Barŋanii nba ki LUK din sɔb nae na 23 - Yennu Gbounpaauŋ Mɔɔr

Tiŋ yudaanɔ Pailat nba bu Yisa buut biaŋinba

¹ Ŋanne ki niib na kura din fiir ki jii Yisa ki saan nanɔ Pailat boor.

² Leŋe ki bi ji din piin ki want u biit ki yeen a “Ti la nirɔ na ki u biir ti niib ki yaa a bi daa pa lampo kii teen Kpanbar Siisa, ki bia yeen a ŋɔɔe tee Yennu Niganntɔɔ Masia, ki bia tee kpanbar.”

³ Ki Pailat boiɔ a “Fii tee Juu teeb kpanbar na-aa?” Ki u jiin ki yet a “Nan fa kpan yaa na.”

⁴ Ki Pailat yet Yennu jiantu yudamm nan nibur na, “N ki la jɔɔ na biiti.”

⁵ Ki niib na bia din yakii nan Pailat ki yeen a “U want niib wannu, li paak te ki bi fiir jirjir. U din piin ki want Galilee niib ki tan saan Judea doi ni kura nan wa tan baar nna na.”

Bat Herod nba bu Yisa buut biaŋinba

⁶ Pailat nba gbat nna na ki u boib a “Jɔɔ na tee Galilee nirɔee?”

⁷ Wa bann nan Yisa nyii Galilee tiŋ nba ki Bat Herod yen na, ki u ŋaan ki bi saan nanɔ Herod boor, kimaan ŋɔɔ Herod mun din be Jerusalem li yoo.

⁸ Ki Herod poŋ din tuu gbia Yisa po, ki loon wun lau ki li yukir. Wa din tan la Yisa yoonba ki u ji mɔk parpeenn bonchiann, ki loon Yisa-n tun bakitnauŋ toonn ki wun la.

⁹ Li paak, ki u boi Yisa buboit bonchiann; ŋaan ki u ki jiinɔ siari.

¹⁰ Ki Yennu jiantu yudamm nan sennu wannteeb mun din see leŋ ki piak nan paŋ ki want Yisa biit.

¹¹ Ki Herod nan u lanjimanba ji sian Yisa ki daanɔ nyatuk, ki gbabinɔ chinchenŋann ki jiinɔ Pailat boor.

¹² Li daar maŋ ki Pailat nan Herod soor leeb naasinyɔɔsir, kimaan bi din tuu tee dataie sinsinn tuuk.

Pailat nba chab a bin kpi Yisa biaŋinba

¹³ Ki Pailat din yiin Yennu jiantu yudamm nan Juu teeb yudamm nan nileeb

¹⁴ ki tan yetib a “I baar nan nirɔ na ki yaa a u kpann niibe. Gotir, n bu u buut i numm nna, ki ki la u biit nba tee linba ki i yaa a u tun maŋi.

¹⁵ Herod mun bia ki la u biiti. Li paak te ki u jiintɔ ki teent na. I lawa-aa? Jɔɔ na ki tun bisiat nba ki li jaŋ nan kuumi.

¹⁶ Ŋannimi n sa boou kpaasir, ŋaan ŋaau ki wun saan.”

¹⁷ Ki binn kur yukitgar tiaru jaamm yoo na, Pailat din tuu fabir ki nyinn dansarkɔyenɔe ki ŋaan ki wun saan yann.

¹⁸ Ki nibur na din tian sanpaapo ki yeen a “Kpin jɔɔ na. Nyint Barabas yann ki turit.”

¹⁹ (Ba din kɔɔn Barabas dansarik na kimaan u bigbabisin nba ki u din tee doo na ni na, nan u nikpinu na paak.)

²⁰ Ŋanne ki Pailat bia lek din loon wun nyinn Yisa ki ŋaau yann, li paak ki u bia ŋamm piak nan nibur na;

²¹ ki niib na mun bia tian sanpaapo ki jiint Pailat a “Kpaamɔ dapunpunn paak! Kpaamɔ dapunpunn paak!”

²² Ki Pailat boib taar munntaa ni, “Bee paake? U biit mantik tee lannpoe? N ki la linba ki u tumi ki li jaŋ nan kuunkpinu. Ŋannimi n sa boou kpaasire, ŋaan ŋaau ki wun saan.”

²³ Ŋaan ki niib na bia lek tian tintianii a wun kpaa Yisa ki tabinɔ dapunpunn paak; ki bi tintianii maŋ tan nyann Pailat yar.

²⁴ Ki Pailat ji chabib ba loon biaŋinba a lin teen nna,

²⁵ ki nyinn jɔɔ nba ki bi loon wun nyinnɔ na, wunba ki bi din kɔɔnɔ dansarik kimaan u bigbabisin nan u nikpinu na paak, ki u chabib Yisa nan ba loon biaŋinba lin teen maŋ.

Ba kpaa Yisa ki tabinɔ dapunpunn paak biaŋinba

²⁶ Li yoo na ki lanjimanba jii Yisa ki saan nanɔ, ki saa took jasɔɔ ki u sann yi Simon, wunba din tee Sairene jɔɔ, ki u nyii digbankpiŋ nna ni ki baat Jerusalem; ki bi din tan soorɔ ki jii Yisa dapunpunn na ki bukinɔ ki u waa Yisa poor.

²⁷ Ki niburchiauŋ din waa Yisa ki bi tɔk saa. Bi ni maŋ poosiab din waa ki bui ki fabin u paak.

²⁸ Ki Yisa din tan jiant bi paak ki yetib a “Jerusalem poob, i daa bui n paaki, ŋaan kii bui man i mɔŋ paak nan i waas paak.

²⁹ Gotir, yoo tan sii baat ki niib tan sii yeen a ‘Pookanmata damm binba ki mar waas ki mɔɔmm biiri, ŋamme mɔk parpeenn.’

³⁰ Li yoo maŋe ki niib tan sii yeen jɔɔt nan kunkona a ‘Baan ti paak ki piint!’

³¹ A muu-i di tana, ki dagbira jikii?”

³² Ŋanne ki bi ji din jii doyeerteeb bannlee ki pukin Yisa paak a bin kpib.

³³ Ba din baar siaminba ki bi yir Yukpabuk na, leŋe ki bi din kpaa Yisa ki tabinɔ dapunpunn paak, ki bia din kpaa doyeerteeb bannlee na dapunpuna paak, ki yenɔ din be Yisa niidiitu po, ki lɔɔ na mun din be u niigaŋ po.

³⁴ Ki Yisa yet ki yaa a “N Baa Yennu, nyikin chab niib na, kimaan bi ki bann ba tuun linba na paaki.” Ki bi din chent u liata ki dia ŋaan tɔ tiatia a bin la wunba sa di ki yent u liata maŋ.

³⁵ Ki niib na see ki gorii; ŋaan ki Juu teeb yudamm na din daanɔ nyatuk ki yeen a “U tuu tint nileeb; li-i tee ki u set tee Yennu Niganntɔɔ Masia na, wun tinn u mɔŋ.”

³⁶ Ki lanjimanba bia din daanɔ nyatuk, ki tan baar nan damiituk ki teenɔ,

³⁷ ŋaan yaa a “Li-i tee ki a set tee Juu teeb kpanbarie, fan tinn a mɔŋ.”

³⁸ Bi bia sɔb sɔbu ki tabin dapunpunn na u yur paak, ki li yet a “Juu teeb kpanbarii na.”

³⁹ Li yoo na ki doyeerteeb nba taab na yenɔ din sukii Yisa ki yaa a “A ki tee Masia kaa-aa? Tint a mɔŋ ŋaan mun tinnit.”

⁴⁰ Ki lɔɔ na din tiau ki yet a “A ki tiin Yennu-uu? kimaan fin nan ŋɔɔ be tubdatyennkɔɔ nie na.

⁴¹ Timm ŋanin ŋan nan li tubdatu, kimaan bi jiintit pankpera nba ki ti tuu tuun na paake;”

⁴² ŋaan bet Yisa a “Yisa, yoo nba ki a dii a naan, a tan tiar n po.”

⁴³ Ki Yisa betɔ a “Barmɔniie ki n beeri, dinna min nan fin sii be Paradais ni.” ((Bi bia yi Yendɔuŋ Paradais, ki li paak tee siaminba ki parpeenn bonchiann be.))

Yisa kuun labaar

⁴⁴ Li yoo din tee kaman nan yensuuk nie, ki yennu ji din lib, ki tingbouŋ na kur ji din bɔnn mɔkmɔk nan yenlekir, kut munntaa yoo.

⁴⁵ Ki chinchenn din tuu jɔɔn ki puun Yennu jiantu diiuk sinsuuk ni, ki li ji din tan soor bɔkit taar munnlee.

⁴⁶ Ki Yisa tan yikin sanpaapo ki yet a “N Baa Yennu, n jikit n seek ki tee a nuu ni.” Wa yet nna maŋ ŋaan ji kpo.

⁴⁷ Ki lanjimanba yudaanɔ nba la linba teen na, ki u pak Yennu ki yet a “Barmɔniie, jɔɔ na set tee popeendaanɔe.”

⁴⁸ Ki niburchiauŋ nba lakin leŋ a bin la linba tee, ba din la linba teen na, ki bi ji ŋmat kun nan parbiir ŋaan pakin yura.

⁴⁹ Ki u yɔɔsinba kur nan poob nba nyii Galilee nanɔ din be leŋ ki see banfɔkira ŋaan gorii linba tee.

Yisa gbanant piinu labaar

^50-51 Ki jasɔɔ din be ki u sann yi Josef ki din nyii Juu teeb doo nba ki bi yir Arimatea, ki din tee niŋanɔ nba tee burchimɔ, ki din guu Yennu naan baaru na. U din tee Juu teeb yudaanyenɔe, ŋaan u din ki sak nan Juu teeb yudaanleeb nba din lorin lor, nan bi toona nba ki bi tuun tee Yisa maŋi.

⁵² Ki jɔɔ maŋ saan Pailat boor ki saa miarɔ a wun turɔ Yisa gbanant; ki u chabɔ.

⁵³ Ŋanne ki u saan kpaat gbanant na dapunpunn na paak, ki jiiu ki pɔbinɔ katiŋ ni, ki piiu kapaauŋ ni, linba ki bi poŋ din jiar tanpiiuk lokir ni na, ki bi din daa ki pii sɔɔ kaauk maŋ ni.

⁵⁴ Li din tee daar nba ki bi tee siir foon daar paake, ki foon daar na din tan piint.

⁵⁵ Ki poob nba din nyii Galilee ki din waa Yisa na wei Josef, ki bi saa la Yisa kaauk boor nan ba piiu biaŋinba.

⁵⁶ Ŋanne ki bi ji din ŋmat kun ŋaak ni, ki saa teen siir ki ŋamm kpanunubit nan tulaarii. Ki foon daar ki bi din foi kaman nan Yennu sennu nba want biaŋinba na.