Barŋanii nba ki MAK din sɔb nae na 1 - Yennu Gbounpaauŋ Mɔɔr

Jɔɔnn nba din wuur niib Yennu nyunwuru na labaar

¹ Ŋanne tee Yennu Bija Yisa Masia barŋanii na.

² Li din piin tee kaman nan Yennu Sɔkinii Aisaya nba din sɔb nee a “Yennu yet a ‘Nnara, n toomue na, ki n yaa n tumɔ a wun dɔŋ ki gar a tɔɔnn, ki ŋamm a sɔnii ki tura.’

³ Sɔɔ be muuk ni ki hoot ki yaa a ‘Ŋammit man ti Yomdaanɔ baaru sɔnii ki lii took ki turɔ.’ ”

⁴ Jɔɔnn nba din wuur niib Yennu nyunwuru na din be muuk ni, ki mɔɔntir ki teen niib a bin nyik bi biit ki wun wurib Yennu nyunwuru ki Yennu-n nyik chab bi biit.

⁵ Ki niib bonchiauŋ din nyii Judea tiŋ ni nan Jerusalem doo ni, ki baar Jɔɔnn boor ni, ki tan fiit bi toonbiit, ki Jɔɔnn wurib Yennu nyunwuru, Jɔɔdann mɔkir ni.

⁶ Jɔɔnn din lia bonkobuk nba ki bi yiu lagumii kobit liatire, ki bia boob gbann u siak ni, ki u jeet din tee naasuut nan siate.

⁷ Ki u mɔɔntir ki teen niib a “Nirɔ nba yaa wun tan wei n poor ki baar na cheen, ki n pɔ gbaa nan ki n gbaan u tɔɔnn ni ki lot u taasaaŋmii.

⁸ Min ŋanin wuuri nan nyume, ŋaan ŋɔɔe tan sa jii Yennu Seyeeŋ ki wuur i para.”

Jɔɔnn nba din wur Yisa biaŋinba

⁹ Li yoo na ki Yisa din nyii Nasaret doo nba be Galilee tiŋ ni na, ki baar Jɔɔnn boor, ki Jɔɔnn wurɔ Yennu nyunwuru Jɔɔdann mɔkir maŋ ni.

¹⁰ Yisa nba din nyii nyun maŋ ni ki doo yoonba, li taakpaak ni ki u la ki sanpaapo loot, ki Yennu Seyeeŋ sik tɔɔn u paak ki naan nan ŋmann;

¹¹ ki u gbat kunkɔr sanpaapo na, ki kunkɔr na yet a “Fine tee n Bilonkak; fine ki n numm gboo.”

Biaŋinba ki Sintaanii din jamm Yisa labaar

¹² Ŋanne ki Yennu Seyeeŋ din te ki Yisa kɔɔ muuk ni; ki u din be muuk maŋ ni ki saa jaŋ dapiinna, ki Sintaanii saa jammɔ.

¹³ Yisa nan muuk ni bonkobite din be; ki Yennu malakanba siik ki chantirɔ.

Yisa nba din yiin jansoorteeb banna biaŋinba

¹⁴ Tɔn, ki bi din tan soor Jɔɔnn wunba wuur niib Yennu nyunwuru na, ki kɔɔnɔ dansarik; ki li poorpo ki Yisa saan Galilee tiŋ ni, ki mɔɔntir Yennu barŋanii

¹⁵ ki yeen a “Yoo baara, ki Yennu naan baaru per na; li paak, teent man barŋanii maŋ yada ŋaan nyik i toonbiit.”

¹⁶ Yisa nba din somm Galilee mɔkgbeŋŋir kpiŋ na, ki u tan la Simon nan u waarɔ Andru, ki bi lubin janlaauŋ mɔkgbeŋŋir na ni, kimaan bi din tee jansoorae.

¹⁷ Ki u yetib a “I waan man, ki n sa te ki yii daak niib kii baat namm n boor.”

¹⁸ Li taakpaak ni ki bi nyik bi janlaauŋ na, ŋaan fiir ki waau.

¹⁹ Ki u bia ji din saan tɔɔnn po waaminna ki la Jems nan u waarɔ Jɔɔnn, binba din tee Sebedee waas na, ki bi din be bi burgbetir ni ki lik bi janlaant.

²⁰ Li taakpaak ni ki u yiimm; ki bi nyik bi baa Sebedee nan u toontunna burgbetir maŋ ni, ŋaan waau.

Jɔɔ nba ki narinbiiuk din be u ni na labaar

²¹ Ki Yisa nan ŋamm din saan kɔɔ digbansiar ki li sann yi Kapenaum; ki Juu teeb foon daar tan baar, ki bi kɔɔ Yenjiantu diiuk ni, ki u piin ki want niib Yennu maan.

²² Ki u wannu maŋ bakitib bonchiann, kimaan u wannib kaman nan daanɔ nba yen yikoo nee, ki ki wannib kaman nan sennu wannteeb nba wantib biaŋinba na.

²³ Ki li yoo na ki jɔɔ nba ki narinbiiuk be u ni na be Yenjiantu diiuk na ni

²⁴ ki yikin sanpaapo ki yeen a “Fin Yisa, Nasaret nirɔ na, timm nan fin nlee mantiki? A baar a a tan biiritee? N mi fa tee wunba; a tee Yennu Popeendaanɔ nae.”

²⁵ Ki Yisa tian u paak, ki yet a “Ŋminin fuut, ŋaan nyi u ni.”

²⁶ Ki narinbiiuk na fuun jɔɔ na ki tan lu-u ŋaan yikin sanpaapowa, ŋaan nyii u ni.

²⁷ Ki li din teen bi kur yaarlituko, ki bi boi bi leeb a “Bee na? U wann wannsaannee? U mɔk yikoo ki teen narinbiit mɔb, ki bi saak u mɔb.”

²⁸ Li taakpaak ni ki u sann din mɔɔnt ki lin Galilee tiŋ ni kura.

Yisa nba din te ki baatib bonchiann paak biaŋinba

²⁹ Yisa nba din nyii Yenjiantu diiuk maŋ ni na, ki ŋɔɔ nan Jems nan Jɔɔnn din saan kɔɔ Simon nan Andru ŋaak ni.

³⁰ Ki Simon dianpook din dɔɔ ki yiar gbanantouŋ, ki bi bet Yisa u yiaru maŋ po.

³¹ Ki Yisa din saan soor u nuu ki fiinɔ kaan, ki u gbanantouŋ maŋ gbenn, ki u fiir ki chantib saauŋ.

³² Li daar maŋ dajonyiɔk, ki niib din jii baatib nan binba ki narinbiit be bi ni na, ki baat namm Yisa boor ni.

³³ Ki doo maŋ ni niib kura din lakin ki tan yia diiuk na tammɔb.

³⁴ Ki u te ki nisiab bonchiann binba yiar yiarbooru kura na paak, ki bia nyint narinbiit niib bonchiann ni, ŋaan ki ki sak narinbiit maŋ-n yet siari, kimaan bi din mi wa tee wunba.

Yisa nba din mɔɔntir barŋanii Galilee digbana ni biaŋinba

³⁵ Ki Yisa din dɔŋ nyii ŋaak na ni ki kojouk daa ki mɔ, ki kɔɔ muuk ni ki saa mei Yennu.

³⁶ Ki Simon nan u leeb na ji din lin ki loon u boor,

³⁷ ki saa lau ki betɔ a “Sɔɔ kura loon bin la fa be siame.”

³⁸ Ki u yetib a “Ŋaant man ki tin saan digbana nba be ti tɔɔnn po na, ki n sa mɔɔnt barŋanii na leŋ mun, kimaan li paake te ki n baar.”

³⁹ Ki u din gɔrin ki lin Galilee tingbouŋ ni kura, ki mɔɔntir barŋanii maŋ Yenjiantu diit ni, ki bia nyint narinbiit niib ni.

Yisa nba din te ki gbaatir paak biaŋinba

⁴⁰ Tɔn, ki gbaatsɔɔ din baar Yisa boor ni, ki tan gbaan u tɔɔnn ni, ki barimɔ a “A sa fit te ki n ŋaauk na-n gbenna. A kan sakii?”

⁴¹ Ki ninbaauk din soor Yisa, ki u tant u nuu ki siiu, ŋaan yetɔ a “N saka. A ŋaauk maŋ-n gbenn!”

⁴² Li taakpaak ni ki jɔɔ maŋ ŋaauk na gbenn, ki u gbanant ji jen li bannu ni.

⁴³ Ki Yisa din kpaanɔ fanuwa, ŋaan ji nyikɔ ki u saan,

⁴⁴ ŋaan yetɔ a “I mi ki a bet sɔɔ li barii; i saa ki jii a mɔŋ ki wann Yennu mantɔɔ na, ki mann mannu nba ki Yennu sɔkinii Moses din senn ki jiin gbaata paaku po na, ki sɔɔ kur-n bann nan a ŋaauk maŋ set gbenna.”

⁴⁵ Ŋanne ki jɔɔ na saan ki mɔɔnt u paaku maŋ labaar lokir kura po; ŋanne din te ki Yisa ki fit nyi paanu ni ki kɔɔ digbansiar ni, ŋaan ji kpan be muuk ni; ki niib bonchiann din nyi lokir kur po ki baat u boor ni.