Kolosa teeb 1 - Yennu Gbounpaauŋ Mɔɔr

¹ Min Pɔɔl, wunba tee Yisa Masia toomii Yennu loomm paak na, nan ti naa bik Timoti, sɔbin gbouŋ na

² ki teen Yennu niib nba be Kolosa ni, ki tee ti naa waas nba teen Masia yada na. Ti Baa Yennu-n sommi, ki bia turi parmaasir.

Pɔɔl nba teen Yennu niipoouk Yenmiaru ni biaŋinba

³ Ti-i mei Yennu i paak yoonba, ti teen ŋɔɔ Yennu wunba tee ti Yomdaanɔ Yisa Masia Baa na niipoouk yoo kura,

⁴ kimaan ti gbat ya teen Yisa Masia yada biaŋinba na, ki bia loon Yennu niib kura,

⁵ kimaan pinpiik ni ya din gbat barmɔnii barŋanii yoonba, i din gbat bonŋana nba guui Yendɔuŋ ni na poe.

⁶ Ki barŋanii maŋe baat nani kaman nan la yat ki kpaatir tingbouŋ na kur ni ki ŋammit niib binbeŋ, ki bia tuun nna i mɔŋ boor ni, la nyii daar nba ki i din gbat ki bann Yennu ninbatinu nan barmɔnii maŋ nba tee biaŋinba na.

⁷ I din tumii Yennu ninbatinu maŋ po ti toontunlɔɔ Epafras wunba ki ti loonɔ na boor ni; ŋɔɔe tee Masia toontunnɔ nba tuun nan barmɔnii i boor ni ki turit,

⁸ ki bia betit i loomm nba tee biaŋinba Yennu Seyeeŋ ni.

⁹ Linba na paak, ta daan gbat i po, ti ki nyik Yenmiaru i paaki a ŋɔɔ Yennu-n te ki i bann u loomm nba tee biaŋinba, ŋaan turi Seyeeŋ yan nan li subinii kur,

¹⁰ ki yin fit kii be kaman nan ti Yomdaanɔ nba loon biaŋinba, ki bia fit kii tuun linba sii pent u par, ki yin fit kii tuun toonŋana kur, kii ŋammit bant Yennu.

¹¹ Ŋɔɔ Yennu-n turi paŋ bonchiann kaman nan wa mɔk paŋ kur biaŋinba na, linba sa te ki i mɔk gbankur bonsiar kur ni, nan sukuru nan parpeenn.

¹² Yii teen ti Baa Yennu niipoouk man. Ŋɔɔe te ki ti jaŋ nan tin fit la yiar u boor, yentu ni, u niib sinsuuk ni,

¹³ ki bia nyinnit Sintaanii bunbɔnn naan ni, ŋaan jiit nan laafia ki kɔɔnt u Bilonkak maŋ naan ni.

¹⁴ U Bija maŋ paak ki u nyik chab ti biit ŋaan nyinnit daabsin ni.

Masia nan u toona labaar

¹⁵ Sɔɔ kan fit la Yennu, ŋaan u Bija maŋ Masia tee u naauŋo. Ŋɔɔe gar bont kura, ki tee Yennu bonnankaa kura yur,

¹⁶ kimaan u nie ki Yennu din nan bonsiar kur nba be sanpaapo nan tingbouŋ na ni. Ŋɔɔe din nan ta laat bona nba nan ta ki laat bona nba, yentdamm, nan yomdamm, nan yudamm, nan yikodamm. Yennu din nan bonsiar kura ŋɔɔ Masia nie, ŋaan jii bonsiar kur turɔ.

¹⁷ Ŋɔɔ Masia din be ki bonsiar kura din kaa, ki u paake ki bont kur daa be.

¹⁸ Ŋɔɔe tee u niib yur, ŋaan ki bi tee u gbanant. U niib maŋ manfoor nyi u boor nie. Ŋɔɔe tee Yennu Bija wunba din kpo ki fiir kuun ni sinsinn, a u kuukɔɔ-ii tee bonsiar kur yudaanɔ,

¹⁹ kimaan Yennu tiauŋ din dukin a li ŋan a Masia-ii mɔk ŋɔɔ Yennu ninnauŋ.

²⁰ Li paak, u Bija maŋ paake ki Yennu te ki bont kur nba be sanpaapo nan tiŋ ni ŋamm teemm u yɔɔsinba nan parmaasir; ki sɔn nba nyii u Bija maŋ ni dapunpunn paak na paake ki u te ki parmaasir be timm nan ŋɔɔ Yennu sinsuuk ni.

²¹ Sianyoo, i dudukbiit nan i toonbiit din te ki i tee Yennu dataie, ki fɔk nanɔ,

²² ŋaan mɔtana, u Bija gbanant kuun maŋ paak, u ji teeni u yɔɔsinbae a wun jii-i ki yii tee popeendamm, ki daa mɔk jakint nan biit, ki baar u boor ni,

²³ li paak, yii yabii man setik nan mɔnii, ki teen Yisa yada kii see chimm, ki daa fɔrii nyi dindann nba ki i la yoo nba ki i din gbat u barŋanii; ki bi din mɔɔntir barŋanii maŋ ki teen niib kur nba be tingbouŋ na ni; ki min Pɔɔl teen li toontunnɔ na.

Pɔɔl nba teen Masia niib toontunnɔ biaŋinba

²⁴ Ki mɔtana n mɔk parpeenn n fara dinu ni i paak, kimaan ma di fara maŋ biaŋinba na, n tontir fara dinu nba ki Masia din senn ma n di u gbanant nba tee u weira na paak na.

²⁵ Ki Yennu nba turin toonn maŋ a n tun na, ŋɔɔe teenin Masia niib maŋ daabir i sommir paak, a niib-n bann Yennu barii maŋ mun.

²⁶ Barii maŋe tee woonin ni maan nba ki Yennu din woon sianyoo, ki nibooru kur ki bannir, ŋaan ki u tan fiit wann u niib mɔtana.

²⁷ Yennu lor a wun fiit woonin ni maan maŋ ki wann u niib maŋe. U woonin ni maan maŋ ŋan bonchiann, ki tee niib kur yare. Li want nan Masia be i ni; li paak, i mɔk dindann nan i tan sii be fanu ki gbenn.

²⁸ Li paak, Masia maŋ poe ki ti mɔɔntir, ki kpaan sɔɔ kura, ki want sɔɔ kur nan yan booru kur, a tin te sɔɔ kur-n chee nan Masia weiu, ki jiib wann Yennu.

²⁹ Linba na paak ki n lek yabii nan n paŋ kur nba ki Masia turin ki li yab bonchiann.