Matiu 20 - Yennu Gbounpaauŋ Mɔɔr

Toontunna barjouk

¹ “Kimaan Yennu naan tee kaman nan ŋaadaanɔ nba din nyii sanyapob ni ki loon niib a wun jiib ki bin ko u kpaab nee.

² Ki bi dii li daauk ki u sak a u sa pab li daar paauk a panyent daar; ŋanne ki bi din doo ki saa jak konu.

³ La din tan baar kut munnyia yoonba, ki ŋaadaanɔ maŋ fiir saan daak ni, ki saa la siab ki bi see ki ki tuun siari.

⁴ Ki u betib a ‘I do man n kpaab ni kii sai ko, ki n pai linba jaŋ.’

⁵ Ki bi din doo. La din tan baar kut piik nan munnlee yoonba, ki u bia ŋmat teen nna; ki kut munntaa yoo na, ki u bia ŋmat ki bia teen nna.

⁶ La din tan baar kut muŋŋmu yoonba, ki u bia ŋmat saan ki saa la siab ki bi lakin see, ki u boib a ‘Bee ki i see nna yann damunn ki ki tuun siari?’

⁷ Ki bi jiin a ‘Sɔɔ ki jiit toonni.’ Ŋanne ki u betib a ‘I mun-ii do man n kpaab na ni kii sai ko.’

⁸ “La din tan bɔnt yoonba, ki ŋaadaanɔ na bet u ŋaatoontunna saakɔɔ a ‘I saa ki saa yiin kpaara maŋ na, ki tan pab. A yaa a pab yoonba, fan piin kii pa binba bo joont ki baar na, ki tan joont binba bo dɔŋ baar na panu.’

⁹ Ki u toontunna saakɔɔ maŋ piin ki pa binba bo joont ki baar na, panyent-yent.

¹⁰ Li paak, la din tan baar binba bo baar sanyapob niwa paak na, ki bi dukii mi a bi yar sii yabe, ŋaan ki u pab panyent-yent mun biak.

¹¹ Ba din gaar bi likirii gbenn yoonba, ki bi piin ki burin sukii ŋaadaanɔ na,

¹² ki yeen a ‘Gotir, binba joont ki doo kut muŋŋmu na koo yoo waaminnae, ŋaan ki timm nba ŋanin la fara sanyiɔk niwa, ki yennu faat bonchiann na, ŋaan ki timm nan ŋamm tan lakin gaar payouŋ kuukɔɔ.’

¹³ “Ŋanne ki ŋaadaanɔ na yet bi yenɔ a ‘N yɔɔk, gbiintir, n ki ŋmabaani, kimaan ti bo dii daauko ki a sak panyent daar.

¹⁴ Li paak, jiin a yar kii saa. Mine loon ki n pa fin nan binba bo joont baar maŋ yomm.

¹⁵ N ki mɔk yaak a n jii n likirii ki tun ma loon biaŋinba-aa? amii a mɔk funfunn nan ma ki wuun na paakee?’ ”

¹⁶ Yisa nba din yin barjouk na ki gbenn na poorpoe, ki u ji betib a “Li paak, binba dɔŋ tɔɔnn tan sa jir poor, ki binba joont poor mun bia tan sa dɔŋ tɔɔnn.”

Yisa nba ŋamm pak u kuun po taar munntaa ni

¹⁷ Yisa nba din tan doo Jerusalem na, ki u yiin u poorpoweiteeb piik nan bannlee na ki tan bɔr ki beerib a

¹⁸ “Gotir man, ti doo Jerusaleme na; ki bi tan sa jii min nisaarik Bik ki teen Yennu jiantu yudamm nan sennu wannteeb nuu ni, ki bi sa bu n buut ki yet a n ŋan nan kuume.

¹⁹ Bi tan sa jiin ki tur binba ki tee Juu teeb a bii fiakin, ki boon kpaasir, ki kpaa tabinin dapunpunn paak ki man kpo, ŋaan ki li daa ŋanntaa daar, n bia sa fiir kuun niwa.”

Jems nan Jɔɔnn naa nba din miar Yisa yudantuk

²⁰ Li yoo na ki Sebedee ŋaapoo din jii u waas bannlee Jems nan Jɔɔnn ki baar namm Yisa boor ni, ki tan gbaan u tɔɔnn ni, ŋaan miarɔ sommir po.

²¹ Ki Yisa boiɔ a “A loon bee?” Ki u jiin a “Turin mɔsonn nan n waas na yenɔ-n tan kar a diitu po, ki lɔɔ na mun-n kar a gaŋ po, yoo nba ki a tan sa di a naan na.”

²² Ki Yisa jiin betib a “I ki mi ya mei linba po. I sa fit jii jikpiatir nba ki n yaa n jii nawa-aa?” Ki bi jiin a “Ti sa fita.”

²³ Ki Yisa betib a “Tɔn, i set sa jii n jikpiatir nawa; ŋaan n ki mɔk yaak nba sa gann wunba tan sa kar n diitu po amii n niigaŋ po, kimaan n Baa Yennu mɔŋ mɔŋe gann binba tan sa kar li kinkaanii paak.”

²⁴ Yisa poorpoweiteleeb na nba din gbat nna maŋ yoonba ki bi wutoa doo bi bannlee maŋ paak.

²⁵ Ki Yisa din yiin bi kura ki lakimm u boor ni, ki tan betib a “I mɔŋ mi nan tingbouŋ na ŋaateeb yudamm dont bi mɔŋe; ki nijaana bia dia bi niib nan nunmɔnn nee;

²⁶ ŋaan yimm ŋanin, li daa tee nna kaa i sinsuuk ni. Li-i tee ki sɔɔ loon yudant i sinsuuk ni, li ŋan wun kpant tarik kii tuun kii teen i kura.

²⁷ Ki li-i bia tee ki sɔɔ loon wun tan gar sinsinni, wun kpant i daabir,

²⁸ kaman nan min nisaarik Bik nba tee biaŋinba na, kimaan n ki baar ma niib-n tun turin kaa, ŋaan n baar ma n tun ki tur niibe, ki bia kpo a n te ki niib bonchiann-n la tinnu.”

Yisa nba din nyɔɔnt jɔɔnii bannlee biaŋinba

²⁹ Tɔn, ba din tan nyi Jeriko yoonba ki niburchiauŋ waa Yisa poorpo.

³⁰ Ki jɔɔnii bannlee din kar sanjokpiŋ ki gbat a Yisa baat a wun tan gar leŋ. Ki bi piin ki yikin sanpaapowa a “Ti Yomdaanɔ nba tee David yaaboonn, tinimit ninbaauk!”

³¹ Ŋanne ki niburchiauŋ na din tian bi paak a bin ŋmin. Ŋaan ki bi ŋamm yikin sanpaapowa a “David yaaboonn, tinimit ninbaauk.”

³² Ki Yisa din set ŋaan yiimm ki tan boib a “I loon ki n tun bee ki turiini?”

³³ Ki bi jiinɔ a “Ti Yomdaanɔ, ti loon ki a nyɔɔnt ti ninbina nee.”

³⁴ Ki ninbaauk din soorɔ, ki u sii sii bi ninbina maŋ, ki li nyɔɔnt nyɔɔnt, ki bi ji din waau ki saa.