Barŋanii nba ki MAK din sɔb nae na 16 - Yennu Gbounpaauŋ Mɔɔr

Yisa kuun fiiru labaar

¹ Foon daar nba din tan gar na, ki Mari Magdaliin, nan Salome, nan Mari wunba din tee Jems naa na, din saan ki saa daa tulaarnunubit a bin saan but Yisa gbanant paak.

² Lasir daar sanyayendaanne ki bi din saan kaauk maŋ boor ni.

^3-4 Ba daa din be sɔnu ni yoonba, ki bi faa nan leeb sawara a “Ŋmee sa saa birint katanu kaauk maŋ mɔb ki turiti?” (Li katanu din gbeŋ bonchiann.) Ŋanne ki bi tan per leŋ, ki got la ki katanu maŋ poŋ birint ki dɔɔ li kɔɔ.

⁵ Li yoo ki bi kɔɔ kaauk maŋ ni, ki saa la naasinbik nna, ki u lia baanpiouŋ ki kar nuudiitu po. Ki li teemm jijeet bonchiann.

⁶ Ki naasinbik maŋ yetib a “I daa jee siar mani. N mi nan i loon Nasaret nirɔ Yisa nba ki bi kpiiu dapunpunn paak nee. U kaa nna; u fiir kuun niwa. Gotir man ba daan birɔ siaminba na.

⁷ Yi ŋmat ki saa bet u poorpoweiteeb nan Piita a u gar bi tɔɔnn po ki saan Galileewa; leŋe ki bi sa saa lau kaman nan wa poŋ daan betib biaŋinba na.”

⁸ Ki li yaar ŋaan lit poob maŋ, ki bi gbanant jek bonchiann, ki bi nyii kaauk na ni, ki chiar, ŋaan lek ki faa sɔɔ li labaari, kimaan jaŋmaanii din soorib bonchiann.

Yisa nba din dɔkit Mari Magdaliin paak biaŋinba

⁹ Tɔn, Yisa nba din fiir kuun ni lasir daar sanyiɔk ni na, u din dɔŋ dɔkit Mari Magdaliin paake, wunba ki u din nyinn narinbiit bannlore u ni na.

¹⁰ Ki poo maŋ saan saa bet Yisa weinanleeb nba mɔ ki fabin na;

¹¹ ŋaan ba gbat ki u yaa a Yisa jen u manfoor ni ki u lau na, bi ki sak teenɔ yada.

Yisa nba din dɔkit u poorpoweiteeb bannlee paak biaŋinba

¹² Linba na poorpoe ki Yisa poorpoweiteeb bannlee siab din tan nyii doo na ni ki somm sɔnu ni. Ki u lebit u mɔŋ ki dɔkit bi paak.

¹³ Ki bi ŋmat jen doo na ni ki tan yet bi leeb, ŋaan ki bi lek ki teemm yada.

Yisa nba din dɔkit u poorpoweiteeb piik nan yenɔkɔɔ paak biaŋinba

¹⁴ Li poorpoe biak ki Yisa poorpoweiteeb piik nan yenɔkɔɔ na din kar ki di jeet, ki u tan dɔkit bi paak, ki sarikitib bi yada pɔɔrin paak, nan bi tuba nba kpaa biaŋinba na paak, kimaan bi ki teen binba lau ki u fiir kuun ni na yada.

¹⁵ Ki u bia yetib a “Yii saa kii mɔɔntir barŋanii na ki tur sɔɔ kur tingbouŋ na kur saaka po.

¹⁶ Wunba kur teenin yada, ki bi wurɔ Yennu nyunwuru, u sa la tinnu; ŋaan wunba kur ki teenin yada, Yennu sa bu u buut ki biirɔwa.

¹⁷ Ŋaan binba teenin yada sa tun yaarlituk toona nee: bi sii taan n sann ki nyint narinbiit niib ni; ki bia pak barganii nba ki bi tuu ki mi piakii;

¹⁸ ki nyik nna, bi-i taŋŋi soor wai, amii bi-i taŋŋi nyu nyɔkbiir, ki li kan teemm siari; bi bia sa yii bi nii baatib paak, ki bin la laafia.”

Yisa nba din doo sanpaapo biaŋinba

¹⁹ Tɔn, ti Yomdaanɔ Yisa nba pak barii na ki gbenn yoonba, ki Yennu te ki u doo sanpaapo ki saa kar ŋɔɔ Yennu nuudiitu po.

²⁰ Ŋanne ki u poorpoweiteeb saan ki saa mɔɔntir u barŋanii lokir kur po, ki ti Yomdaanɔ din be namm, ki te ki bi tuun yaarlituk toona, ki li toona na din wann siara a bi mɔɔntii maŋ set tee barmɔniie.