Barŋanii nba ki LUK din sɔb nae na 17 - Yennu Gbounpaauŋ Mɔɔr

Toonbiit labaar

¹ Li yoo maŋ ki Yisa yet u poorpoweiteeb a “I daa dukii nan jinjammii kan baari; ŋaan li sii bi ki teen wunba te ki jinjammii baat niib paak.

² Bi-i bo-i jii naar ki lann u turu ni ki lu-u mɔkir ni, li bo sii sɔ nan wa bo sa te ki waas na yenɔkɔɔ-n tun toonbiit.

³ Soot i mɔŋ! “A naa bik-i tun bonbiir, fan kpaanɔ; ŋaan li-i tee ki u yaa a u biira, fan nyik u biit ki chabɔ.

⁴ Li-i tee ki u tun ki biira taar munnlore daar nɔɔk ni, ŋaan tuu baar a boor ni taar munnlore ki yaa a u biira, fan nyik chabɔ.”

Yada labaar

⁵ Li yoo maŋ ki ti Yomdaanɔ Yisa toomiinba yetɔ a “Pukint ti yada.”

⁶ Ki u jiin ki yetib a “Li-i tee ki i bo mɔk yada ki li yab ki baar nan jinjirik binn na, i bo tuu sa fit ki yet kpiik na, ‘Ŋabit a mɔŋ ki saan wuu mɔkgbeŋŋir ni,’ ki kpiik maŋ sa sak i mɔb ki set ŋabir.

Daabir toonn po

⁷ “Tɔn, i yenɔ-i mɔk daabir ki u ko tammɔnn amii ki kpaar pei, ki daabir na-i nyii kpaab ni ki kpen ŋaak ni, a kan yetɔ a ‘Baat yian ki tan kar ki di jeeti.’

⁸ A sa betɔ a ‘Liatir a kpakoliata ki bir, ŋaan lia tayeenii, ki teen n jeet ki sennin ki n baar na ki tan di ki nyu. Li poorpo ki a mun sa di ki nyu.’

⁹ A dukii nan chanbaa maŋ sa tur u daabir na niipoouk kimaan wa sak u mɔb na paakii? Aaii.

¹⁰ Li mun bia tee nnee i boor ni. Yoo nba ki i tun toonn nba ki Yennu turi na ki gbenn, yin yet a ‘Ti tee daabiyoonae. Ti kpan tuu tun linba ki ti bo sa tun na kuukɔɔe.’ ”

Yisa nba te ki gbaata piik paak biaŋinba

¹¹ Yisa nba din saa Jerusalem yoonba na, ki u din gar Samaria nan Galilee sinsuuk ni,

¹² ki din tan baar digbansiar; ki gbaata piik din chetɔ leŋ, ki bi din set banfɔkira,

¹³ ŋaan yikin sanpaapowa ki yeen a “Chanbaa Yisa, tinimit ninbaauk.”

¹⁴ Ki Yisa nba lab yoonba ki u yetib a “I saa man Yennu manteeb boor ni ki bin bikini got.” Li yoo maŋ ki bi ŋmat saa Yennu manteeb boor ni; ki bi ŋaat maŋ ji saa gbenn sɔnu ni.

¹⁵ Ki bi yenɔ nba bann nan u ŋaauk gbenn na, ki u ŋmat Yisa peŋ ki saa pak Yennu nan kunkɔsaakar,

¹⁶ ŋaan baar gbaan funfabir Yisa tɔɔnn ni ki turɔ niipoouk; ŋaan jɔɔ maŋ din tee Samaria nirɔe.

¹⁷ Ki Yisa din boi a “Niib piik kaa bo la paaku-uu? Ŋaan ki niib bannyia na be lia?

¹⁸ Bi sɔɔ ki jen a bin tan tur Yennu niipoouk see saamɔ na kuukɔɔee?”

¹⁹ Ŋanne ki u bet jɔɔ maŋ a “Fiit kii saa. Fa teenin yada na paake te ki a la paaku.”

Yennu naan baaru labaar

²⁰ Tɔn, ki Farisiinba din boi Yisa a “Yennu naan sa baar nlee yooe?” Ŋanne ki u din jiin ki betib a “Li ki tee i sa got la Yennu naan nba sa baar biaŋinba kaa.

²¹ Sɔɔ kan yet a ‘Gotir, ŋannii na,’ amii ‘Li be nawa,’ kimaan Yennu naan be i ni.”

²² Ŋanne ki u bet u poorpoweiteeb a “Yoo baat ki i tan sii summan ki i la min nisaarik Bik baaru, ŋaan kan la.

²³ Bi tan sa beti, ‘Gotir, u be leŋ,’ amii ‘Gotir, u be nna na.’ I daa saa gorii, ki bia daa waabi;

²⁴ kimaan min nisaarik Bik baaru tan sii tee kaman nan sanyikintii nba tuu nyikint ki yent sanpaapo kur nee.

²⁵ Ŋaan sinsinn n tan sa di fara bonchiann; ki mɔtana nigbouŋ bia tan sa yêtin.

²⁶ Nowa yoo nba din tee biaŋinba na, li mun bia tan sii tee nnee min nisaarik Bik baaru yoo.

²⁷ Nowa yooe ki bi din di jeet ki nyu, ki kɔɔnt poob, ki jikit bi waas ki teemm jab, ki tan tuu daar nba ki Nowa din kɔɔ ŋarungbeŋŋir ni ŋaan nyikib; ki nyunchiauŋ baar ki dii bi kura.

²⁸ Lot yoo na mun bia din tee nnee; ki bi din di ki nyu, ki daa bona ki kɔi bonkukɔit, ki buur tan, ki maa ŋei;

²⁹ ŋaan daar nba ki Lot din tan nyii Sodom, ki sarwuutaa nyii sanpaapo ki tan baa nan muu ki dii bi kura.

³⁰ Ki daar nba ki min nisaarik Bik tan sa dɔkit, li mun tan sii tee nnee.

³¹ “Li daar maŋ, jɔɔ nba be ditɔɔtuk paak, u daa siik ki kɔɔ u diiuk ni a wun saa jii u bona; ki wunba mun bia be kpaab ni, u daa ŋmat linba be poor po na boori.

³² Tîat Lot ŋaapoo barii po.

³³ Tɔn, wunba ki saak wun likin u saaŋmaŋ n paak, u tan sa kɔŋ u manfoor; ŋaan wunba likin u saaŋmaŋ n paak, ŋɔɔe tan sa la manfoor nan barmɔnii.

³⁴ N beerie, yoo nba ki n sa baar na, niib bannlee tan sii dɔɔ dɔɔnu ni, ki n tan sa jii yenɔ ŋaan nyik lɔɔ.

³⁵ Poob bannlee tan sii be ki naan dii, ki n tan sa jii yenɔ ŋaan nyik lɔɔ.

³⁶ Jab bannlee mun tan sii be kpaab ni, ki n tan sa jii yenɔ ŋaan nyik lɔɔ.”

³⁷ Ki u poorpoweiteeb boiɔ a “Ti Yomdaanɔ, lee?” Ki u jiin ki yetib a “Siaminba ki pɔit be, leŋe ki juut tikii.”