Barŋanii nba ki LUK din sɔb nae na 24 - Yennu Gbounpaauŋ Mɔɔr

Yisa kuun fiiru labaar

¹ Lasir daar sanyafaar, ki poob maŋ nyii saan kaauk maŋ boor nan bi kpanunubit nan tulaarii nba ki bi poŋ ŋamm na.

² Ba baar leŋ ki bi la ki katangbeŋŋir ki li nyakit kaauk na mɔb paak, ki birint ki saa dɔɔ.

³ Ba kɔɔ kaauk maŋ ni ki saa ki la Yisa gbanant

⁴ ki bi ji biar see jiiaa. Li taakpaak ni ki jab bannlee see ki lia liatnyinyira;

⁵ ki li teen poob na jaŋmaansooruk, ki bi gbaan tiŋ ni. Ki jab na boib a “Bee ki i gorii footɔɔ kpeemm ni?

⁶ U kaa nna. U fiira. Tiat man wa din yeti biaŋinba, yoo nba ki u daa din be Galilee na,

⁷ a bi tan sa soor ŋɔɔ nisaarik Bik ki jiiu teen biitdamm nuu ni ki bin kpaau tabinɔ dapunpunn paak ki wun kpo; a ki u tan sa fiir kuun ni daa ŋanntaa daar.”

⁸ Ŋanne ki poob na ji tiar u maan maŋ po,

⁹ ki ji seet kaauk na boor ki ŋmat kun, ki saa yet linba kur teen, ki tur u poorpoweiteeb piik nan yenɔkɔɔ, nan binba be leŋ na kura.

¹⁰ Ki poob maŋ sanae din tee Mari Magdaliin, nan Joanna, nan Mari nba din tee Jems naa na; ki pooleeb mun din pukin bi paak ki be bi ni.

¹¹ Ŋamme din bet Yisa toomiinba barii maŋ; ki toomiinba na ŋanin din dukii nan li tee poomaame, ki bi ki teemm yada.

¹² Ŋaan ki Piita ŋanin din fiir ki chiar saan kaauk na boor, ki saa tibin ki got ki la kuun chinchenn na ki li dɔɔ li kuukɔɔe; ki u ji ŋmat kun ŋaak ni nan yaarlituk nan linba teen maŋ paak.

Emmaus sɔnu paak labaar

¹³ Li daar maŋe ki bi ni niib bannlee din saa digbanbik nba yi Emmaus na. Leŋ nan Jerusalem din tee kaman nan maar ŋannlore nee.

¹⁴ Ki bi din somm piak nan leeb linba na kur nba teen maŋ paak.

¹⁵ Ba piak ki faa labaar nan leeb yoonba na, ki Yisa mɔŋ nakimm ki lakin namm saa;

¹⁶ ŋaan ki Yennu te ki li liirib ki bi ki bann Yisa.

¹⁷ Ki u boib a “I somm piak a bee?” Ki bi set nan ninbiik.

¹⁸ Ŋanne ki bi yenɔ, wunba sann yi Kleopas na boiɔ a “A kuukɔɔe tee saamɔ nba be Jerusalem na ki tan ki gbat barii nba teen leŋ daa ŋannlelee na-aa?”

¹⁹ Ki u boib a “Barlannpoe?” Ki bi yetɔ a “Ki jikit saa Nasaret nirɔ Yisa po; jɔɔ na daan tee Yennu sɔkiniie, ki tun toonjaana; ki u maan mun daan mɔk paŋ; ki u penn Yennu nan nirɔ para.

²⁰ Ki ti yudamm nan Yennu jiantu yudamm jiiu ki teenɔ barbuurɔ nuu ni a wun bu u buut ki yet a u ŋan nan kuume; ki bi tan kpaau dapunpunn paak.

²¹ Ŋaan ki ti tuu daan nan ŋɔɔe tan sa nyinn timm Israel teeb ti datai nuu ni; ki linba pukin, dinna tee daa ŋanntaae na la teen.

²² Ŋann maŋe biak, ki ti ni poosiab pakit u po ki li yaar ŋaan litit, kimaan ba saan kaauk maŋ boor sanyafaar na,

²³ bi saa ki la u gbananti. Ba jen yoonba ki bi betit a ŋamm saa la Yennu malakanba nan bi numm; ki malakanba maŋ yetib a Yisa jen u manfoor niwa.

²⁴ Ŋanne ki ti yemm tan saan kaauk maŋ boor, ki saa la kaman nan poob nba dɔŋ betit na, ŋaan ŋamm ŋanin saa ki la Yisa.”

²⁵ Ki ŋɔɔ Yisa betib a “Bee yankpeensime ki i mantik mi nna nan ki i teen sɔkiniinba maan kur yada.

²⁶ Li teen talas nan Yennu Niganntɔɔ Masia-n di fara maŋ, ki tan la u baakir.”

²⁷ Ŋanne ki u wantib u barii nba sɔb Yennu gbouŋ kur ni na paak, ki piin Moses sɔbu ni nan sɔkiniinba sɔbu kura ni.

²⁸ Tɔn, ki bi tan per digbanbik nba ki bi baat na; ki Yisa tan teen nan u gaare na.

²⁹ Ki bi gɔɔrɔ ki yeen a “Biat nant nna, a kimaan yennu baawa ki li ji bɔnte.” Li paak ki u ji kɔɔ ki biar bi boor ni.

³⁰ Ki u tan kar a wun di namm; ŋanne ki u jii boroboro na ki tur Yennu niipoouk li paak, ŋaan bɔkit ki turib.

³¹ Li yoo na ki bi numm po ji yent ki bi ji bannɔ. Li taakpaak ni ki u bia lir bot bi ni.

³² Ki bi ji beer bi leeb a “Wa piak nant sɔnu paak ki wantit linba sɔb Yennu gbouŋ ni na paak, a ti para ki penn bonchiannii?”

³³ Li taakpaak ni ki bi fiir ŋmat Jerusalem, ki saa la u poorpoweiteeb piik nan yenɔkɔɔ na nan siab ki bi lakin leeb.

³⁴ Ŋanne ki u poorpoweiteeb na betib a “Ti Yomdaanɔ set fiire nan barmɔnii. U dɔkit Simon paak.”

³⁵ Ki niib bannlee na mun betib linba teen sɔnu paak, nan biaŋinba ki bi bannɔ nan wa tan bɔkit boroboro biaŋinba na.

Yisa nba dɔkit u poorpoweiteeb paak biaŋinba

³⁶ Ba beerib linba na, li taakpaak ni ki Yisa set bi sinsuuk ni ki yetib a “Parmaasir-ii be i paak.”

³⁷ Ki jijekit nan jaŋmaanii soor kɔɔb hei, kimaan bi dukii mi a bi la siara bonfintikare.

³⁸ Ŋanne ki u boib a “Bee ki i yan paak puti? Bee ki birsuk be i ni?

³⁹ Gotir n nii nan n taa man, ki bann nan li set tee mine. Siimin ki bann nan mine. Bonfintikar ki mɔk gbanant nan kpaba, ŋaan i la ma mɔk gbanant nan kpaba biaŋinba.”

⁴⁰ Wa yet nna maŋ ki u wannib u nii nan u taa.

⁴¹ Ŋaan bi parpeenn paak ki bi bia lek ki mi teenɔ yada nan li tee ŋɔɔe; ki li bia yaar litib. Ki u boib a “I mɔk jesiat nna-aa?”

⁴² Ki bi jii jaŋŋaakir bonchiɔk ki turɔ;

⁴³ ki u gaar ki ŋman bi numm ni.

⁴⁴ Ŋanne ki u betib a “I tian man n mɔmaan nba ki n daan wanti ma daan be i boor ni yoonba na, a n barii kur nba sɔb Moses sennu ni, nan Yennu sɔkiniinba sɔbu ni, nan Yennu gbouŋ nba ki bi yi yanii na nɔɔk ni, a li kpaa talas nan li kur-n tan mantik tun ki gbenn.”

⁴⁵ Ŋanne ki u ji yênt bi numm a bin bann linba sɔb Yennu gbouŋ ni na paak,

⁴⁶ ki yetib a “Li sɔb a Yennu Niganntɔɔ Masia sa di fara ki kpo ki tan fiir kuun ni daa ŋanntaa daar;

⁴⁷ a bin saan ki mɔɔnt niib u sann paak a bi-i nyik bi biit Yennu sa nyik chabib; a bin piin ki mɔɔnt Jerusalem teeb barii maŋ sinsinn, ki bia mɔɔnt nibooru kur mun.”

⁴⁸ Ki u bia betib a “Yimme tee linba na siara damm.

⁴⁹ Nnara, mine yaa n tan turi n Baa Yennu Seyeeŋ nba ki u senn mɔsonn a u sa turi na. Yii daa biar kii be man Jerusalem mɔkmɔk nan yoo nba ki Yennu Seyeeŋ maŋ sa nyi sanpaapo ki sik i paak ki turi paŋ.”

Yisa nba doo Yendɔuŋ ni biaŋinba

⁵⁰ Ŋanne ki Yisa nyii namm doo maŋ ni ki saan namm Betani. Leŋe ki u saa donn u nii sanpaapo ŋaan senn mɔsonŋann bi paak.

⁵¹ Wa senn mɔsonŋann na yoonba na, ki u yaat ki nyikib ŋaan doo Yendɔuŋ ni.

⁵² Ki bi ji jiantɔ ki tan ŋmat Jerusalem nan parpeenn bonchiann.

⁵³ Ki bi ji din jii bi yoo ki be Yennu jiantu ŋasaakak ni yoo kura, ki piak dont Yennu sann.