Matiu 16 - Yennu Gbounpaauŋ Mɔɔr

Ba loon bakitnauŋ nyinn biaŋinba

¹ Ŋanne ki Farisiinba nan Sajusiinba baar Yisa boor ni. Ba loon ki bin jammɔ na paak, ki bi yetɔ a wun teen bakitnauŋ nyinn ki lin wann nan Yennu set mi u po.

² Ki u jiin a “Dajoomaasir, li-i tee ki sanpagbant mɔn, i tuu yet a ‘Wonn ŋanin, daar won sii yeen.’

³ A ŋaan li-i tee ki sanpagbant mɔn ŋaan tan bɔnt sanyiɔk ni, i tuu yet a ‘Dinna ŋanin, saak sa baawa.’ I fit bukitir sanpagbant nyina, ŋaan kan fit bukit mɔtana yoo na-aa?

⁴ Mɔtana niib, biitdamm nba ki waa Yennu na loon ki bin la bakitnauŋ nyina; ŋaan n kan mi tun nyinsiar ki turibi; Yennu sɔkinii Jona nyinbooru na kuukɔɔe ki n sa wannib.” U yet nnee, ŋaan seet ki nyikib.

Farisiinba nan Sajusiinba datinii po

⁵ Tɔn, Yisa nan u poorpoweiteeb din saa poot mɔkgbeŋŋir pootir na, ki u poorpoweiteeb na ji tiar nan bi ki jii boroboro.

⁶ Ŋanne ki u betib a “I mi man Farisiinba nan Sajusiinba datinii na po.”

⁷ Ki bi ji piin ki beer bi leeb a “Ta ki baar nan boroboro na paake te ki u yeen nna maŋ.”

⁸ Ŋanne ki u bann ba yeen linba maŋ, ki boib a “Yimm yadakanpɔɔna damm na, bee ki i beer i leeb nan ya ki baar nan boroboro na paake?

⁹ I bia lek daa ki bann li paakii? I ki tian ma daan jii boroboro kuna ŋaŋŋmu ki dinn jab tusa ŋaŋŋmu na-aa? Kpanchubit ŋaŋŋae ki i daan lakin jeet nba tenn na?

¹⁰ Ki i bia ki tian jab tusa ŋanna nba ki n daan jii boroboro kuna ŋannlore dinnib na-aa? I daan lakin jeet nba tenn na ki gbeen chubit ŋaŋŋae?

¹¹ Bee ki i ki bann nan li ki tee boroboro po kaa ki n piaki? I mi man Farisiinba nan Sajusiinba datinii na po.”

¹² Ŋanne ki u poorpoweiteeb ji bann nan li ki tee datinmɔŋ po kaa ki u piak a bii guu bi mɔŋi; ŋaan Farisiinba nan Sajusiinba wannu na paake.

Piita nba din pak barjaann ki jiin Yisa po biaŋinba

¹³ Ki Yisa tan baar Siisarea Filipi tiŋ ni yoonba, ki u boi u poorpoweiteeb a “Niib yaa a min nisaarik Bik tee ŋmee?”

¹⁴ Ŋanne ki bi jiin a “Siab yaa a a tee Jɔɔnn wunba daan wuur niib Yennu nyunwuru nae, ki siab yaa a a tee Elaijae, ki siab yaa a a tee Jeremayae amii Yennu sɔkiniisɔɔ nba din be yaayoo niewa na.”

¹⁵ Ki u ji boib a “Ki yimm muni, i yaa a n tee ŋmee?”

¹⁶ Ŋanne ki Simon Piita jiin yetɔ a “Fine tee manfodaanɔ Yennu Bija Masia, wunba ki u gannɔ na.”

¹⁷ Ki Yisa betɔ a “Fin Simon, wunba tee Jona bija na, parpeenn be a paak, kimaan nisaarik kaa fiit barii na wannani, ŋaan n Baa Yennu wunba be sanpaapo nee fiit ki wanna.

¹⁸ Fin Piita, min ŋanin beerae, a tee tanne; ki tanpiiuk na paake ki n sa jii n niib ki senn; ki kuun kan mi fit nyannibi.

¹⁹ N sa tura Yennu naan tammɔb gann peenii; li paak, linba ki a tan lor ki yaa a li kɔɔ tingbouŋ na ni, ŋanne mun bia poŋ kɔɔ Yendɔuŋ ni; ki linba ki a bia yaa a li ki kɔɔ, ŋanne mun bia poŋ ki kɔɔ Yendɔuŋ ni.”

²⁰ Ŋanne ki Yisa kpaan u poorpoweiteeb na a bii mi ki bin bet sɔɔ nan ŋɔɔe tee Yennu Niganntɔɔ Masia na.

Yisa nba din pak u fardinu po biaŋinba

²¹ La din nyii li yoo maŋ ki jii saa, ki Yisa piin ki beer u poorpoweiteeb a “See ki n fabir ki saan Jerusalem, ŋaan ti tiŋ ni saakab, nan Yennu jiantu yudamm, nan sennu wannteeb sa dinin fara bonchiann, ki bia tan sa kpima; ŋaan daa ŋanntaa daar ki Yennu sa fiinin kuun ni.”

²² Ki Piita yiinɔ kpiŋ po ki tan kpaanɔ a “N Yomdaanɔ, Yennu-n bɔr bonbiir na ki li daa baat a paaki.”

²³ Ŋanne ki Yisa jiant bet Piita a “Sintaanii na, seetir nna na. A tee tangbiatkare n sɔnu ni, kimaan a ki dukii linba tee Yennu yar po, ŋaan dukii linba tee nisaarii yar po,”

²⁴ ŋaan bet u poorpoweiteeb a “Wunba-i loon wun wein, see ki u likin u saaŋmaŋ ki jii u kuun dapunpunn kii waan,

²⁵ kimaan wunba ki saak wun jii u manfoor ki turin, ŋɔɔe tan sa kɔŋŋir, ŋaan wunba likin u saaŋmaŋ n paak, ŋɔɔe tan sa la u manfoor nan barmɔnii.

²⁶ Li-i tee ki nirɔ yen tingbouŋ na mɔkint kura, ŋaan tan kɔŋ u manfoor, nyɔlantpoe ki u sa la? Sɔɔ kan fit jii siar ki daa u manfoori.

²⁷ Kimaan min nisaarik Bik tan sa jen nan n Baa Yennu paŋ, nan n malakanba, ki li yoo maŋ n tan sa pa sɔɔ kur kaman nan u toona nba tee biaŋinba.

²⁸ Barmɔniie ki n beeri na, siab be nna, ki daa kan kpo see ki bi tan la min nisaarik Bik naan dinu baaru.”