Barŋanii nba ki LUK din sɔb nae na 18 - Yennu Gbounpaauŋ Mɔɔr

Pakɔɔk nan barbuurɔ po

¹ Li yoo na ki Yisa yimm barjouk a wun wannib nan li ŋan ki bii mei Yennu yoo kura, ŋaan daa mɔk kpinkpangbatuku, ki betib a

² “Barbuurɔ din be dosau ki din tuu ki tiin Yennu ki tan boi a u baakit nirɔ gbaa.

³ Pakɔɔk mun bia din be doo maŋ ni ki din tuu yɔɔ baat u boor yoo kur ki yeenɔ a ‘Bumin n maan na ki turin nan nirɔ nba mukisirin na.’

⁴ Ŋaan ki u tuu yêt. Li poorpo ki u tan dukin dudukit a ‘N poŋ taan ki tiin Yennu, ki bia ki baakit nirɔ gbaa,

⁵ ŋaan pakɔɔk na daamii paak, n sa tat ki bu u maan maŋ ki turɔ, ŋaan wu biakii baatie ŋann u ji yaa wun kpime na.’ ”

⁶ Ki ti Yomdaanɔ Yisa ŋamm yetib a “Gbiintir barbutouŋ daanɔ nba dukin biaŋinba.

⁷ Wa yaa a u sa turɔ mɔnii na, ki Yennu nigannteeb nba meiɔ yennu nan nyiɔk na, ŋɔɔ Yennu kan bu ki turibii? U sa yukiraa?

⁸ N beerie, u sa bu bi paak yian yian. Tɔn, min nisaarik Bik-i baar yoonba, n sa la niib nba teenin yadawa-aa?”

Farisii nirɔ nan lampogaartɔɔ po

⁹ Ŋanne ki Yisa yin barjouk ki tur binba dukii bonŋann bi mɔŋ paak, ŋaan sian bi leeb na: a

¹⁰ “Jab bannlee din saan saa kɔɔ Yennu jiantu ŋasaakak ni a bin miar Yennu, ki yenɔ din tee Farisii nirɔ, ki lɔɔ mun din tee lampogaartɔɔ.

¹¹ Ki Farisii nirɔ na set ŋaan miar u mɔŋ dudukit ni ki yet a nna, ‘Yennu, n teena niipoouk, kimaan n ki tee biitdaanɔ kaman nan nileeb na. N ki tee ninfɔkdaanɔ, ki bia ki di fobiti, ki mun bia ki tuun bonchonchonsimi. Niipoouk nan ma ki tee kaman nan lampogaartɔɔ na na.

¹² N lorin n mɔb taar munnlee daa ŋannlore nɔɔk ni; ma tuu la linba, n bia teena yennkɔɔ piik nɔɔk ni.’

¹³ Ki lampogaartɔɔ na ŋanin din set dannuwa, ki din ki loon wun yaat got sanpaapo, ŋaan pak yur ki yet a ‘Yennu, tinimin ninbaauk, kimaan n tee biitdaanɔe.’ ”

¹⁴ Ki Yisa ŋamm yetib a “N beerie, jɔɔ na, li ki tee lɔɔ, wa din tan kun, Yennu poŋ din gaar u miaru ki turɔ mɔnii; kimaan wunba kur dont u mɔŋ, Yennu tan sa sikinɔ; ŋaan wunba mun sikint u mɔŋ, Yennu tan sa donnɔ.”

Yisa nba gaar waas paak biaŋinba

¹⁵ Tɔn, ki nisiab din baat nan bi sanpaantii Yisa boor ni, a wun tan yii u nii bi paak, ŋaan ki u poorpoweiteeb nba la ki bi baat nan waas maŋ na, ki bi tian bi paak.

¹⁶ Ŋaan ki Yisa yiin waas maŋ a bii baat u boor na, ŋaan yet u poorpoweiteeb na a “Ŋaant man ki waas maŋ-ii baat n boor na man, ki daa tiammi, kimaan bi boorue yen Yennu naan.

¹⁷ Barmɔniie ki n beeri na, wunba ki gaar Yennu naan kaman nan bik na, u kan mi kɔɔ li ni fabaa.”

Mɔkitsɔɔ labaar

¹⁸ Li yoo na ki yudaansɔɔ din baar Yisa boor ni ki tan boiɔ, “Wanntɔŋanɔ, n sa teen nlee ki tan la manfoor nba kaa gbennu?”

¹⁹ Ki Yisa ŋmat boiɔ a “Bee ki a yin niŋanɔ? Niŋansɔɔ kaa see Yennu kuukɔɔ.

²⁰ A poŋ mi Yennu sennu: Daa tuun bonchonchonn toona, daa kpi nirɔ, daa jaami, daa tee faak siara, baakit a baa nan a naa.”

²¹ Ki jɔɔ maŋ jiin ki yetɔ a “N poŋ sak linba na kur n bisin niewa.”

²² Yisa nba gbat u jiinu na ki u betɔ a “Bonyennkɔɔe pɔta; kɔin linba kur ki a mɔk ki jii li likirii ki tur talasdamm, ki a tan sa la mɔkint Yendɔuŋ ni. Li poorpo ki a jenna kii waan.”

²³ Wa gbat linba na ki u par ji biir, kimaan u din mɔk mɔkint bonchiann.

²⁴ Yisa nba bann nan u mɔk parbiir na, ki u yet a “Li paar nan mɔkita-n kɔɔ Yennu naan ni.

²⁵ Li bia paar nan mɔkitɔɔ-n kɔɔ Yennu naan ni kaman nan lagumii nba kan fit kɔɔ kparpeenu miar ni nae.”

²⁶ Niib nba gbat wa piak biaŋinba na ki bi boiɔ a “Li-i tee nneeie, ŋmee ji sa fit ki la tinnu?”

²⁷ Ki u betib a “Linba ki nirɔ kan fit tumi ŋaan Yennu sa fit tumira.”

²⁸ Ki Piita yetɔ a “Nnara, ti din nyik linba ki ti din mɔk na ŋaan waa-a.”

²⁹ Ki Yisa betib a “Barmɔniie ki n beeri, wunba kur nyik u ŋaak amii u baa amii u naa amii u poo amii u waas amii u yɔɔrib amii u waarii Yennu naan paaki,

³⁰ u sa bia la bona bonchiann tingbouŋ na ni, ki lin gar wa nyik linba na; ki yoo nba baat na, u tan sa la manfoor nba kaa gbennu.”

Yisa nba ŋamm pak u kuun po taar munntaa biaŋinba

³¹ Li yoo na ki Yisa yiin u poorpoweiteeb ki nyii namm kpiŋ ki sa betib a “Nnara, ti saa Jerusaleme, ki leŋe ki bi sa teen min nisaarik Bik linba kur ki Yennu sɔkiniinba din sɔb n po biaŋinba na,

³² kimaan bi tan sa soorin ki teenin binba ki tee Juu teeb nuu ni, ki bi tan sa daanin nyatuk ki sukiin ki siin mɔsant n paak,

³³ ki bia boon kpaasir, ki bia tan kpin; ŋaan daa ŋanntaa daar ki n tan sa fiir kuun ni.”

³⁴ Ŋaan u poorpoweiteeb na din ki bann barii na paaki, kimaan Yennu dɔkin bi yama. Ŋanne din te ki bi ki bann linba ki u piak na paaki.

Yisa nba nyɔɔnt jɔɔŋ biaŋinba

³⁵ Ki Yisa nba din tan per Jeriko na, ki jɔɔnsɔɔ din be ki kar sanjokpiŋ ki din tuu mei,

³⁶ ki tan gbat ki niburchiauŋ gaar, ki u boi a “Bee tee?”

³⁷ Ki bi betɔ a “Yisa nba tee Nasaret nirɔ nee gaar.”

³⁸ Ki u yikin sanpaapowa a “Yisa, David yaaboonn, tinimin ninbaauk.”

³⁹ Ki sɔnliita na din tian u paak a wun ŋmin; ŋaan ki u bia ŋamm yikin sanpaapowa a “David yaaboonn, tinimin ninbaauk.”

⁴⁰ Ki Yisa set, ŋaan betib a bin dat jɔɔŋ maŋ ki baar nanɔ u boor. Wa din baar kpian Yisa yoonba ki Yisa boiɔ a

⁴¹ “A loon ki n tun bee ki turani?” Ki u jiin yetɔ a “N Yomdaanɔ, n loon ki a nyɔɔnt n ninbinae turin.”

⁴² Ki Yisa betɔ a “Nyɔɔntir! Fa teenin yada nee te ki a ninbina na la paaku.”

⁴³ Li taakpaak ni ki u ninbina nyɔɔnt ki u ji laat, ki waa Yisa ki saa ki dont Yennu sann. Yoo nba ki niib na la nna maŋ, ki bi kura ji piak Yennu.