Barŋanii nba ki MAK din sɔb nae na 12 - Yennu Gbounpaauŋ Mɔɔr

Toontunna barjouk

¹ Li yoo ki Yisa jak barjokit yinu a “Jasɔɔ din wuu tilontii u kpaab ni, ki chaan gungouŋ lintir, ŋaan gbiir gbiouk nba ki bi tuu sii ŋmaki tilontii maŋ lɔɔna nyun leŋ; ki bia maa sukir kpaab na ni; ki jii kpaab na ki teen toontunna nii ni a bii gorii. Li-i taŋŋi jaŋ nan pɔɔru, bin pɔɔr ki turɔ, ŋaan mun tan pɔɔr bi yar. Li poorpoe, ki u din yaat saan tinsiak.

² Ki lɔɔna na punpɔɔr yoo tan baar, ki u tun daabir a wun saan gaar tilɔɔna u toontunna na boor ni; ki u saan.

³ Ki toontunna na saa soorɔ ki boou fanu, ŋaan berɔ, ki u kun yann.

⁴ Ki kpadaanɔ maŋ bia tun daabilɔɔ, ŋaan ki toontunna na bia saa faa u yur, ki pat ki paanɔ daŋ ki dinnɔ fei.

⁵ Ki kpadaanɔ na bia ŋamm tun daabilɔɔ bi boor ni, ŋaan ki bi saa kpii ŋɔɔ. Li poorpo ki u bia ŋamm tun daabileeb bonchiann bi boor ni, ki bi bia saa tun nna, ki boo siab, ŋaan kpii leeb.

⁶ Kpadaanɔ maŋ tiauŋ bilonkak din tan biar, ki u tumɔ toontunna maŋ boor ni, ki yet a ‘Bi sa baak n tiauŋ bija nawa.’

⁷ Ŋaan ki toontunna maŋ yet bi leeb a ‘U fadiirɔe na, ŋaant tin kpiu man, ŋaan ki faar na-n kpant ti yar.’

⁸ Ki bi soorɔ ki kpiiu ki nyii nanɔ kpakpiŋ po ki lu.”

⁹ Yisa nba pak nna gbenn ki u boib a “I dukin ki kpadaanɔ na sa teen nlee? U sa baar ki tan kpi toontunna maŋe, ŋaan jii kpaab na ki teen toontunsiab nii ni.

^10-11 I daa ki mi karin la sɔb Yennu gbouŋ ni biaŋinba-aa? Li sɔb a ‘Tann nba ki tanmaara yêtɔ na, ŋanne din set tee lɔtik ni tanŋann, ki ti Yomdaanɔ Yennu teen nnee, ki li teent bakitnauŋ na.’ ”

¹² Yisa nba pak nna gbenn yoonba, ki Juu teeb yudamm yabii bi mɔŋ a bin soorɔ, kimaan bi mi nan wa yin barjouk maŋ na, li saan gaan bi paake, ŋaan ki bi tiin nibur na jaŋmaanii; li paak ki bi nyikɔ ŋaan yaat.

Lampo panu labaar

¹³ Ŋanne ki bi tun Farisiinba siab nan Bat Herod poorpojɔɔmu na ni siab Yisa boor ni a bin tan boiɔ buboit ki la u mɔbonkpetir.

¹⁴ Ki bi tan baar ki yetɔ a “Wanntɔɔ, ti mi nan a piak barmɔnii, ki ki mɔk jaŋmaanii nan niib nba sa dukin li po biaŋinba. A bia want niib Yennu sɔnu nan barmɔnii, ki a baka bia kaa nan nirɔ nba tee wunba. Li paak, betirit, ti sennu chabit nan tii pa lampo kii teen Rom tiŋ kpanbar Siisa, amii ti daa pa?”

¹⁵ Ki Yisa bann bi ser nba ki bi tee na, ki jiimm a “Bee ki i loon ki yin kɔɔnin jinjammii ni? Baat nan likirib a n got.”

¹⁶ Ki bi baar nann. Ŋanne ki u boib a “Ŋmee naauŋ nan sanne be li paak na?” Ki bi yetɔ a “Siisa yare.”

¹⁷ Ki Yisa yetib a “Tɔn, yii yenn-ii pa kii teen Siisa linba tee u yar, ŋaan kii mun-ii pa kii teen Yennu linba tee Yennu yar.” Ki li yaar ŋaan litib bonchiann nan Yisa.

Kpeemm fiiru labaar

¹⁸ Ŋanne ki Sajusiinba, binba din tuu yaa a niib tan kan fiir kuun ni na, din baar Yisa boor ni, ki tan yetɔ a

¹⁹ “Wanntɔɔ, Moses din sɔb sennu ki yet a ‘Jɔɔ-i kpo ŋaan nyik u ŋaapoo, ŋaan ki bi ki mar waasi, li ŋan ki u ninja-n faar pakɔɔk na ki mar waas ki tur kpeemɔ na.’

²⁰ Tɔn, jab bannlore din be ki tee ninjann, ki saakɔɔ po tan kɔɔn poo, ŋaan kpo ki ki mar waasi.

²¹ Ŋanne ki wunba waa u paak na faar poo maŋ, ŋaan mun tan kpo ki waas kaa; ki wunba waa banntaa na ni mun faar poo maŋ biak, ŋaan mun tan kpo, ki ki mar waas nanɔ.

²² Nnee ki binba waa na kura kɔɔn poo maŋ, ŋaan tan kpo, ki bi sɔɔ ki mar bik nanɔ. Li poorpo, ki poo maŋ mun tan kpo joont.

²³ Tɔn, ki kpeemm fiiru daare, bi ŋmee tan sii yen poo maŋi? kimaan bi bannlore maŋ kura din kɔɔnɔwa.”

²⁴ Ki Yisa yetib a “I ki mi siari. Linba teen ki i ki mi tee nnee: i ki mi Yennu gbouŋ, ki bia ki mi wa mɔk paŋ biaŋinba na;

²⁵ kpeemm-i taŋŋi fiir kuun ni, bi tan sii tee kaman nan malakanba nba be Yendɔuŋ ni nee; pookɔɔnt nan jakunt tan sii kaa.

²⁶ Nnara, ki jii jiin kpeemm fiiru po, i ki mi karin Yennu sɔkinii Moses sɔbu ni siaminba yeen kunkonjagotuk tiik na po na-aa? Li sɔb ki yet a Yennu din bet Moses a ŋɔɔ Yennue tee Abraham Yennu, nan Aisak Yennu, nan Jakɔb Yennu.

²⁷ Niib na nba din poŋ kpo li yoo na, ŋaan bi bia lek daa fo, kimaan Yennu ki tee kpeemm Yennu kaa, ŋaan u tee footib Yennue. Ya want nan niib tan kan fiir kuun ni na, li ki tooki.”

Sennu nba gar leer labaar

²⁸ Tɔn, sennu wanntɔsɔɔ din be leŋ ki gbat Yisa nan Sajusiinba na labafaanu maŋ, ki la Yisa nba gat bi buboit maŋ fanu biaŋinba. Li paak ki u baar Yisa boor ni, ki mun tan boiɔ a “Ki sennlanupoe kpan tee sennjaanni?”

²⁹ Ki u jiinɔ a “Linba tee sennjaann tee nnee: ‘Israel teeb, gbiintir man, ti Yomdaanɔ Yennu tee Yen-yenɔkɔɔe;

³⁰ i loonɔ nan a par kur, nan a seek kur, nan a dudukit kur, nan a paŋ kura.’

³¹ Sennjaann nba pukin ŋannlee tee nnee: ‘I loon a lɔɔ kaman nan fa loon a mɔŋ biaŋinba na.’ Sennsau ji kaa ki gar sennii ŋannlee nba na.”

³² Ki sennu wanntɔɔ maŋ yet Yisa a “Wanntɔɔ, niipoouk. A yet barmɔniie, a ti Yomdaanɔ Yennu tee Yen-yenɔkɔɔe, ki yensɔu ji kaa ki pukin u po;

³³ a nisaarik-ii loon Yennue nan u par kura, nan u dudukit kura, nan u paŋ kura, kii biakii loon u lɔɔ kaman nan wa loon u mɔŋ biaŋinba na. Li kpaa talas bonchiann nan nirɔ-n sak sennii nba ŋannlee na ki gar wun jii bonkobit ki mann mannsɔu ki tur Yennu.”

³⁴ Yisa nba la ki u gat nan yan na, ki u betɔ a “A ki fɔk nan Yennu naami.” Linba na poorpo ki sɔɔ ji din ki mɔk par nan wun boi Yisa buboisiati.

Masia nba tee wunba buboit labaar

³⁵ Yisa nba din want niib wannu Yennu diiuk ni, ki u tan boib buboit a “Bee ki sennu wannteeb yaa a Yennu Niganntɔɔ Masia tee David yaaboonni?

³⁶ kimaan Yennu Seyeeŋ nba din gbee nan David ki u yet a, ‘Ti Yomdaanɔ Yennu din bet n Yomdaanɔ a Karin n nuudiitu po mɔkmɔk nan ma tan sa te fan ŋmaa a datai a taapauŋ ni.’

³⁷ David mɔŋ mɔŋ nba din yiin Masia na a ‘Yomdaanɔ,’ ki nlee ki Masia na tee ŋɔɔ David yaaboonni?” Nibur bonchiann din gbiint Yisa wannu maŋ nan parpeenn.

Biaŋinba ki Yisa betib a bii mi sennu wannteeb binbeŋ po

³⁸ Wa wannib na ki u yetib a “I mi sennu wannteeb binbeŋ na po man; ŋamme loon bii lia baant kii lin kii somm, kii bia gaan burchinfoontii dai ni na;

³⁹ bi-i kɔɔ Yenjiantu diit ni, bi loon bii kaar nijaana kaanii paak; bi-i saan jaamm ni, bi bia loon yudamm kinkaanii boae;

⁴⁰ ŋamme bia di pakɔi fobit, ŋaan ji tuu jenna ki mei Yennu ki yukii, a bin kpann a bi tee yentinae. Bi tubdatu tan sii bi bonchiann.”

Pakɔɔk piinii labaar

⁴¹ Tɔn, ki Yisa kar Yennu jiantu ŋasaakak na ni ki kpia nan Yennu piinii lakir, ŋaan gorii niib nba kpee bi likirii biaŋinba na. Ki mɔkita bonchiann kpee likyura bonchiann;

⁴² ŋaan ki pakɔtalasdaansɔɔ mun tan baar kpeen jenjenninba ŋannlee; ŋanne tee kobu na.

⁴³ Ki Yisa yiin u poorpoweiteeb ki betib a “Barmɔniie ki n beeri na, pakɔtalasdaanɔ na kpeen piinii nba yab piinii lakir na ni ki gar sɔɔ kur,

⁴⁴ kimaan bi kur gann bi piinii bi mɔkinchiauŋ nie, ŋaan pakɔtalasdaanɔ na ŋanin tur linba kur ki u mɔke.”