Matiu 27 - Yennu Gbounpaauŋ Mɔɔr

Ba jii Yisa ki saan Pailat boor biaŋinba

¹ La yent sanyapob ni, ki Yennu jiantu yudamm nan saakab lor ba sa teen biaŋinba ki kpi Yisa.

² Ki bi lorɔ ŋmii ki jiiu ki saan nanɔ tiŋ yudaanɔ nba ki bi yiu Pailat na boor ni.

Biaŋinba ki Judas kpo

³ Judas, mɔlanfikdaanɔ na nba gbat ki bi bu joont ki yaa a Yisa ŋan nan kuume na, ki u par din biir bonchiann; ki u jii sarima likibin piinntaa na ki ŋmat saa jiin tur Yennu jiantu yudamm nan saakab maŋ,

⁴ ŋaan yet a “N tun biita, kimaan n fikis wunba kaa biita.” Ŋanne ki bi jiin ki boiɔ a “Ti baka mun ji be linba na ni-ii? Li ji tee a maame.”

⁵ Ki Judas jii likirii na ki lu Yennu jiantu ŋasaakak ni, ŋaan nyii ki saan saa jɔnn u mɔŋ ŋmiuk.

⁶ Ŋanne ki Yennu jiantu yudamm tɔkir likirii maŋ ŋaan yet a “Linba na ji tee sɔn likiriie, ki ti sennu nba tee biaŋinba ti kan fit jii pukin Yennu jiantu ŋasaakak likirii ni.”

⁷ Li paak, ki bi kar dukin likirii maŋ po, ki tan jii saan saa daa yɔkmarɔɔ tiŋ a bii pii saamm leŋ.

⁸ Li paake te ki bi lek bia daa yi tiŋ maŋ a “Sɔn Tiŋ” ki tan tuu dinna.

⁹ Ki li gbeen Yennu sɔkinii Jeremaya nba din pak linba na ki li teen mɔnii a “Bi jii likibin piinntaa nba ki Israel teeb siab din pa ki li tee u daauk na,

¹⁰ ki daa yɔkmarɔɔ tiŋ, kaman nan n Yomdaanɔ Yennu nba wannib biaŋinba na.”

Pailat nba bu Yisa buut biaŋinba

¹¹ Ki Yisa see tiŋ maŋ yudaanɔ Pailat tɔɔnn ni; ki Pailat boiɔ a “Fine set tee Juu teeb kpanbar na-aa?” Ki u jiinɔ a “Nn, fine yaa.”

¹² Ŋaan Yennu jiantu yudamm nan saakab na nba fikisirɔ na ŋanin, u ki jiimm siari.

¹³ Ki Pailat bia boiɔ a “A ki gbia ba fikisira biaŋinba maŋi?”

¹⁴ Ŋaan Yisa ji ki pak siar ki jiin u po, ki li ji bakit Pailat bonchiann.

Pailat nba chab a bin kpi Yisa biaŋinba

¹⁵ Tɔn, li-i tee ki yukitgar tiaru jaamm dinu daari taŋŋi baari, tiŋ yudaanɔ maŋ tuu nyinn niyenɔkɔɔe dansarik ni, wunba ki niib na loonɔ, ki ŋaau.

¹⁶ Sɔɔ din kɔɔ dansarik li yoo, ki u sann din yi Barabas, ki niib na miu fanu nan u toona nba tee biaŋinba.

¹⁷ Ba tan lakin yoonba ki Pailat boib a “Ŋmee ki i loon ki n nyinnɔ dansarik ni ki ŋaau? Barabas amii Yisa nba ki bi yiu Masia na?”

¹⁸ kimaan Pailat mi nan naŋ paake te ki bi soor Yisa ki teen u nuu ni.

¹⁹ Pailat nba daa kar buut kok paak na, ki u ŋaapoo tun toomii ki tan betɔ a “Nyint a nuu Yennu nifopeemɔ na maan ni, kimaan nyiɔk na n won la daamuk bonchiann n daamiit ni u paak.”

²⁰ Ki Yennu jiantu yudamm nan saakab maŋ biir niib na a bin yet Pailat a wun nyinn Barabas ŋaan kpi Yisa.

²¹ Ki Pailat bia ŋamm ki boib a “Niib bannlee na ni, i loon ki n nyinn ŋmee ŋaau?” Ki bi jiin a “Barabase.”

²² Ki Pailat bia ŋamm boib a “Ki Yisa nba ki bi yiu Masia na ŋanimi, i loon ki n teenɔ nlee?” Ki bi kura jiin a “Kpaamɔ ki tabinɔ dapunpunn paak.”

²³ Ki Pailat boib a “Bee paake? U biit mantik tee lannpoe?” Ki bi ŋamm teen fuur, ŋaan jiin sanpaapowa a “Kpaamɔ tabin dapunpunn paak.”

²⁴ Pailat nba bann nan u piak saa li kaa nyɔɔti, ki bia saa baar nan dataar mɔyêtuk na, ki u jii nyun ki wuur wuur u nii, niib na ninbina ni, ŋaan yet a “N nuu kaa jɔɔ nba kaa biit na sɔn nyinnu ni. I maame nawa!”

²⁵ Ki niib na jiin a “Nn, u sɔn-n jii timm nan ti waas yura paak.”

²⁶ Ŋanne ki Pailat nyinn Barabas ŋaau, ŋaan te ki bi boo Yisa kpaasir, ki jiiu turib a bin saa kpaau dapunpunn paak.

Lanjimanba nba din sukii Yisa biaŋinba

²⁷ Ki tiŋ yudaanɔ Pailat na lanjimanba jii Yisa ki kɔɔ nanɔ dundɔuŋ ni, ki bi lanjimanba maŋ kura tikir ki lintɔ.

²⁸ Bi din liat u liant nee, ŋaan jii liatmuŋ nna ki lannɔ,

²⁹ ŋaan luu kunkonii fokirik ki yirimɔ, ki jii patu ki kubinɔ u nuudiitu ni, ki gbaan u tɔɔnn ni, ki sarikitɔ ki yeen a “Juu teeb bat, ti foonta!”

³⁰ Ki bi piin ki siin mɔsant u paak, ŋaan gaar patu nba ki bi bo kubinɔ na ki faa u yur paak.

³¹ Ba tan sarikɔ gbenn yoonba, ki bi liat liatmuŋ na, ŋaan jii u mɔŋ liant na ki lannɔ, a bin ji saan ki saa kpaau ki tabinɔ dapunpunn paak.

Ba din kpaa Yisa ki tabinɔ dapunpunn paak biaŋinba

³² Ba din saa na, ki bi chet Sairene tiŋ ni jasɔɔ nba ki u sann yi Simon, ki soorɔ, ki miau jinnɔ Yisa kuun dapunpunn na.

³³ Ba saa baar siaminba ki bi yir Golgota na, ki li paak tee a “Yukpabuk boor,”

³⁴ ki bi jii daan nba ŋmat nan bonkobuk yan ki turɔ a wun nyu; ŋaan wa lemm yoonba ki u yêt nyunu.

³⁵ Ba kpaau ki tabinɔ dapunpunn paak gbenn yoonba, ki bi tɔ tiatia ki chent chent u tiat na,

³⁶ ŋaan ji kar leŋ ki guu-u.

³⁷ Ki bi sɔb ba yaa a u tun biit nba na, ki tabin u dapunpunn na yur paak. Ba din sɔb linba na ki li want a “Yisa nba tee Juu teeb Kpanbar nee na.”

³⁸ Bi mun bia din kpaa fatiteeb bannlee dapunpuna paak leŋ, ki pukin Yisa po, ki yenɔ din be u nuudiitu po, ki lɔɔ mun din be u nuugaŋ po.

³⁹ Binba din somm gaar leŋ na pakin bi yurae ŋaan sukiiɔ,

⁴⁰ ki yeen a “Fin nba yaa a a sa fit bet Yennu jiantu ŋasaakak na ŋaan bia maar daa ŋanntaa sinsuuk ni na, fine na, tint a mɔŋ. Li-i tee ki a set tee Yennu Bijaie, fan nyi dapunpunn na paak ki sik na.”

⁴¹ Nnee biak ki Yennu jiantu yudamm nan sennu wannteeb nan saakab kura mun din sarikitɔ

⁴² ki yeen a “U tuu tint leebe, ŋaan kan fit ki tinn u mɔŋi. Tɔn, u yaa a u tee Israel teeb bate, wun sikin u mɔŋ dapunpunn na paak na, ki tin fit teenɔ yada mantik.

⁴³ U teen Yennu yadawa, ki yaa a u tee Yennu Bijae. Tɔn, li-i tee ki Yennu set loonɔ, ŋaant tii gorii man ki laan u sa tinnɔ mɔtanawa.”

⁴⁴ Ŋanne ba kpaa fatiteeb nba bannlee ki pukin u po na mun bia sarikitɔ nna.

Yisa kuun labaar

⁴⁵ La tan baar yensuuk ni, ki tingbouŋ na kur ji din bɔnn ki saa baar yenlekir kut munntaa.

⁴⁶ Kut munntaa maŋ yooe, ki Yisa yikin sanpaapowa a “Eli, Eli, lema sabaktani?” Li paak tee a “N Yennu, n Yennu, bee ki a nyikimi?”

⁴⁷ Ki binba see leŋ na nba gbat u yiini maŋ ki bi siab beer bi leeb a “U yi Elaijae na.”

⁴⁸ Ki bi ni yenɔ tin saa jii saapo ki suunt damiituk nna ni, ki jii sakin daauk paak, ki donn turɔ a wun nyu.

⁴⁹ Ki u leeb na beerɔ a wun nyikɔ, a ki laan Elaija sa baar ki tan tinnɔwa-aa?

⁵⁰ Ki Yisa ŋamm yikin sanpaapowa ŋaan ji kpo.

⁵¹ Li yoo na ki chinchenn nba tuu jɔɔn ki puun Yennu diiuk sinsuuk ni na ji bɔkit li yur paak ki tan sik tiŋ ni; ki tiŋ damm, ki tanpiit bɔkitir,

⁵² ki kaat bia lootir, ki kpeemm nba din kpo ki din tee Yennu niib na bonchiann fiir kuun ni,

⁵³ ki nyii bi kaat ni; ki Yisa kuun fiiru poorpo ki bi kɔɔ Jerusalem, ki niib bonchiann lab nan bi ninbina.

⁵⁴ Ki lanjimanba yudaanɔ na, nan u lanjimanba nba pukin u paak ki bi guu Yisa na nba la nna yoonba, nan tiŋ dammu na, ki jaŋmaanii soorib bonchiann, ki bi yeen beer bi leeb a “Barmɔniie, jɔɔ na set tee Yennu Bijae.”

⁵⁵ Poob nba din tuu waa Yisa ki nyii Galilee ki sommitɔ na ji wokir ki see banfɔkira ŋaan gorii linba tuun maŋ.

⁵⁶ Bi yemme din tee Mari Magdaliin, nan Sebedee waas naa na, nan Mari nba din tee Jems nan Josef naa na.

Yisa gbanant piinu labaar

⁵⁷ La tan bɔnt yoonba ki Arimatea doo mɔkitsɔɔ baar, ki u sann din tee Josef. U mun bia din tee Yisa poorpojɔɔe.

⁵⁸ Ki u saan yudaanɔ Pailat boor ni, ki saa miarɔ a wun chabɔ ki wun kpaat Yisa gbanant ki pii. Ki Pailat tur yaak a bin saan ki saa jii Yisa ki turɔ.

⁵⁹ Ki Josef saan ki saa jii Yisa gbanant ki pɔbinɔ katinyeeŋ ni,

⁶⁰ ki jiiu saan saa piiu u mɔŋ mɔŋ kapaauŋ nba ki u din gbiirir tanpiiuk lokir ni na, ŋaan birint katangbeŋŋir ki tan biin kamɔb, ŋaan ji ŋmat kun.

⁶¹ Ki Mari Magdaliin nan Mari lɔɔ na ji kar kpia leŋ ki gorii kaauk maŋ.

Lanjimanba nba guu kaauk maŋ biaŋinba

⁶² La yent sanyiɔk, daar nba tee ŋamm Juu teeb foon daar na, ki Yennu jiantu yudamm nan Farisiinba saan Pailat boor ni ki saa betɔ a

⁶³ “Chanbaa, ti tian nan faak daanɔ maŋ nba daan be na, u yet a li-i tee ki u taŋŋi kpo, a ŋaan daa ŋanntaa daar u bia sa fiir kuun niwa.

⁶⁴ Li paak, turin lanjimanba mɔb ki bin saan kii sai guu u kaauk maŋ li ŋann ki saa tuu daa ŋanntaa maŋ daar; li-i kii tee nnai kaa, u poorpoweiteeb tan sa baar ki piitɔe, ŋaan yet niib a u fiir kuun nie. Ki kpinkpannii maŋ tan sa gar sinsinn yar na paaka.”

⁶⁵ Ki Pailat betib a “Jiin guuteeb man ki bin saan kii sai guu kaauk maŋ kaman nan ya sa fit guur biaŋinba.”

⁶⁶ Ki bi jii guuteeb ki saan saa guu kaauk na, ŋaan buun tant ki pɔr fanu.