Matiu 15 - Yennu Gbounpaauŋ Mɔɔr

Bi yejamm kaar labaar

¹ Li yoo na ki Farisiinba nan sennu wannteeb nyii Jerusalem ki baar tan boi Yisa a

² “Bee ki a poorpoweiteeb ki waa ti yejamm kaari? Kimaan bi ki waa ti kaar nba yaa a ti tuu nit ti niiwa ŋaan di na.”

³ Ki u mun boib a “Bee ki i mun ki sak Yennu sennu weiu ŋaan waa i yejamm kaari?

⁴ Yennue din senn u sennu a ‘Turin a baa nan a naa nibaakir; ŋaan wunba tan sukir u naa amii u baa, a bin kpiu;’

⁵ ŋaan yimm ŋanin yaa a ‘Nirɔ-i bet u naa amii u baa a Ma bo sa turi linba na, li kpant Yennu yara; li ki tee miar kaa nan wun tur u damm siari.’

⁶ Ya tuun biaŋinba na, i dia Yennu sennu yanne, kimaan i yejamm kaar maŋ weiu paak.

⁷ Yimm kpinkpannii damm na, Yennu sɔkinii Aisaya nba din pak i po biaŋinba na set tee barmɔniie. U din yet a Yennu yet a

⁸ ‘Niib na teenin nibaakir mɔi nie, ŋaan bi para fɔk nanin saama.

⁹ Bi jiantirin yanne, kimaan bi dia nisaarii kaae ki want niib kaman nan li set tee min Yennu sennue na.’ ”

Linba be nisaarik par ni labaar

¹⁰ Ŋanne ki Yisa yiin nibur na ki tan yetib a “Gbiintir man, ki bann linba ki n yaa n yeti na paak;

¹¹ linba kɔɔ nisaarik mɔb ni kan fit teenɔ jakint u par ni; ŋaan linba be nisaarik par ni ki nyi u mɔb nie teenɔ jakint.”

¹² Ŋanne ki u poorpoweiteeb baar u boor ni ki tan boiɔ a “A mi nan Farisiinba na nba gbat a maan maŋ na, bi wutoa doo a paakawa-aa?”

¹³ Ki u jiin betib a “Tiik nba kur ki n Baa Yennu nba be sanpaapo na ki wuu, see ki bi tan ŋabire ki lu.

¹⁴ Li paak, ŋaantib man ki bii saa, kimaan bi tee kaman nan jɔɔnii nee ki daar bi jɔɔnlei; ki li-i tee ki jɔɔŋ daar u lɔɔ, see ki bi kura baa bootuk ni.”

¹⁵ Ŋanne ki Piita jiin ki betɔ a “Wantit barjouk na paak.”

¹⁶ Ki Yisa jiin a “I mun bia lek daa ki bant n maan na paakii?

¹⁷ I ki mi nan linba kɔɔ mɔb ni, li yaa lin sik poor nie, ki kpant bint ki nyii-ii?

¹⁸ Ŋaan barbiit nba ki nisaarik piak u mɔb ni, li nyii u par nie, ŋann mune teenɔ jakint.

¹⁹ Kimaan nirɔ par nie ki dudukbiit nyi, nan nikpinu, nan bonchonchonn toona, nan nanyukin, nan faak siara, nan sanjaauŋ.

²⁰ Linba na nbae teen nisaarik jakint, ŋaan niijakina dinu kan fit teen nirɔ jakinti.”

Poosɔɔ nba din teen Yisa yada biaŋinba

²¹ Tɔn, ki Yisa nyii leŋ ki saan Taya nan Saidon bɔkir po.

²² Ŋanne ki Kenann tiŋ ni poosɔɔ nna mun din be bɔkir maŋ po, ki tan baar Yisa boor ni, ki yeen a “N Yomdaanɔ, David yaaboonn, tinimin ninbaauk! Narinbiiuk be n bipoo ni, ki mukisɔ bonchiann.”

²³ Ki Yisa din ki jiin siari; ŋaan ki u poorpoweiteeb betɔ a wun ber poo na, kimaan u mɔk fuut.

²⁴ Ŋanne ki Yisa jiin ki betib a “Israel teeb nba tee kaman nan pei nba bot na, ŋamm kuukɔɔe ki Yennu tumin a man saan bi boor ni.”

²⁵ Ki poo maŋ baar ki tan gbaan Yisa tɔɔnn ni, ŋaan yetɔ a “N Yomdaanɔ, sommitin.”

²⁶ Ki Yisa jiin betɔ a “Li ki ŋan ki nirɔ-n jii waas jeet ki tur bɔi.”

²⁷ Ŋanne ki poo na jiin a “N Yomdaanɔ, li set tee mɔniie; ŋaan bɔi nba dɔɔ bi daanɔ saaŋmanii boor ki kɔŋŋit jebura nba baa tiŋ ni ki tɔkii dii.”

²⁸ Ŋanne ki Yisa ji yetɔ a “N diamm, a teenin yada bonchiann. Linba ki a loon na, lin tun nna ki tura.” Ki u bipoo maŋ la laafia li taakpaak ni.

Yisa nba din te ki baatib bonchiann paak biaŋinba

²⁹ Li poorpoe ki Yisa nyii leŋ ki gar Galilee mɔkgbeŋŋir kpiŋ, ki saa doo kar jɔɔr paak.

³⁰ Ki niburchiauŋ baar u boor; ki bi baar nan wɔbii, nan jɔɔnii, nan mui, nan dianii, nan binba yiar yiarbooru booru kura, ki tan birib u tɔɔnn ni; ki u te ki bi kura paak.

³¹ Ki nibur na nba la ki mui piak, ki dianii paak, ki wɔbii somm, ki jɔɔnii laat na; ki li yaar ŋaan litib, ki bi piak dont ŋamm Israel teeb yabint Yennu na sann.

Yisa nba dinn jab tusa ŋanna biaŋinba

³² Ki Yisa yiin u poorpoweiteeb ki tan yetib a “Ninbaauk mɔkin nan niib na, kimaan daa ŋanntaae na ki bi be n boor nna, ŋaan ki mɔk jeet ki di. N ki loon man kunnib nan komi, ki bi tan sa mann fib nan kon.”

³³ Ki u poorpoweiteeb boiɔ a “Lee ki ti sa la jeet muuk na ni ki tur niburchiauŋ na ki bin di ki gboo? kimaan ba yab bonchiann biaŋinba na.”

³⁴ Ki u boib a “I mɔk boroboro kuna ŋaŋŋae?” Ki bi jiin a “Ŋannlore, nan janbis waaminna.”

³⁵ Ki u bet niib na a bin kar tiŋ ni;

³⁶ ŋaan jii boroboro kuna ŋannlore nan janbis na, ki tur Yennu niipoouk li paak, ŋaan ŋmit ŋmit tur u poorpoweiteeb, ki bi jii tor tor niib maŋ.

³⁷ Ki niib na kur dii ki gboo ŋaan ki li tenn; ki u poorpoweiteeb lakin jeet nba tenn na, ki li gbee kpanchubit ŋannlore.

³⁸ Ki niib nba dii maŋ din tee jab tusa ŋanna, ki poob nan waas kann ki pukin leŋi.

³⁹ Li poorpo ki Yisa chab niib maŋ, ŋaan kɔɔ burgbetir ni ki poot kɔɔ Magadan tingbouŋ ni.