Matiu 10 - Yennu Gbounpaauŋ Mɔɔr

Yisa poorpoweiteeb piik nan bannlee labaar

¹ Ki Yisa din tan yiin u poorpoweiteeb piik nan bannlee na, ki tan chabib yikoo a bii nyint narinbiit niib ni; ŋaan ki te ki yiarboorii boorii damm kur-n paak, nan binba ki yiarbiit diab na kura.

² U poorpoweiteeb piik nan bannlee maŋ sanae na: Simon, wunba sann bia din yi Piita na; nan u waarɔ Andru; nan Jems nan u waarɔ Jɔɔnn, binba din tee Sebedee waas na;

³ nan Filip nan Batolomiu; nan Tomas, nan Matiu wunba din tee lampogaartɔɔ na; nan Jems wunba din tee Alfeus bik na, nan Tadeus;

⁴ nan Simon wunba din loon ŋamm Juu teeb-ii yen bi mɔŋ na; nan Judas Iskariot wunba din tan nyii Yisa poor na.

Yisa nba din tun u poorpoweiteeb maŋ biaŋinba

⁵ Ki Yisa din tun u poorpoweiteeb piik nan bannlee maŋ, ŋaan kpaamm a bii mi ki bin saan binba ki tee ŋamm Israel teeb na boor ni, a bii mi ki bin kɔɔ Samaria teeb doi ni,

⁶ a ŋaan bin saan Israel teeb nba tee kaman nan pei nba bot na boor ni kuukɔɔe;

⁷ ŋaan yetib a “Ya saa na, yii mɔɔntir Yennu naan barŋanii, kii yeen a ‘Yennu naan dinu per na,’

⁸ ki te ki baatib-n paak, kii fiint kpeemm, ki bia te ki gbaata paak, kii bia kii nyint narinbiit niib ni. I gaar yanne, i mun-ii bia kii teen man yann.

⁹ I daa jikit likirii. I mi man ki yin jii kobu gbaa ki teen i likibɔɔrii ni.

¹⁰ I mi man ki yin jii paka ki saan i sɔnu maŋ; amii liata ŋannlelee, amii ki pir taasaati, amii kii dia patdiakai; kimaan li ŋan ki toontunnɔ-n di u toona ni.

¹¹ “Ŋaan digbangbeŋŋa amii digbanbis nbae ni ki i sa kɔɔ, yin boi ki la popeendaanɔ ŋaaka, ki kɔɔ kii be leŋ nan i fiiru daar.

¹² Ki yoo nba ki i yaa i kɔɔ ŋaak nba ni, yin foont ŋaak maŋ ni teeb fanu.

¹³ Ŋaak maŋ teeb-i tee niburchimm, i parmaasir-n biar ŋaak maŋ teeb paak; ŋaan niburchimm-i kaa leŋi, i parmaasir maŋ bia sa jen i paak na.

¹⁴ Wunba sa yêt i gaaru ki bia yêt wun gbat i barŋanii mɔɔntii maŋi, yoo nba ki i nyii ŋaak maŋ ni amii doo maŋ ni, yin pit pit i taapant ni tant ki lu bi doo ni.

¹⁵ Barmɔniie ki n beeri na, daar nba ki Yennu tan sa bu niib buut na, doo maŋ niib tubdatu tan sa gar Sodom teeb nan Gomora teeb yara.

Fara baaru labaar

¹⁶ “Gotir man, n tuumi ki i sii tee kaman nan pei nba be kinkata sinsuuk ni. Yii sub man kaman nan walabirii na, ŋaan kii be soonna kaman nan ŋmana na.

¹⁷ I mi man niib po, kimaan bi tan sa soori saan nani barbuteeb boor ni, ki bia booi bi jiantu diit ni.

¹⁸ Bi tan sa saan nani tiŋ yudamm nan kpanbara boor ni, ki bin bu i buut, kimaan ya waan na paak; ŋaan i tan sa bet ŋamm nan binba ki tee Juu teeb na n barŋanii.

¹⁹ Ŋaan bi-i taŋŋi saan nani buut damm boor, i daa te ki li daamiini nan ya sa pak jiin biaŋinba, kimaan li yoo nee ki Yennu Seyeeŋ sa turi mɔbona nba ki i sa pak ki jiinib,

²⁰ kimaan li ki tee yimm kaa tan sa paki, ŋaan i Baa Yennu Seyeeŋe tan sii be i ni ki piak.

²¹ “Li yoo maŋ, nirɔ tuu tan sa fikis u mɔŋ mɔŋ ninja ki bin kpiu; ki baanba mun tan sa fikis bi waas ki bin kpib; ki waas mun bia tan sa kɔn nan bi damm ki chabib nan kuun.

²² Ki sɔɔ kur tan sii nami kimaan ya waan na paak; ŋaan wunba tan gubin nan fara yoo na joontu tan sa la tinnuwa.

²³ Bi-i taŋŋi mukisi digban-yenn ni, yin nyi leŋ ki lɔɔr digbanleer ni; ŋaan barmɔniie ki n beeri na, i daa kan fit ki lin ki gbenn Juu teeb digbana kuri, ki min nisaarik Bik poŋ jenna.

²⁴ “Tɔn, tumiitɔɔ ki gar u wanntɔɔ; daabir mun bia ki gar u yomdaanɔ.

²⁵ Li ŋan ki tumiitɔɔ binbeŋ-ii tee kaman nan u wanntɔɔ binbeŋ na; ki daabir binbeŋ-ii munii tee kaman nan u yomdaanɔ binbeŋ na. Bi-i taŋŋi pur ŋaadaanɔ narinbiit bat Beelsebuli, nlee ki bi ji sii yi u ŋaateebi?”

Ti sa tin ŋmee jaŋmaanii?

²⁶ “I daa tiimm jaŋmaanii, kimaan barsai kaa ki be woonin ni ki tan kan woot ki nyi paanu ni, amii ki bɔr ki tan kan nyi paanu ni.

²⁷ Linba ki n beeri bunbɔnn ni na, ŋaan nyintir man yeenin ni; ki linba ki n lɔkinii na, nyintir man paanu ni.

²⁸ I daa tiin binba sa fit kpi i gbanant, ŋaan kan fit ki kpi i sei; ŋaan i tiin man Yennu wunba sa fit ki biir i gbanant nan i sei kura muu ni na.

²⁹ Bi kɔi jinjera bannlee jenjen kuukɔɔe, ŋaan li-i kii tee ti Baa Yennu loommi, bi yenɔkɔɔ kan baa tiŋ ni.

³⁰ Yimm ŋanin, Yennu mi i yut kann.

³¹ Li paak, i daa tiin jaŋmaanii, kimaan i mɔk nyɔɔt ki gar jinjera bonchiann.

I nyint a mɔŋ paanu ni nan a tee Yisaweirɔe

³² “Wunba nyint u mɔŋ paanu ni niib boor ni nan u tee n weirɔe, nnee ki n mun tan sa nyinnɔ paanu ni n Baa Yennu nba be sanpaapo na boor ni.

³³ Wunba yaa a u ki tee n weirɔ niib ni, nnee ki n mun tan sa yet a n ki miu n Baa nba be sanpaapo na boor ni.

Bɔkitu labaar

³⁴ “I daa dukii nan n baar nan parmaasir tingbouŋ na teeb paaki; ŋaan n ki baar nan parmaasir kaa, ŋaan n baar nan bɔkitue.

³⁵ N baar ma n tan tukin bonjabike nan u baa, bonpobik nan u naa, poo nan u siponaa.

³⁶ Nirɔ mɔŋ mɔŋ ŋaateebe tan sii tee u datai.

³⁷ “Wunba loon u naa amii u baa ki garin, u ki ŋan nan wun teen n poorpoweitɔɔ; wunba mun bia loon u bija amii u bipoo ki garin, u ki ŋan nan wun teen n poorpoweitɔɔ.

³⁸ Wunba ki jii u kuun dapunpunn ki buk ki waami, u ki ŋan nan wun teen n poorpoweitɔɔ.

³⁹ Wunba yaa ŋɔɔ dekii u manfoor tan sa kɔŋŋira, ŋaan wunba likin u saaŋmaŋ n paak, u tan sa la u manfoora.

Binba tan sa la paauk labaar

⁴⁰ “Wunba gaari saauŋ, u gaar mine saauŋ; ki wunba mun bia gaar min saauŋ, u gaar Yennu wunba tumin nee mun biak.

⁴¹ Wunba gaar Yennu sɔkinii saauŋ nan wa tee Yennu sɔkinii na paaki, u tan sa gaar Yennu sɔkinii nyɔɔta; wunba gaar popeendaanɔ saauŋ nan wa tee popeendaanɔ na paaki, u tan sa gaar popeendaanɔ nyɔɔta.

⁴² Wunba finn nyumaasin waaminna kuukɔɔ ki tur n poorpoweitɔɔ yenɔ nba pɔ i ni gbaa, nan wa tee n poorpoweitɔɔ na paak, barmɔniie ki n beeri na, u tan kan mi kɔŋ li paauko.”