Kolosa teeb 3 - Yennu Gbounpaauŋ Mɔɔr

¹ I din fiir nan Masia kuun ni, li paak yi jii i para gaan nan sanpaapo bona, siaminba ki Masia kar Yennu niidiitu po na.

² Yii lor i dudukit nan leŋ bona na, ŋaan daa lorinn nan tingbouŋ na bona kaa,

³ kimaan i poŋ din kpo nan Masia, ki bɔr i manfoor nanɔ Yennu ni.

⁴ Masia nba teent manfoor na nba tan sa dɔkit yoonba, i mun tan sa dɔkit nanɔe nan yentchiauŋ.

Manfopaann nan manfokper labaar

⁵ Li paak, yi nyik tingbouŋ na ni niauŋ nba tuun toona i ni na; li yenninbae tee bonchonchonsin, nan linba tee jakint toona, nan kunkɔmaasu, nan nianbiiuk, nan nianchiauŋ, linba tee patmannu booru.

⁶ Nanna paake te ki Yennu wutoor tan sa do binba ki sak u mɔb na paak.

⁷ Sianyoo li niauŋo din tuu yeni, ki i din be li ni.

⁸ Ŋaan mɔtana yi fian linba na nba munna ki lu; ki linba tee naŋ, nan wutoor, nan nifobiisin, nan niib sanbiiruk, nan barbiit, i daa te ki li nyi i mɔi ni.

⁹ I daa fa faak ki teen leebi, kimaan i poŋ nyik linba tuu tee i binbenkper na nan li toonawa;

¹⁰ ŋaan ji mɔk linba tee binbenpaaŋe. Binbenpaaŋ nee ki Yennu nba tee li nantɔɔ na pantir yoo kura, ki li naan u mɔŋ binbeŋ, a wun te ki yin bannɔ setik nan mɔnii.

¹¹ Li paak, bɔkitu ji kaa binba tee Juu teeb nan binba ki tee Juu teeb sinsuuk ni; binba pot puna nan binba ki pot kura ji ki mɔk bɔkitu nan leebi; bɔkitu ji kaa muuk ni niib nan doo ni yab sinsuuk ni; bɔkitu bia kaa daaba nan yentinmɔŋ damm sinsuuk ni, ŋaan i kur tee Masia yab, ki u be i kur ni.

¹² Li paak, ya tee Yennu nigannkab ki tee popeendamm ki bia tee u walonkai na, yii mɔk ninkpabauŋ, nan burchint, nan sikininmɔŋ, nan soonna binbeŋ, nan sukuru,

¹³ kii di leeb sukuru; ki sɔɔ-i mɔk bunburimii u lɔɔ paak, wun nyik chabɔ. Li kpaa talas ki yin mun nyik chab leeb kaman nan ti Yomdaanɔ nba poŋ nyik chabi biaŋinba na.

¹⁴ Yi pukin loomm; ŋanne fan ki gar binbeŋ kur, ki taan dia li kura nan barmɔnii mɔtaauk.

¹⁵ Yi ŋaan ki Masia parmaasir nba na-ii dia ya dukii linba; Yennu lakin yiini gbananyennkɔɔ ni a yii mɔk parmaasir maŋe. Li paak, yii teen Yennu niipoouk man.

¹⁶ Li kpaa talas ki Masia labaar na-ii be i para ni chib chib, kii want i leeb, kii bia kpaan i leeb nan i yan kur; kii yiin Yennu gbouŋ ni yanii, nan yenpaku yanii, nan Seyeeŋ yanii; kii yiin yanii kii teen Yennu nan niipoouk i para ni.

¹⁷ Li paak, ya tuun linba, amii ya yeen linba, yii tuun nan ti Yomdaanɔ Yisa sann ni, kii teen ti Baa Yennu niipoouk u sann ni.

Masia niib binbeŋ labaar

¹⁸ Poob, yi jii i mɔŋ tur i sɔrib, kaman nan la kpaa talas nan Masia niib-ii tuun biaŋinba.

¹⁹ Poosɔrib, yii loon i poob man, ki daa dia nibisin benu ki be nammi.

²⁰ Waas, yii saak i damm mɔi yoo kura, kimaan ŋanne pent Yennu par ni.

²¹ Baanba, i daa dont i waas wutoa, i-i tee nna bi sii mɔk parbiire.

²² Daaba, yii saak i yomdamm mɔi bonsiar kur ni, ki li daa tee yoo nba ki bi gorii-i na kuukɔɔ kaa, a yin penn bi para ki gaar pinpakiti, ŋaan yii tuun nan nunmɔnn yoo kura, kimaan ya baak ti Yomdaanɔ biaŋinba na.

²³ I-i tuun linba kur, yin tun nan nunmɔnn kaman nan i tuun teen ti Yomdaanɔe, ŋaan ki li ki tee nisaarik kaa.

²⁴ Yi tian man nan ti Yomdaanɔ maŋ tan sa turi nyɔɔt nba tee u niib yar sanpaapo, kimaan Masia tee barmɔnii Yomdaanɔ ki i tuun teenɔ.

²⁵ Ki biitdaanɔ mun tan sa gaar u toonbiit tubdatu, wa tun linba paak, kimaan Yennu tan sa dat u tuba, ki lukitin kaa.