Kolosa teeb 4 - Yennu Gbounpaauŋ Mɔɔr

¹ Yomdamm, yii tuun fanu tur i daaba man, kii mi nan i mɔŋ mun mɔk Yomdaanɔ Yendɔuŋ ni.

Kpaanii labaar

² Yii yabii nan Yenmiaru man, kii mei ŋɔɔ Yennu nan nunmɔnn, ki turɔ niipoouk,

³ kii biakii meiɔ kii teent ki tin fit la yaak ki mɔɔnt barŋanii ki fiit Masia woonin ni barii, kimaan barii maŋ paake te ki n kɔɔ dansarik na.

⁴ Li paak, yii mei Yennu kii teenin ki n fit pak kaman nan la kpaa talas nan min pakir fanu biaŋinba na.

⁵ I mi man i binbeŋ nba tee biaŋinba ki tur binba ki tee Masia niib na, kii jii i yoo kii tuun fanu.

⁶ Li kpaa talas ki i mɔbona-ii man, kii mɔk baakir, ki yii mi biaŋinba ki i sa gat buboit ki lii took ki tur sɔɔ kura.

Foontjoontii labaar

⁷ Ti naa bilonkak Tikikus, wunba tee yada daanɔ, ki bia tee ti toontunanlɔɔ ti Yomdaanɔ ni na sa beti n labaar.

⁸ Li paake te ki n tumɔ i boor ni, ma wun beti ti kur nba be biaŋinba, ki i para-n dɔɔr.

⁹ Ŋɔɔ nan Onesimus, wunba tee ti naa bilonkak nba mɔk yada ki tee i yɔɔ nee sa saan. Bi sa beti bonsiar kura nba tuun nna na.

¹⁰ Aristakus, min nan wunba kɔɔ dansarik na foonti, ki Banabas niipoo bija Mak mun bia foonti. (I daan poŋ gaar n kpaanii, ma Mak-i taŋŋi baar i boor ni, yin gaarɔ.)

¹¹ Joshua, wunba sann yi Justus na mun teeni u foontii. Bi banntaa nba na kuukɔɔe tee Juu teeb nba waa Masia ki tuun nanin Yennu naan toona maŋ ni. Ki bi maak n par.

¹² Epafras wunba mun bia tee i yenɔ nan Yisa Masia toontunnɔ na foonti. U mei Yennu nan nunmɔnn yoo kura ki teeni a ŋɔɔ Yennu-n te ki yin set kenken, kii tee nisubirteeb nba tuun Yennu loomm na,

¹³ kimaan n dii u siara nan u set tun bonchiann ki sommiti nan Laodisea teeb nan Hierapoli teeb.

¹⁴ Ti naa bilonkak Luk, wunba tee baat-tebirɔ na, ŋɔɔ nan Demas foonti.

¹⁵ Yii foont ti naa walonkai nba be Laodisea na, ki bia foont ti niipoo Nimfa nan Masiaweira nba lakin leeb u ŋaak ni a bin jiantir Yennu na.

¹⁶ I-i karin gbouŋ na gbenn yoonba, yin yabir ki bia karin ki tur Masiaweira nba mun be Laodisea na, ki bia karin Laodisea teeb gbouŋ nba ki n daan sɔb turib na.

¹⁷ Yi bet Akipus a wun yabir u mɔŋ kii tuun toona nba ki ti Yomdaanɔ din turɔ na fanu.

¹⁸ N sɔb linba na nan n tiauŋ nuue: Min Pɔɔl foonti. I daa tammit ma baa nan bant na po. Yennu-n sommi.