Barŋanii nba ki LUK din sɔb nae na 2 - Yennu Gbounpaauŋ Mɔɔr

Yisa maaru labaar

¹ Li yoo na ki kpanbara yudaanɔ Ɔgustus din tur mɔb u yent ni a bin sɔb sɔɔ kur nikant.

² Ŋanne din tee sinsinn nikant sɔbu, ki Kirinius din tee Siria tiŋ yudaanɔ li yoo.

³ Li paak, sɔɔ kur din kun u doo ni a bin saa sɔb u sann,

⁴ ki Josef mun din nyii Nasaret nba be Galilee tingbouŋ ni, ki saan Judea tingbouŋ ni, ki kun kpanbar David doo ni, ki bi yi doo maŋ Betlehem; kimaan u din tee David yaaboonne.

⁵ Li paak, ki u kpen a bin sɔb ŋɔɔ nan u sarkpeŋ Mari sana; li yoo na, ki Mari mɔk poor.

⁶ Ba din daa be Betlehem na, ki Mari maaru yoo din tan jaŋ nan wun mar,

⁷ ki u ji mar bonjabik, u sapaanmar, ki jii chinchenn ki pɔbinɔ, ki birɔ bonkɔbit jedigungɔuŋ ni, kimaan saamm diiuk ji din ki mɔk yiar nba ki bi sa kɔɔ ki dɔɔri.

Pekpaarii nan malakanba po

⁸ Pekpaarii mun din be doo maŋ ni ki kpaar bi pei nyiɔk muuk ni.

⁹ Ki ti Yomdaanɔ Yennu malakasɔɔ din tan dɔkit bi paak, ki ti Yomdaanɔ Yennu yentsaakar yent lintib. Ki jaŋmaanii nan waat mantik ji din soorib bonchiann.

¹⁰ Ŋaan ki malaka na betib a “Daa tiin jaŋmaanii man, kimaan n baar nan barŋaniie ma n wanni, linba sa tur niib kur parpeenn bonchiann.

¹¹ Dinna nyiɔk na bi mar i Tinntɔɔ wunba tee Yennu Niganntɔɔ Masia, wunba tee ti Yomdaanɔ na; ki bi marɔ David doo ni.

¹² I sa la sanpantik na pɔɔb chinchenn ni ki dɔɔ bonkɔbit jedigungɔuŋ ni; linba sii tee nyinn ki turi.”

¹³ Li yoo na ki Yendɔuŋ ni malakanba bonchiann dɔkit ki pukin malaka na po, ki piak Yennu ki yeen a:

¹⁴ “Dont Yennu sann sanpaapo man; parmaasir-ii be u nigannkab paak, tingbouŋ ni.”

¹⁵ Ki malakanba na tan nyik pekpaarii na, ŋaan ŋmat doo Yendɔuŋ ni. Ki bi yet bi leeb a “Ŋaant man ki tin saan Betlehem ki saa got laan linba teen, ki ti Yomdaanɔ Yennu betit na.”

¹⁶ Ŋanne ki bi fiir saan yian yian ki saa baar ki la Mari nan Josef; ki sanpantik maŋ dɔɔ bonkɔbit jedigungɔuŋ ni.

¹⁷ Ba baar lau yoonba ki bi mɔɔnt linba ki malaka na betib bik maŋ po na.

¹⁸ Ki binba din gbat linba ki pekpaarii mɔɔnt na, ki li bakit bi kur.

¹⁹ Ŋaan Mari din tiar linba teen na kur, ki din dukii li po u par ni bonchiann.

²⁰ Li poorpoe ki pekpaarii na ŋmat bi pei boor muuk ni. Ba saa na, ki bi piak dont Yennu sann, linba kur ki bi gbat ki la na paak; ki li set tee kaman nan malaka nba betib biaŋinba na.

Yisa sanpuru labaar

²¹ U maaru daa ŋanniin nee ki bi din pot u punn ŋaan pur u sann Yisa, sann nba ki malaka din pur ŋaan ki bi din daa ki soor u poor na.

Ba din jii Yisa ki tur Yennu biaŋinbae na

²² Tɔn, li din tan jaŋ nan Josef nan Mari-n tun kaman nan Moses sennu nba senn biaŋinba, ki mann marouŋ ki ŋamm bi mɔŋ Yennu boor na. Ŋanne ki bi ji din jii bik na ki saan nanɔ Jerusalem, a bin saa jiiu ki tur ti Yomdaanɔ Yennu

²³ kaman nan la sɔb ti Yomdaanɔ Yennu sennu ni a “Bikperik kur nba tee bonjabike sii tee ti Yomdaanɔ Yennu yɔɔ.”

²⁴ Ki bi bia mann marouŋ kaman nan ti Yomdaanɔ Yennu nba din senn biaŋinba na a “Bin la lanjerii bannlee amii ŋmanbira bannlee ki mann.”

²⁵ Li yoo na ki jasɔɔ nna din be Jerusalem, ki u sann din tee Simeon. U din tee niburchimɔ nan yentinɔe, ki Yennu Seyeeŋ din be u ni, ki u din guu yoo nba ki Yennu sa tinn Israel teeb.

²⁶ Ki Yennu Seyeeŋ maŋ poŋ din fiit ki wannɔ a u kan kpo see ki u tan la Yennu Niganntɔɔ Masia, wunba ki u din senn mɔsonn a u sa tumɔ na.

²⁷ Li yoo na ki Yennu Seyeeŋ maŋ din te ki Simeon kɔɔ Yennu jiantu ŋasaakak ni, ki saa la Yisa baa nan u naa baar nanɔ a bin teenɔ kaman nan sennu nba senn biaŋinba.

²⁸ Ki Simeon din gaar bik maŋ ŋaan pak Yennu ki yet a:

²⁹ “N Yomdaanɔ, min nba tee a daabir na, ŋaant ki n kpo ki kun nan parmaasir kaman nan fa poŋ din betin biaŋinba na,

³⁰ kimaan n mɔŋ mɔŋ ninbinn la Tinntɔɔ nba ki a tumɔ nawa,

³¹ wunba ki a gann sennɔ ki tur nibooru kura.

³² U sii tee yentu ki sa fiit wann binba ki tee Israel teeb a sɔnu, ki bia sa te ki niib-n dont a niib Israel teeb.”

³³ Tɔn, Simeon nba pakib ki jikit saa bik maŋ po biaŋinba na, ki li bakit bik na baa nan u naa bonchiann.

³⁴ Ki Simeon din miar Yennu mɔsonŋann bi paak, ŋaan bet bik na naa Mari a “Nnara, Yennu nyinn bik na ki sennɔ a Israel teeb bonchiann-n baa yann u paak; ki leeb bonchiann mun bia tan sa tinn u paake. Ŋɔɔ tan sii tee nyinn nba ki niib bonchiann sa pak ki biir na;

³⁵ linba na sa te ki bi woonin ni dudukit-n nyi paanu. Ŋaan ki bonsiar tan sa tun ki biir a mɔŋ mɔŋ par bonchiann.”

³⁶ Tɔn, ki Yennu sɔkiniilɔɔ mun din be leŋ ki tee poo, ki u sann yi Anna, wunba tee Fanuel bik, ki bia tee Aser booru ni nirɔ, ki din tee pokperchaanwoŋ, wunba din yoo bina ŋannlore,

³⁷ ki u sɔrɔ tan kpo ŋaan nyikɔ pakɔɔk binpiinniin nan ŋanna; ŋaan u din tuu ki nak Yennu jiantu ŋasaakak yennu nan nyiɔk, ki jiantir Yennu ki lorin mɔb ki meiɔ.

³⁸ Li yoo na ki u baar ki lab ki teen Yennu niipoouk, ki din piak bik na po ki tur binba kur din guu yoo nba ki Yennu yaa wun tinn Jerusalem teeb.

Ba ŋmat kun Nasaret biaŋinba

³⁹ Ki Josef nan Mari nba din tun gbenn bi Yomdaanɔ Yennu sennu nba senn biaŋinba na, li yoo ki bi ŋmat kun Nasaret nba be Galilee tiŋ ni.

⁴⁰ Ki bik na tan kpaat nan paŋ nan subinii bonchiann, ki Yennu par din mei u paak.

Yisa nba din tun biaŋinba u bisin ni

⁴¹ Tɔn, binn kur ki Yisa baa nan u naa din tuu do Jerusalem ki saa di yukitgar tiaru jaamm.

⁴² Yoo nba ki Yisa din tan baar binpiik nan ŋannlee, ki bi din doo a bin saa di jaamm maŋ kaman nan biaŋinba ki bi din tuu tee na.

⁴³ Jaamm daa maŋ nba din tan gbenn yoonba, ki bi ji piin kunu, ŋaan ki bik na, Yisa, din biar ki be Jerusalem, ŋaan ki u damm ki mi nan u biari.

⁴⁴ Bi din dukii mi a u be nibur na nie, ki bi somm daar maŋ kur; ŋanne ki bi loomɔ bi niib ni nan bi leeb ni,

⁴⁵ ŋaan ki ki lau. Ki bi din ŋmat saan Jerusalem ki saa loomɔ leŋ.

⁴⁶ Ki daa ŋanntaa daar ki bi tan lau Yennu jiantu ŋasaakak ni, ki u lakin kar nan wannteeb yudamm ki gbiintir bi maan ŋaan bia boib buboit.

⁴⁷ Ki binba kur din gbiintɔ, li din bakitib nan wa teen biaŋinba ki mi bannu ki piak ki jiintib.

⁴⁸ Ki u baa nan u naa nba din lau leŋ, ki li bakitib bonchiann; ki u naa ji boiɔ, “N bik, bee ki a teent nna? A ki mi a min nan a baa la parbiir hei ki loomani?”

⁴⁹ Ki u jiin ki boib, “Bee ki i daan loomimi? I ki mi a see ki n fabir kii be n Baa toona ni-ii?”

⁵⁰ Ŋaan bi din ki bann u maan maŋ paaki.

⁵¹ Ŋanne ki bi din ŋmat nan Yisa ki sik Nasaret, ki u din saak bi mɔb. Ki u naa din tian linba teen na kur u par ni.

⁵² Ki Yisa kpaatir ki pukii nan subinii, ki Yennu nan nisaarii para din mei u paak.