Barŋanii nba ki LUK din sɔb nae na 7 - Yennu Gbounpaauŋ Mɔɔr

Rom tiŋ lanjimanba yudaanɔ daabir po

¹ Yisa nba din wann niib bont kur ki gbenn na, ki u ji din gar saan Kapenaum.

² Ki Rom tiŋ lanjimanba yudaansɔɔ din be leŋ ki mɔk daabilonkak, ki yiaru din soorɔ ki u per kuuma.

³ Li yoo maŋ ki lanjimanba yudaanɔ na gbat Yisa po ki tun Juu teeb saakab u boor ni a bin saan ki saa barimɔ ki wun baar ki tan te ki u daabir na-n paak.

⁴ Ki bi din saan Yisa boor ki saa barimɔ bonchiann ki yetɔ a “Jɔɔ maŋ jaŋ nan fan sommɔwa,

⁵ kimaan u loon ti niib. U bia poŋ maa Yenjiantu diiuk ki turita gbaa.”

⁶ Ŋanne ki Yisa din weib saan. Wa din saa per ŋaak maŋ yoonba, ki lanjimanba yudaanɔ maŋ din tun u yɔɔsinba ki betib a bin yet Yisa nna a “N Yomdaanɔ, daa bakint a mɔŋ ki baati, kimaan n ki ŋan nan fan baar kɔɔ n ŋaak ni.

⁷ N bia ki ŋan nan ki n nakin a boori. N loon fan lek pak mɔbonne, ki te ki n daabir na-n paak.

⁸ Kimaan n mɔk binba garin ki yenin, ki n mun dia lanjimanba ki yemm, ki fit tian yenɔ paak, ‘Baat,’ ki u baat; ki tian lɔɔ paak a ‘Saant,’ ki u saa; ki bia te ki n daabir tuun ma loon biaŋinba.”

⁹ Yisa nba din gbat linba na, ki li yaar litɔ, ki u jiant ki got niburchiauŋ nba waa u poorpo na ki betib a “N beerie, n daa ki mi la sɔɔ ki u teenin yada na booru yimm Israel teeb booru niwa gbaa.”

¹⁰ Li yoo maŋe ki lanjimanba yudaanɔ maŋ yɔɔsinba na din ŋmat ki saan u ŋaak ni ki saa baar sɔɔ daabir maŋ paaka.

Yisa nba din fiin pakɔɔk bija kuun ni labaar

¹¹ Li din yente ki Yisa din saa doo nba ki bi yi Neenn na, ki u poorpoweiteeb nan niburchiauŋ din waau.

¹² Wa din saa baar doo maŋ tammɔb ni yoonba, li maama na ki u la ki niib bonchiann nyi doo maŋ ni ki jii kuun a bin saan pii. Kpeemɔ maŋ naa din tee pakɔɔke; ki ŋɔɔe din tee u bijayemmir.

¹³ Ki Yisa nba din la pakɔɔk na, ki ninbaauk soorɔ, ki u yetɔ a “Daa mɔ,”

¹⁴ ŋaan saan sii kuun liaŋ na paak; ki binba jiiu na set. Ki Yisa yet a “Ŋaajɔɔ, fiit.”

¹⁵ Ki kpeemɔ maŋ manfoor jen, ki u fiir ki kar ki piin piak. Ki Yisa din jiiu ki kubinɔ u naa.

¹⁶ Ki jaŋmaanii ji din soor niib kur nba be leŋ na, ki bi din dont Yennu sann ki yeen leeb a “Yennu sɔkiniijaann be ti sinsuuk ni;” ki bia yeen bi leeb a “Yennu sik a wun somm u niib.”

¹⁷ Ki Yisa labaar na din yat Judea tiŋ nan digbankpinii kpinii nba kpia leŋ maŋ kura.

Jɔɔnn nba din wuur niib Yennu nyunwuru na labaar

¹⁸ Li poorpoe ki Jɔɔnn nba wuur niib Yennu nyunwuru na poorpoweiteeb din saan ki saa betɔ li labaar kur; ki u tan yiin u poorpoweiteeb bannlee bi ni,

¹⁹ ki tumm ti Yomdaanɔ Yisa boor, a bin saa boiɔ a “Fine tee wunba yaa wun tan baar na amii tii daa kii guu li yɔɔ?”

²⁰ Ki bi din saan Yisa peŋ ki saa betɔ a “Jɔɔnn wunba wuur niib Yennu nyunwuru na tumit a peŋ a ti tan boia ki laan fii tee wunba yaa wun tan baar na amii tii daa kii guu lɔɔ?”

²¹ Li yoo li yoo na ki Yisa din te ki baatib nan yiarpaarii damm bonchiann paak, ki nyinn narinbiit siab ni, ki nyɔɔnt jɔɔnii bonchiann;

²² ki u ji bet Jɔɔnn toomii na “Yi ŋmat man ki saa bet Jɔɔnn linba ki i la ki bia gbat na; a i la ki jɔɔnii nyɔɔntir, ki wɔbii taa naatir ki bi somm, ki gbaata ŋaat gbent, ki tukpaa ji gbia, ki kpeemm fi kuun ni, ki talasdamm gbiintir barŋanii mɔɔntii.

²³ Ki parpeenn be wunba ki birisin na paak.”

²⁴ Jɔɔnn toomiinba nba din ŋmat na poorpoe ki Yisa ji din piin ki boi niib maŋ buboit ki jikit saa Jɔɔnn po a “Ya daan saan Jɔɔnn peŋ muuk ni na, i daan dukii nan i sa saa la bee? I daan mi a i sa la muuk nba ki wouŋ damm naee?

²⁵ amii i mantik jia daan saan a i saa la bee? Nirɔ ki u lia taŋant amii? Nnara, niib nba lia taŋant ki be bi yama ni na be kpanbara ŋei nie.

²⁶ Tɔn, wantin man nibooru nba ki i daan saan muuk na ni a i saa la. I daan dukin nan i sa la Yennu sɔkinii amii? Barmɔniie ki n beeri, Jɔɔnn ŋanin gar sɔkiniiwa.

²⁷ Ŋɔɔ poe ki Yennu din yet u gbouŋ ni a ‘Nnara, n sa tun n toomu a tɔɔnn po, wunba sa gar ki ŋamm a baaru sɔnu.’ ”

²⁸ Ki Yisa bia din yetib a “N beerie, bi daa ki mi mar sɔɔ ki u chee Jɔɔnni, ŋaan wunba joont tarik Yennu naan ni cheeu.”

²⁹ Ki niib kur nan lampogaarteeb din sak a Yennu ŋan, kimaan bi din gbat Jɔɔnn mɔɔntii, ki ŋaan ki u wurib Yennu nyunwuru,

³⁰ ŋaan ki Farisiinba nan sennu wannteeb din ki gaar linba ki Yennu lor turib, kimaan bi din ki sak a Jɔɔnn-n wurib Yennu nyunwuru.

³¹ Ki Yisa bia yetib a “Yimm mɔtana nigbouŋ na, n sa bikini nan bee na? N taan mi i tee niboor bee na?

³² I naan nan waas nba tuu tikir ki kar daak ni ki tian leeb paak nee a ‘Ti peeb yerii ki teeni, ŋaan ki i ki waa. Ti mɔ kpemɔnii ki teeni, ŋaan ki i ki mɔ fabini.’

³³ Yimm mɔtana nigbouŋ na mun naan nan waas maŋe, kimaan Jɔɔnn din baar ki ki di jemɔnti, ki bia ki nyu daami, ŋaan ki i yaa a u waate;

³⁴ ki min nisaarik Bik mun tan baar ki di ki nyu, ŋaan ki i yaa a ‘Gotir man, a u tee podaanɔ nan danyuruko; a u bia tee lampogaarteeb nan biitdamm yɔɔke.’

³⁵ Tɔn, binba kur mɔk Yennu yan tuu yaa a li ŋan.”

Yisa nba din tun biaŋinba Farisiisɔɔ ŋaak ni

³⁶ Ki Farisiisɔɔ din be, ki din tan yiin Yisa a wun baar ki di jeet u ŋaak ni; ki Yisa din saan jɔɔ na ŋaak ni, ki bi saa lakin kar ki dii.

³⁷ Ki poosɔɔ mun din be doo maŋ ni ki tee bonchonchonn; ki wa tan gbat a Yisa di jeet ŋaak maŋ ni, ki u baar nan salenŋann nba gbee nan tulaarii,

³⁸ ki din set Yisa poor, u taa boor, ŋaan mɔ; ki u ninnyuut baa Yisa taa paak ki tan maak; ki u din tan jii u yut ki fian Yisa taa, ŋaan barin pit, ki tan but tulaarii na u taa paak.

³⁹ Ki Farisiijɔɔ nba yiin Yisa na din la linba na, ki u dukin u par ni a “Jɔɔ na-i bo-i tee Yennu sɔkiniie nan barmɔnii, a u bo sa bann poo na nba tee poosɔɔ nbae ki siinɔ na. U bo sa bann nan u tee biitdaanɔwa.”

⁴⁰ Ŋanne ki Yisa yet Farisiijɔɔ maŋ a “Simon, n mɔk mɔbonsiar ki yaa n beta.” Ki Simon jiin ki yetɔ, “Chanbaa, betirin.”

⁴¹ Ki Yisa yetɔ a “Jab bannlee din be ki mɔk likikpentitɔɔ pann. Yenɔ din mɔk u pann pɔŋ kobii ŋannlee nan piiŋŋmu, ki lɔɔ na mun din mɔk u pann pɔŋ piinnlee nan ŋaŋŋmu.

⁴² Bi bannlee maŋ sɔɔ din ki fit pa. Ŋanne ki u din chab bi kura a bii saa. Tɔn, i dukii nan ŋmee mantik sii loon likikpentitɔɔ maŋi?”

⁴³ Ki Simon jiin ki yetɔ a “N dukin nan li sii tee wunba ki u chab pann yab nee.” Ki Yisa yetɔ a “A mɔk mɔnii,”

⁴⁴ ki din jiant got poo na, ŋaan bet Simon, “A la poo na-aa? N kɔɔ a ŋaak nna, ki a ki turin nyun ki n fobit n taa, ŋaan poo maŋ ŋanin fobit n taa nan u ninnyuut, ki bia jii u yut ki fiarin.

⁴⁵ Ŋaan fin ŋanin ki barin pitimi, ŋaan ŋɔɔ ŋanin bo ki nyik n taabarimu teee nan ma baar yoonba nawa.

⁴⁶ A bia lek ki sɔɔr n yut nan kpan, ŋaan poo maŋ bia jii tulaarii ki sɔɔr n taa.

⁴⁷ N beerae, n nyik u biit nba yab ki chabɔ; li paak te ki u mantik loonin bonchiann. Ŋaan wunba ki n nyik chab u biit waaminna, ŋɔɔe loonin waaminna mun.”

⁴⁸ Ŋanne ki Yisa jiant ki yet poo na a “N nyik a biit ki chabawa.”

⁴⁹ Ki nileeb nba kar ki di na ji din piin beer bi leeb a “Waa, a ŋmapoe sa fit nyik chab nirɔ u biiti?”

⁵⁰ Ki Yisa bet poo na, “Fa teenin yada na, a la tinnuwa. Li paak, i saa nan parmaasir.”