Matiu 25 - Yennu Gbounpaauŋ Mɔɔr

Sapaamm piik po

¹ “Yennu naan labaar tan sii tee kaman nan sapaamm piik nba din jii bi fita ki saa a bin saa took pooyookir sɔrɔ nee.

² Sapaamm maŋ ni baŋŋmu din tee jatite, ki baŋŋmu mun din tee subindamm.

³ Sapaanjata na din jii bi fita, ŋaan ki jii kpan ki guun bi mɔŋi,

⁴ ŋaan ki sapaansubindamm na ŋanin din jii kpan ki liak liak salena ni ki dia pukin bi fita po.

⁵ Pooyookir sɔrɔ maŋ din ki baar yiami, ki gɔɔn tan soor sapaamm na kura, ki bi gɔɔn.

⁶ “Ki tansuunii ki bi tan gbat wiyikiŋ a ‘Gotir, pooyookir sɔrɔ nee baat na. Nyin man ki tin tookɔ man.’

⁷ Ki sapaamm piik na kura fiir ki ŋak ŋak bi fita na.

⁸ Ŋanne ki sapaanjata na miar subindamm na a ‘I kan turit i kpan na waamii? kimaan ti fita na loon lin kpeene.’

⁹ Ki subindamm na jiin a ‘Aaii, ti yara mun kan jaŋ timm nan yimmi. I saa man binba kɔi kpan boor ni, ki saa daa i mɔŋ yara.’

¹⁰ Sapaanjata na nba din yaat ki saan a bin saa daa kpan yoonba, ki pooyookir sɔrɔ na dɔkit. Subindamm baŋŋmu na nba din teen siir na din wei pooyookir sɔrɔ maŋe, ki saan poochianu ŋaak na ni ki kɔɔ diiuk ni, ŋaan ki bi loon gann ki kpar.

¹¹ “Li poorpo ki sapaanjata na nba din tan jen yoonba, ki bi baar ki tan see tammɔb na boor ki yi a ‘Ti yomdaanɔ, ti yomdaanɔ, lootir gann ki tin kɔɔ.’

¹² Ŋaan pooyookir sɔrɔ na jiin ki betib a ‘Barmɔniie ki n beeri na, n ki miini.’ ”

¹³ Ki Yisa bia din betib a “I mi man, kimaan i ki mi daar nba amii yoo nba ki min i Yomdaanɔ tan sa jeni.”

Daaba banntaa po

¹⁴ “Yennu naan labaar bia tan sii tee kaman nan ŋaadaansɔɔ nba din lor a wun saan sɔnu, ŋaan yiin u daaba ki tan chentib likirii a bin gaar kii kpentir nee.

¹⁵ U din tur sinsinn yoo na pɔŋ tusa ŋaŋŋmu, ki tur wunba paa na pɔŋ tusa ŋannlee, ki tur wunba joont na pɔŋ tusyenn. U din tur sɔɔ kur kaman nan wa mi li yɔɔ kotir nba tee biaŋinbae, ŋaan yaat ki saan.

¹⁶ Ki wunba din gaar pɔŋ tusa ŋaŋŋmu na nyii nan u likirii yiama ki piin kpinkpouŋ, ki la nyɔɔt pɔŋ tusa ŋaŋŋmu ki pukin li paak biak.

¹⁷ Nnee ki wunba mun bia din gaar pɔŋ tusa ŋannlee na mun din nyii ki kpentir ki la nyɔɔt pɔŋ tusa ŋannlee ki pukin li paak.

¹⁸ Ŋaan wunba din gaar pɔŋ tusyenn na ŋanin din nyiie, ki gbiir bootuk, ki pii u yomdaanɔ likirii na leŋ, ŋaan ŋmat.

¹⁹ “Li din yukir bonchiann, ki ŋaadaanɔ maŋ din tan jen, ki yiin u daaba na, a wun kan bi likirii maŋ, ki la ba la nyɔɔt biaŋinba.

²⁰ Ki wunba din gaar pɔŋ tusa ŋaŋŋmu na nba kɔɔ yoonba, ki u jii pɔŋ tusa ŋaŋŋmu leer na ki pukin tur u yomdaanɔ, ŋaan yet a ‘N yomdaanɔ, a din turin pɔŋ tusa ŋaŋŋmue, ŋaan gotir n mun bia la nyɔɔt pɔŋ tusa ŋaŋŋmu.’

²¹ Ki u yomdaanɔ na betɔ a ‘N faan, a tee daabiŋanɔe, ki bia tuun fanu; fa dia waaminna fanu biaŋinba na, li paak, n sa jii saamewa ki teen a nuu ni. Parpeenn nba ki n mɔk na, li ji tee min nan fin yare.’

²² “Ki wunba mun din gaar pɔŋ tusa ŋannlee na kɔɔ ki baar u yomdaanɔ na boor, ki tan yetɔ a ‘N yomdaanɔ, gotir, a din turin pɔŋ tusa ŋannlee-e, ŋaan n mun bia kpent ki la nyɔɔt pɔŋ tusa ŋannlee.’

²³ Ki u yomdaanɔ yetɔ a ‘N faan, a tee daabiŋanɔe, ki bia tuun fanu; fa dia waaminna fanu biaŋinba na, li paak, n sa jii saamewa ki teen a nuu ni. Parpeenn nba ki n mɔk na, li ji tee min nan fin yare.’

²⁴ “Ŋanne ki wunba mun din gaar pɔŋ tusyenn na ŋanin kɔɔ ki baar u yomdaanɔ boor ki tan yetɔ a ‘N yomdaanɔ, n mi nan a tuu tee wunba di fobite, kimaan linba ki a ki dii fara li paak na, fin ŋanin loon ŋaninbae ki fii di; siaminba ki a lek ki buri ŋaan fin ŋanin tuu jaan leŋe.

²⁵ Li paak, min daan tiina jaŋmaaniie, ki jii a pɔŋ tusyenn na ki gbiir ki pii tiŋ ni. Li paak, ŋannii na! gaat a bont.’

²⁶ “Ŋanne ki u yomdaanɔ na betɔ a ‘Fin daabiyann na, a tee gbannyakdaanɔe; a poŋ mi nan n tuu tee wunba di linba ki n ki dii fara li paake, ki bia mi nan n jaan siaminba ki n ki bure,

²⁷ ki bee ki a ki kpent niib n likirii maŋ ki bin tan paanin paatiri? Ma bo tan jen na n bo sa la n bont ki nyɔɔt-ii paa li paaki.

²⁸ Li paak, gaat likirii maŋ u boor ni man, ki pukin wunba mɔk pɔŋ tusa piik na;

²⁹ kimaan wunba kur mɔk bona, bi sa pukinɔ ki wun mɔkit bonchiann; ŋaan wunba kɔŋ bont, bi bia sa tont bonmintik nba ki u mɔk na.

³⁰ Ŋaan jayann na ŋanin, jiimɔ man kii nyi ki saa lu-u nanyer po bunbɔnn ni. Leŋewa ki u tan sii fabin mɔn ki junt u nyana.’ ”

Yisa nba sa bu niib buut biaŋinba

³¹ “Tɔn, min nisaarik Bik-i taŋŋi jen nan n paŋ nan malakanba kura, n tan sa kar n naangbouŋ paak, ki la baakchiauŋ,

³² ki tan lakin tingbouŋ na nibooru kur n tɔɔnn po; ki n tan sa bɔkitib kaman nan pekpaarik nba tuu bɔkit pei nan buunii biaŋinba na.

³³ N tan sa jii pei ki semm n nuudiitu po, ŋaan jii buunii na mun ki semm n nuugaŋ po.

³⁴ Ki min, Bat na, sa yet binba see n nuudiitu po na a ‘Yimm nba ki n Baa Yennu senn mɔsonŋann i paak na, i saana man ki tan kɔɔ naan nba ki Yennu din ŋamm ki guuni dunia piinu niwa na,

³⁵ kimaan kon din mɔkin ki i dinnin; ki nyunyukiru din mɔkin ki i turin nyun. N din tee saamɔe ŋaan ki i gaarin saauŋ i ŋei ni.

³⁶ N din somm yanne ki i gbabinin; ki n din yiar ki i sommin; ki n din kɔɔ dansarik, ki i yɔɔ gɔntin.’

³⁷ “Ki yentina na tan sa jiin ki boin a ‘Ti Yomdaanɔ, bee yooe ki ti din la-a ki kon mɔka ki ti dinnani? amii bee yooe ki nyunyukiru din mɔka ki ti tura nyumi?

³⁸ amii bee yooe ki ti din la-a ki a tee saamɔ ki ti gaara saauŋ ti ŋei ni? amii ki a somm yann ki ti gbabinani?

³⁹ amii bee daare ki ti din la ki a yiar ki ti sommani? amii ki a kɔɔ dansarik, ki ti baar ki tan gɔnani?’

⁴⁰ Ki min Bat na mun tan sa jiin ki betib a ‘Barmɔniie ki n beeri na, ya din tun linba ki tur wunba tee tatimɔɔ n naa waas na sinsuuk ni na yenɔkɔɔ, i din tuun ki teen mine.’

⁴¹ “Li poorpo, n tan sa jiant ki bet binba see n nuugaŋ po na a ‘Yimm nibiit nba ŋan nan tubdatu na, seetir nna man. I saa man ki saa kɔɔ muu nba di ki kaa kpeenu nba ki Yennu din ŋamm ki guun Sintaanii nan u niib na ni,

⁴² kimaan kon din mɔkin, ŋaan ki i minnin jeet; ki nyunyukiru din mɔkin, ŋaan ki i minnin nyun.

⁴³ N din tee saamɔe, ki i ki sak yin gaarin saauŋ i ŋei ni; ki n din tan somm yann, ŋaan ki i minnin tiat; ki n din tan yiar ki i ki sommin, ki n bia tan kɔɔ dansarik, ki i ki gɔnin.’

⁴⁴ “Li yoo ki bi mun tan sa ŋmat ki boin a ‘Ti Yomdaanɔ, bee yooe ki ti din la-a ki kon mɔka, amii nyunyukiru mɔka, amii ki a tee saamɔ, amii ki a somm yann, amii ki a yiar, amii ki a kɔɔ dansarik, ŋaan ki ti yêt a sommiri?’

⁴⁵ Li yoo maŋe ki n sa jiin ki betib a ‘Barmɔniie ki n beeri na, ya din yêt nan yin tun linba ki tur wunba tee tatimɔɔ n naa waas na sinsuuk ni na yenɔkɔɔ, i din yêt nan yin tun ki tur mine.’

⁴⁶ Binba na tan sa saan ki saa la tubdatu nba kaa gbennu na, ŋaan ki yentina na-n mun saan kii sii be manfoor nba kaa gbennu ni.”