Barŋanii nba ki LUK din sɔb nae na 12 - Yennu Gbounpaauŋ Mɔɔr

Kpinkpannii damm labaar

¹ Li yoo maŋ ki niib tusa tusa din muk lakin leeb, ki tan ŋmaat leeb taagbina, ki Yisa din pak nan u poorpoweiteeb sinsinn ki yaa a “I mi man Farisiinba binbeŋ po, kimaan bi tee kpinkpannii damme.

² Barsai kaa ki dɔɔk ki tan kan nyi paanu ni; siar mun ki be woonin ni ki bi tan kan banniri.

³ Li paak, labaar nba ki i pak woonin ni, ŋaan see ki li tan nyii paanu ni; linba ki i lek lɔkin diit ni gbaa, ŋaan li tan sa woot ki mɔɔnt nyiwa.”

Ti sa tin ŋmee jaŋmaanii?

⁴ “N yɔɔsinba, gbiintir man, i daa tiin niib jaŋmaanii man, kimaan bi sa fit kpi i gbanant kuukɔɔe; ŋaan kpinu poorpo bi ji kan fit teeni siari.

⁵ N kpaani wunba ki i sii tiinɔ. Tinin Yennu, wunba sa kpi ki bia mɔk yikoo nba ki sa lui muu nba kan mi kpeen na ni. N beerie, tinin ŋɔɔe man.”

⁶ “Bi kɔi jinjera baŋŋmu kobu kuukɔɔe, ŋaan Yennu ki mi tamm nan bi yenɔkɔɔ poa gbaa.

⁷ Ŋannimi Yennu poŋ mi i yura paak yut kann. Li paak nna, i daa tiin jaŋmaanii, kimaan i mɔk nyɔɔt ki gar jinjera bonchiann.”

I nyint a mɔŋ paanu ni nan a tee Yisaweirɔe

⁸ “Wunba nyint u mɔŋ paanu ni niib boor ni nan u tee n weirɔe, min nisaarik Bik mun tan sa nyinnɔ paanu ni Yennu malakanba boor ni;

⁹ ŋaan wunba yaa a u ki tee n weirɔ, niib ni, min nisaarik Bik mun tan sa yet a n ki miu, Yennu malakanba maŋ boor ni.

¹⁰ “Wunba pak mɔbonn ki biir min nisaarik Bik, Yennu sa fit nyik chabɔ; ŋaan wunba sukii Yennu Seyeeŋ, Yennu kan nyik chab li daanɔ.

¹¹ “Bi-i soori ki baar nani Yenjiantu diit ni amii kpanbara boor amii tiŋ yudamm boor, i daa te ki li daamiini nan ya sa pak jiin biaŋinba, amii ya sa pak linba,

¹² kimaan li yoo nee ki Yennu Seyeeŋ tan sa wanni biaŋinba ki i sa pak.”

Mɔkitɔɔ nba din tee jatuk labaar

¹³ Li yoo maŋ ki jasɔɔ din yet Yisa nibur na ni a “Wanntɔɔ, betir n yɔɔrɔ na ki wun bɔkit ti baa faar ki turin.”

¹⁴ Ki Yisa yetɔ a “Li ki lami nan ki n teen i barbuurɔ ki bɔkit i faar maŋi.”

¹⁵ Ŋanne ki Yisa ŋamm pak nibur na a “I mi man mɔkint loomm po. Mɔkint bonchiann kaa sa te ki nirɔ-ii mɔk manfoori.”

¹⁶ Ŋanne ki u yimm barjouk a “Mɔkitsɔɔ din be ki mɔk u kpaab, ki u kpaab na din teenɔ jeet bonchiann;

¹⁷ ki u tan dukin dudukit a ‘N sa teen nlee, kimaan n ki mɔk yiar nba ki ji sa teen n jeet na kur leŋi.’

¹⁸ Ki u yet u mɔŋ a ‘N sa teen nnee; n sa yeer n bɔkpera nee ŋaan ŋamm maa bɔpaansaakara. Leŋe ki n ji sa teen n dii nan n bonkokoot kura;

¹⁹ ki n bia sa yet n mɔŋ a: N mɔk jeet nba sa jaŋ nan bina saama; n ji sii foi ki di ki nyu ki mɔk parpeenn.’

²⁰ Ŋanne ki Yennu yetɔ, ‘Jajatuk na! Nyiɔk na, a manfoor sa kat. Ŋaan laan, a mɔkint nba ki a mɔk na, ŋmee sa yenti?’

²¹ “Tɔn, wunba kur tikii mɔkint ki teen u mɔŋ, ŋaan ki mɔk mɔkint Yennu boori, u mun tee kaman nan jajatuk na nee.”

Teent Yennu yada

²² Ŋanne ki Yisa yet u poorpoweiteeb biak, “Li paak ki n beeri, i daa te ki li mukisi i binbeŋ po nan ya sa di linba, ki bia daa te ki li mukisi i gbanant po nan ya sa lia linba,

²³ kimaan manfoor gar dinua, ki gbanant mun gar tiata.

²⁴ Gotir nɔɔnii, bi ki buur jeeti; bi bia ki jaami; bi bia ki mɔk dii naapaatii amii suka, ŋaan Yennu dintib; i ki mɔk nyɔɔt bonchiann ki gar nɔɔnii-ii?

²⁵ I ŋmee sa fit fɔkin u manfoor u dudukit ni nba mukisɔ na paaki?

²⁶ Ya ki fit tun bonbik na, bee ki li sii daamii-i nan bongbeŋŋir tumu?

²⁷ Gotir man tipuuk nan li ŋant; ŋaan bi ki tuun ki luu bi mɔŋ chinchena; ŋaan n beeri na, kpanbar Solomon nba din lek mɔk taŋana biaŋinba, u din ki mi lia tiat ki li ŋan kaman nan tipuuk na gbaa.

²⁸ Mɔɔt nba be dinna, ŋaan wonn ki bi joo muuwa, Yennu nba faŋŋitir biaŋinba na, ki u kan gbabin yimmii? Yimm yadakanpɔɔna damm na!

²⁹ “I bia daa gbaa nan ya sa di linba amii ya sa nyu linba, ki bia daa mukis i dudukit,

³⁰ kimaan nibooru kur nba be tingbouŋ na ni tuu mukis bi dudukit linba na paake. Ŋaan yimm ŋanin, i Baa Yennu poŋ mi nan i loon linba na.

³¹ Li paak, ŋaant ki i baka-ii be Yennu naan ni, ki u sa jii bona nba na ki turi.

Yendɔuŋ ni mɔkint labaar

³² “N niib nba ki yab na, i daa tiin jaŋmaanii, kimaan i Baa Yennu yaa wun turi naan maŋ, ki bia mɔk parpeenn nan wa sa turi na paak.

³³ Li paak amii, kɔin i bona nba ki i mɔk ki jii li likirii ki tur talasdamm, ki i tan sa la mɔkint nba ki mɔk gbennu. Mɔkint maŋ sii be Yendɔuŋ ni, ki kan wati, kimaan nanyukɔɔ kan kpian leŋi, ki bonŋmiŋmabit bia kan mɔɔri.

³⁴ Siaminba ki a mɔkint be na, a dudukit mun be leŋe.

Daaba nba teen siir barjouk

³⁵ “Teent siir man ki daa yokitir i tiati, ki ŋaan ki i fita-ii di,

³⁶ kii tee kaman nan niib nba tuu guu bi chanbaa nba tuu nyi poochianu ki kpen ki tan baar yiin a bin loot gann turɔ, ki bin loot gann yiama na.

³⁷ Daaba nba ki bi chanbaa kpen ki lab ki bi guu u kpenu na, parpeenn tee bi yare. Barmɔniie ki n beeri na, bi chanbaa na sa te ki u daaba-n kar ki wun baar nan jeet ki turib ki bin di.

³⁸ Li-i tee ki bi chanbaa taŋŋi kpen tansuunii amii kojomɔɔk, ki la ki bi guu-u, parpeenn sii tee daaba maŋ yare.

³⁹ “Nnara, li-i tee ki ŋaadaanɔ poŋ mi yoo nba ki nanyukɔɔ sa baarie, u kan ŋaan ki wun baar kɔɔ; u sii guue.

⁴⁰ Yimm mun-n teen siir kii guu, kimaan min nisaarik Bik tan sa jen yoo nba ki i ki daan a n sa jene.”

Daabir nba sa sak u chanbaa mɔb biaŋinba

⁴¹ Ŋanne ki Piita boi Yisa a “N Yomdaanɔ, a yiin timme barjouk na amii sɔɔ kure?”

⁴² Ki ti Yomdaanɔ Yisa jiin ki yetɔ a “Daabilannɔe tee yandaanɔ ki tuun u chanbaa nba wantɔ biaŋinba? ŋɔɔe tee wunba ki u chanbaa sa teenɔ daabiyudaanɔ a wuu gorii daaba kur nba be u ŋaak ni, kii teemm mann yoo kur nba jaŋ.

⁴³ Li-i tee ki u chanbaa tan kpen ki la ki u tuun nna, parpeenn sii tee daabir maŋ yare.

⁴⁴ Barmɔniie ki n beerie na, ŋaadaanɔ maŋ sa jii u mɔkint kur ki teen daabir maŋ nuu ni a wuu goriir.

⁴⁵ Ŋaan li-i tee ki daabir maŋ yet u mɔŋ a u chanbaa kan jen yiami, ki ji piin ki boo u daabilia na, jabii, poobii, ki u boob, ki bia di ki nyu daan ki tan yib,

⁴⁶ u chanbaa tan sa jen daar nba nan yoo nba ki daabir maŋ ki daan a u sa jene, ki tan sa dat u tubir bonbiir, ki teenɔ kaman nan wa tuu teen mɔyêtdamm biaŋinba na.

⁴⁷ “Daabir-i mi linba ki u chanbaa loon wun tun, ŋaan ki teen u mɔŋ siiri, ki bia ki tumi, bi sa boou kpaasir bonbiir.

⁴⁸ Daabir-i kii mi linba ki u chanbaa loon wun tun, ŋaan kpet tun bonkpetir nba jaŋ nan boot, bi sa boou waaminna ŋaan ŋaau. “Wunba ki bi turɔ saan, ŋɔɔe ki bi tan sa boi gaar saan; ŋaan wunba ki bi kubinɔ saama, ŋɔɔe ki bi tan sa boi ki gaar bonchiann mun.”

Bɔkitu labaar

⁴⁹ “N baar ma n lu muue tingbouŋ na ni, ŋaan n summan ki li poŋ yinnama.

⁵⁰ Bi sa te ki n sik nyun yiaka, ki li teenin parbiir bonchiann mɔkmɔk nan la tan sa teen ki gbenn.

⁵¹ I dukii mi a n baar nan parmaasir tingbouŋ na niee? Aaii. N beerie, n baar nan bɔkitue.

⁵² La jii dinna ki saa, niib baŋŋmu tan sii be ŋaak ni, ki bi tan sa bɔkit; ki banntaa sii biir bannlee, ki bannlee na mun sii biir banntaa maŋ.

⁵³ Baanba tan sii biir bi waas, ki bi waas mun tan sii biir bi baanba; ki naanba tan sii biir bi bonpoi, ki bi bonpoi mun tan sii biir bi naanba; ki siponaanba tan sii biir bi sipopoi, ki bi sipopoi na mun tan sii biir bi siponaanba maŋ.”

Yoo bannu labaar

⁵⁴ Li yoo maŋ ki Yisa pak tur nibur na ki yet a “Yoo nba ki i tuu tan la sanpagbant ki lin do poorpo, ki i tuu yet yiama a saak sa baawa, wun set tan baa.

⁵⁵ Yoo nba ki i laat ki niigaŋ po wouŋ da, i tuu yaa a naauk sii be, ki lin set tan toŋ.

⁵⁶ Yimm kpinkpannii damm na, i kpann i mɔŋe; i fit bukitir saak nan naauk baaru yoo, ŋaan bee teen ki i kan fit bann mɔtana yoo na paaki?

Maan ŋammu labaar

⁵⁷ “Bee teen ki i kan fit dukin i mɔŋ ki bu linba tookiini?

⁵⁸ Li-i tee ki fin nan sɔɔ mɔk maan kii baar nan maan maŋ bat boor, ya bo daa be sɔnu paak ki baat na, li bo ŋan ki i kot i mɔŋ ki ŋamm maan maŋ. Li-i kii tee nnai kaa, u sa data baar nana barbuurɔ boor, ki barbuurɔ na mun sa jiia ki teena dansarguutɔɔ nuu ni, ki dansarguutɔɔ na mun sa kɔɔna dansarik.

⁵⁹ N beerie, bi kan mi ŋaani, see ki a tan pa likirii kur nba ki bi jiiara na, nan jinjema kan tenni.”