Matiu 19 - Yennu Gbounpaauŋ Mɔɔr

Pooyêtu labaar

¹ Yisa nba pak mɔbona na ki gbenn yoonba, ki u nyii Galilee ki saan Judea tiŋ nba be Jɔɔdann mɔk-pootir.

² Ki niburchiauŋ waa u poorpo, ki u te ki binba yiar na kura paak leŋ.

³ Ki Farisiinba siab baar u boor ni ki loon bin jammɔ, ki boiɔ a “Yennu sennu chabit nan jɔɔ-n yêt u ŋaapoo yannii?”

⁴ Ki u jiin a “I ki karin Yennu gbouŋ nba yet biaŋinba na-aa? a ‘Piinu niwa, Yennu din nan poo nan jɔɔe,

⁵ ŋaan din yet a, Linba na paak ki jɔɔ nan u ŋaapoo tuu sa nyik bi damm, ŋaan kɔɔn leeb, ki bi niib bannlee-n taan teen gbananyenɔkɔɔ.’

⁶ Li paak, li-i tee nna, bi ji ki tee niib bannlee kaa, ŋaan bi tee niyenɔkɔɔe. Li paak, binba ki Yennu jii ki taan nan leeb, nisaarik-ii mi ki wun bɔkitib.”

⁷ Ki Farisiinba na boiɔ a “Bee ki Moses ŋanin din tur yaak u sennu na ni, nan jɔɔ sa fit tur u ŋaapoo pooyêtu gbouŋ ŋaan yêtɔɔ?”

⁸ Ki Yisa jiin betib a “I tubkangbatin paake te ki Moses din tur yaak a yii yêen i ŋaapoob, ŋaan piinu ni li din ki tee nna kaa.

⁹ Barmɔniie ki n beeri, wunba yêt u ŋaapoo, ki li ki tee u tun bonchonchonn toonn kaa, ŋaan kɔɔn pooganɔ, u tun bonchonchonn toonna; ki wunba mun kɔɔn poo nba ki u sɔrɔ yêtɔ na, u mun tun bonchonchonn toonna.”

¹⁰ Ki Yisa poorpoweiteeb yetɔ a “Li-i tee nnaie jɔɔ nan u ŋaapoo sinsuuk ni, ŋann ŋanin jɔɔ-i kii kɔɔn poo, li sɔ.”

¹¹ Ki u yetib a “Sɔɔ kur kan fit dia wannu maŋi; binba ki Yennu turib li yaak na, ŋamm kuukɔɔe sa fit diar.

¹² Kimaan bona bonchianne te ki jasiab ki kɔɔnt poobi; bi tuu mar siab, ki bi ki tee jabi; siab mun, niibe tuu teemm jatɔɔka; ki siab mun, Yennu naan paake tuu te bin yêt poo kɔɔnu; ŋaan wunba sa fit dia wannu maŋ, wun diar.”

Yisa nba din gaar waas biaŋinba

¹³ Tɔn, ki nisiab tan baar nan bi waas Yisa boor ni, a wun yii u nii bi paak ki miar Yennu bi paak; ŋaan ki u poorpoweiteeb tian niib maŋ paak.

¹⁴ Ki Yisa yet a “Ŋaant man ki waas maŋ-ii baat n boor ni na, ki daa tiammi, kimaan bi boorue yen Yennu naan,”

¹⁵ ŋaan jii u nii ki yii yii bi paak, ŋaan ji seet saan.

Naasin-mɔkitɔɔ labaar

¹⁶ Li yoo maŋ ki naasimɔ nna baar Yisa boor ni ki tan boiɔ a “Wanntɔɔ, toonŋanlannpoe ki n sa tummi, ki la manfoor nba kaa gbennu?”

¹⁷ Ki Yisa jiinɔ a “Bee ki a boin toonŋann po? Niyenɔ kuukɔɔe tee niŋanɔ; ŋaan li-i tee ki a loon manfoor nba kaa gbennu, fii dia Yennu sennu na.”

¹⁸ Ki naasimɔ na boi Yisa a “Sennlanupoe?” Ki u betɔ a “Daa kpi nirɔ; daa tuun bonchonchonn toona; daa jaami; daa tee faak siara;

¹⁹ i teen a baa nan a naa nibaakir; ŋaan kii loon a lɔɔ kaman nan fa loon a mɔŋ biaŋinba na.”

²⁰ Ki naasimɔ na betɔ a “N poŋ wei sennu na kura. Lannpoe ki n bia sa tun pukin linba na paaki?”

²¹ Ki Yisa betɔ a “Li-i tee ki a loon ki a binbeŋ-ii tee fanu nan barmɔnii, fii saa ki saa kɔi fa mɔk linba ki jii li likirii maŋ ki tur talasdamm, ki a tan sa la mɔkint sanpaapo; li poorpo ki a jenna kii waan.”

²² Ki naasimɔ na nba gbat nna yoonba, ki u seet nan parbiir, kimaan u din mɔk mɔkint bonchiann.

²³ Ŋanne ki Yisa ji yet u poorpoweiteeb a “Barmɔniie ki n beeri na, li sii paar bonchiann nan mɔkitɔɔ-n kɔɔ Yennu naan ni.

²⁴ N bia yaa n beti leere nan li paar nan mɔkitɔɔ-n kɔɔ Yennu naan ni kaman nan lagumii nba kan fit kɔɔ kparpeenu miar ni na.”

²⁵ Ki u poorpoweiteeb nba gbat nna maŋ, ki li yaar ŋaan litib bonchiann, ki bi piin ki boi bi leeb a “Li-i tee nnaie, ŋmee ji sa fit ki la tinnu?”

²⁶ Ŋanne ki Yisa gokit ki gotib ŋaan yet a “Linba na paar ki tur nisaarike, ŋaan siar ki paar Yennu boor ni.”

²⁷ Li yoo na ki Piita yetɔ a “Gotir, timm ŋanin nyik ti bonsiar kura ŋaan waa-a. Ti nyɔɔt tan sii tee bee?”

²⁸ Ŋanne ki Yisa jiin ki betib a “Barmɔniie ki n beeri na, yoo nba ki min nisaarik Bik na tan kar n naangbant paak nan paŋ bonchiann dunia paann na ni, yimm nba tee n poorpoweiteeb na mun tan sa kar naangbant piik nan ŋannlee paake, kii bu Israel teeb booru piik nan bannlee na buut.

²⁹ Ki wunba kur nyik u ŋaak, amii u yɔɔrib, amii u waarii, amii u baa, amii u naa, amii u waas, amii u kpaant, n sann paak, u tan sa la bona booru booru kobik, ki bia la manfoor nba kaa gbennu.

³⁰ Ŋaan niib bonchiann nba dɔŋ tɔɔnn mɔtana na, bi tan sa jir poora; ki bonchiann nba mun bia joont poor mɔtana na tan sa dɔŋ gar tɔɔnn na.”