Barŋanii nba ki LUK din sɔb nae na 14 - Yennu Gbounpaauŋ Mɔɔr

Yisa nba din te ki baatɔɔ paak biaŋinba

¹ Tɔn, foon dasiar ki Yisa din tan kɔɔ Farisiinba yudaansɔɔ ŋaak ni a wun di jeet; ki binba be ŋaak maŋ ni din diisirɔ.

² Li yoo na ki baatsɔɔ baar u tɔɔnn ni, wunba ki bonwuunkar wuunɔ.

³ Ŋanne ki Yisa boi sennu wannteeb nan Farisiinba maŋ a “Ti sennu sak a nirɔ-n te ki baatɔɔ-n paak foon daarii?”

⁴ Ŋaan ki bi ŋmina. Ki Yisa gaar baatɔɔ maŋ ki te ki u paak. Li poorpo ki u chabɔ a u saa;

⁵ ŋaan betib a “I yenɔ-i mɔk boŋ amii naab ki u tan baa bunbunn ni foon daar, u kan donnɔ foon daar maŋii?”

⁶ Ŋaan ki bi ki fit jiinɔ siari.

Sikininmɔŋ po labaar

⁷ Li yoo na ki Yisa la ki binba tikir na loon bin gann yudamm kaanii boor ki kar. Li paak, ki u yimm barjouk a

⁸ “Bi-i yiina poochianu ki a baar, fa daa kaar yudaanɔ kaanu boori, kimaan li pasiar bi poŋ bo yiin sɔɔewa, wunba cheea,

⁹ ki yiintɔɔ maŋ sa baar a boor ni ki tan yeta a, ‘Fiit ŋaan turɔ u kaanu.’ Li yoo na, ki fan ji di fei ki ji fiir ki saan kar kpiŋ.

¹⁰ Tɔn, bi-i yiina poochianu ki a baar, fan kar kpiŋ; ki yiintɔɔ-n tan fit ki baar ki yiina, ‘N yɔɔk, baat na ki tan kar yudamm kaanii boor.’ Li yoo na ki a sa la nibaakir a leeb maŋ boor ni.

¹¹ Kimaan wunba kur dont u mɔŋ, Yennu tan sa sikinɔ; ŋaan wunba sikint u mɔŋ, Yennu tan sa donnɔ.”

Saantuk po

¹² Ŋanne ki Yisa bia yet wunba yiinɔ na a “Li-i tee ki a yiin jaamm, fa daa yi a yɔɔsinba amii a yɔɔrib amii a ninjamm amii a mɔkitleebi, kimaan ŋamm maŋ tan sa jiina bi jiinuwa, ki a tan sa gaar jiŋ.

¹³ Li-i tee ki a yiin jaamue, fan yiin talasdamm nan wɔbii nan dianii nan jɔɔnii,

¹⁴ ki Yennu sa pukina li paak, kimaan bi kan fit jiina ba dii linba na paaki. Yennue tan sa jiina yoo nba ki niburchimm tan sa fiir kuunfiiru daar na.”

Jaangbeŋŋir barjouk

¹⁵ Binba din di nan Yisa na yenɔ nba gbat linba ki Yisa pak na ki u yetɔ a “Binba sa di jeet Yennu naan ni, parpeenn sii tee bi yare.”

¹⁶ Ki Yisa yetɔ a “Jasɔɔ din be ki tan yaa wun di u jaangbeŋŋir, ki poi niib bonchiann.

¹⁷ Jaamm na yoo nba tan baar ki u tun u daabir a wun saan yiin niib nba ki u daan poib na, a bin baar na, a ki jeet na kur teen siira.

¹⁸ Ki bi kur taan dukin dudukyent, ki meiɔ a wun chabib ki bi daa baati; ki sinsinn yɔɔ na bet daabir na a ‘N daa kpapaaŋ. Li paak, chabimin ki n saan saa got;’

¹⁹ ki lɔɔ betɔ a ‘N daa naakookii piik; li paak, chabimin ki n saan bikimm;’

²⁰ ki lɔɔ mun bia betɔ a ‘N daa yonn n poopaaŋe, ki li paake te ki n kan fit baari.’

²¹ “Ŋanne ki daabir maŋ ŋmat ki saa bet u yomdaanɔ linba na kur. Ki u yomdaanɔ maŋ wutoor doo bonchiann, ki u bet u daabir na, ‘Nyimin ki saan doo ni yian yian, ki saa got sɔnii ni, ki yiin talasdamm nan wɔbii nan dianii nan jɔɔnii ki jen namm na.’

²² Li poorpoe ki u daabir na saan ki jen yet a ‘Chanbaa, n teen fa yet linba nawa, ŋaan ki yiar daa be.’

²³ Ŋanne biak ki u yomdaanɔ na yet u daabir na a ‘Nyimin biak ki saan digbankpinii ki saa got pana paak nan sanjobis ni, ki te ki niib-n baar, ki n ŋaak-n gbee.

²⁴ Ŋaan binba ki n daan yiimm ki bi yêt baaru na, bi sɔɔ poŋ taan kan lemm n jaamm dinu na kaawa.’ ”

Yisa weiu labaar

²⁵ Sianyoo ki niburchiauŋ din waa Yisa; ki u tan jiant ki yetib a

²⁶ “Wunba loon ki wuu be nanin, see ki wuu loonin ki gar wa loon u chanbaa, nan u naa, nan u poo, nan u waas, nan u yɔɔrib, nan u waarii, nan u mɔŋ manfoor biaŋinba na. Li-i kii tee nnai kaa, u kan fit ki teen n poorpoweitɔɔ.

²⁷ Wunba ki likin u saaŋmaŋ ki jii u kuun dapunpunn ki buk ki waami, u kan fit ki teen n poorpoweitɔɔ.

²⁸ “Wunba loon ki wun maa dɔuŋ, see ki wun kar sinsinn, ki dukin wa sa teen biaŋinba ki soor li mɔb, ki laan u likirii sa jaŋ amii li kan jaŋi;

²⁹ kimaan li-i kii jaŋie, ki u fɔkin fiakir na ŋaan tan ki fit kaar maaru maŋi, ki niib tan la ki bann nan u ki fit kaar dɔuŋ maŋi, bi ji sii laaue ki sarikitɔ.

³⁰ Bi ji sii yeen a ‘Jɔɔ na daan fɔkin u dɔuŋ ŋaan tan gbar kaaru.’

³¹ “Kpanbar-i mɔk niib tusa piinnlee ki saan namm a wun took u kpanbar lɔɔ nan u niib tuspiik mun, nlee ki kpanbar nba mɔk niib tuspiik na sa teeni? See ki u kar sinsinn ki dukin ki bann ba sa jaŋ nan ba kan jaŋ nan u tooku.

³² Bi-i kii jaŋie, see ki wun tun toomii ki bin ŋak faauk, wa daa be banfɔkir na.

³³ “Tɔn, nirɔ-i kii nyik u mɔkint kuri, u kan fit teen n poorpoweitɔɔ kaa.

Yaarin labaar

³⁴ “Yaarin man; ŋaan li manu-i taŋŋi biir, nlee ki li ji sii mani?

³⁵ Li lek ki ŋan ki a jiir ki pak kpaab ni, ki bia ki ŋan ki a pukin lulin po. See ki a lu. Wunba mɔk tuba, wun gbiint.”