ki Farisiinba na boiɔ a “Gotir, bee ki bi tuun linba ki ti sennu ki chab a bii tuun foon daari?”

²⁵ Ki u yetib a “I ki mi karin Yennu gbouŋ ni David nba din tun biaŋinba-aa? Ki yoo nba ki kon din gbat ŋɔɔ nan u jɔɔmu, ki bi din ki mɔk jeet na,

²⁶ ki u din kɔɔ Yennu ŋaak ni, ki saa jii Yennu boroboro ki ŋman yoo nba ki Abiata din tee manteeb yudaanɔ na. Ki sennu na din ki chab nan sɔɔ-n di boroboro maŋ see Yennu manteeb kuukɔɔe; ŋaan David maŋ din ŋmame, ki bia tur u jɔɔmu na gbaa ki bi mun ŋman.”

²⁷ Ŋaan ki Yisa ŋamm ki yetib a “Nisaarik sommir paake ki Yennu senn foon daar; li ki tee foon daar paak kaa ki u din nan niibi.

²⁸ Li paak, min nisaarik Bike tee foon daar Yomdaanɔ biak.”