Kolosa teeb 2 - Yennu Gbounpaauŋ Mɔɔr

¹ Kimaan n loon ki yin bann n baka nba be i ni biaŋinbae, nan Masia niib nba be Laodisea, nan binba daa ki mi lan nan bi ninbina na.

² N yaa bi para-n chee, ki bin lakin taan leeb nan loomm, ki bann Yisa barii paak, ki teenɔ yada nan barmɔnii, ki daa mɔk birsuku, ki bann Yennu woonin ni labaar maŋ, linba tee Masia po;

³ ki ŋɔɔ kuukɔɔe mɔk barmɔnii yan nan bannu kura.

⁴ Li paak te ki n beeri, i daa te ki sɔɔ-n jii mɔmant ki kpanniini,

⁵ kimaan ma lek ki be i peŋ nan n gbanant na, ŋaan n seek be nani, ki n par peen i paak ma la ya be fanu biaŋinba na, nan ya teen Masia yada nan barmɔnii biaŋinba na.

Barmɔnii manfoor be Masia nie

⁶ Biaŋinba ki i din poŋ gaar Yisa Masia a wuu tee i Yomdaanɔ na, yii be u ni nna man,

⁷ ki sikin i yada jiina u ni, ki i yada-ii be u ni, ki i yada-ii mɔk paŋ kaman nan ba din wanni biaŋinba na, kii teenɔ niipoouk yoo kura.

⁸ Li paak, i daa te ki sɔɔ dia nisaarik yan kpinkpann-yana ki kpanni; linba ki gaa nan Masia po, ŋaan tee tingbouŋ na yan nan nisaarik wannu,

⁹ kimaan Masia gbanant nie ki Yennu ninnauŋ be,

¹⁰ ki i gaar manfomunn yimm nan u benu ni. Ŋɔɔe tee yudamm nan paŋ damm kura paarɔ.

¹¹ Yimm nan u benu nie ki i gaar punpotu; ŋaan li ki tee nisaarik nuu pot i gbananti; Masia punpotu na nee nyinnit biit ni,

¹² kimaan ba din wuri Yennu nyunwuru yoonba na i din pukin Masia poe ki bi pii-i, ki i bia fiir nanɔ nyunwuru maŋ ni, i yada nba be Yennu paŋ toona nba din fiin Masia kuun ni na paak.

¹³ I din tee kpeemme sianyoo, kimaan i toonbiit paak nan ya din ki tee Juu teeb, ki bia din ki mɔk sennu na paak. Ŋaan mɔtana Yennu nyik chab i toonbiite, ki turi manfoor Masia ni.

¹⁴ Ba din kpaau dapunpunn paak yoonba na, u din kpeen ti biit pann nba din sɔb dɔɔ na nan li sennu munn munn na.

¹⁵ Dapunpunn maŋ paake, ki Masia din biir Sintaanii nan narinbiit paŋ kura, ki din nyinn wa din nyannib biaŋinba na siara paanu ni.

¹⁶ Li paak, i daa te ki sɔɔ senti sennu ya sii di linba, amii ya sii nyu linba; i daa te ki sɔɔ gani jaamm dagaŋŋa, amii ŋmaapaaŋ daa, amii foon daa ki teeniini.

¹⁷ Li sennu booru din tee yunyuŋo ki want nan sɔɔe baat; li yɔɔe tee Masia.

¹⁸ Sɔɔ-i yaa ŋɔɔe gar leeb ki laat yerintii ki loon a yi sikin i mɔŋ kii jiantir malakanba, i daa saak man; nna sa biiriwa. Li daanɔ dont u mɔŋ u dudukbiit ni, ŋaan ki li kaa paaki;

¹⁹ u ji ki dia Masia; ŋɔɔ Masia tee u niib yur, ŋaan taamm, ki bi gaa nan leeb kaman nan gbanant tukita nan li jiina na, ŋɔɔ Masiae dintib ki bi nɔbii kaman nan Yennu nba loon biaŋinba na.

Barmɔnii manfoor tee Masia yare

²⁰ I kpo nan Masia, ki u fati dunia ni bona paŋ yent ni, ki bee ki i jin be kaman nan i bia daa tee tingbouŋ na yabi? Bee te ki i jɔbi i mɔŋ tee sennii nba yaa a

²¹ “A daa so nanna,” amii “A daa lemi linba na,” amii “A daa siit bonsia,”

²² linba ki nirɔ sa di ki lin biir ki kan yukiri. Li sennii tee nisaarii wannue.

²³ Setik nan mɔniie, li sennboorii naan linba mɔk yame, ŋaan li ki mɔki; bi jiantir ba loon biaŋinbae, ki sikint bi mɔŋ, ki mukis bi gbanant; ŋaan nirɔ-i wei linba na kur, li kan fit sommɔ ki wun dia u gbanant loommu.