Juud 1 - Yennu Gbounpaauŋ Mɔɔr

¹ Min Juud wunba tee Yisa Masia toontunnɔ, ki bia tee Jems naa bik nee sɔbin gbouŋ na ki teen niib nba ki ti Baa Yennu gannib ki loomm, ki Yisa Masia guub na.

² Yennu-n tini ninbaauk ki turi parmaasir nan loomm bonchiann.

Faidamm labaar

³ N walonkai, n ninbinn daan mɔnn nan ki n sɔb gbouŋ ki turi ki saan gaan tinnu nba tee ti kur yar na po; ŋaan mɔtana li ji kpaa talas ki n sɔb ki kpaani ki yin yabir i mɔŋ ki dia yada labaar nba ki Yennu din tur u niib na fanu, ŋaan daa saak ki sɔɔ-n lebitir,

⁴ kimaan nisiab nba ki tiin Yennu na din kɔɔ i sinsuuk ni woonin nie, ki lebit ŋɔɔ Yennu ninbatinu labaar a bii tuun bi gbanant loonbiit; bi ki saak Yisa Masia mɔbi; ŋɔɔ kuukɔɔe tee ti yudaanɔ nan ti Yomdaanɔ. Li yukira ki biitdamm maŋ tubdatu poŋ sɔb Yennu gbouŋ ni na.

⁵ Ma yaa n beti linba na, i poŋ gbat li kura, ki mir, ŋaan n loon ki n tiari li poe; ti Yomdaanɔ Yennu din fat u niib ki nyinnib Ijipt tiŋ ni, ŋaan li poorpo u din kpii bi siab nba din ki teenɔ yada na.

⁶ Nnee biak ki malakanba nba din ki dia yaak nba ki Yennu din turib na nan li sɔnu na, ki bia din ki biar be bi binbeboor sanpaapo, ki Yennu baamm bant ki lub sarik bootsunsuŋ nba bɔn ni, ki guu dagbeŋŋir nba ki u sa bu bi buut na.

⁷ Nnee biak ki doi nba ki bi yi Sodom nan Gomora na nan digbana nba kpiar na niib din tuun bonchonchonn toona ki bia waa niauŋ nba bi bonchiann, ki bi laat tubdatu nba tee muu ki li di yoo nba kaa gbennu; ki li tee kpaanii ki tur sɔɔ kura.

⁸ Nibooru maŋ mun bia daa mɔk dudukit nba ki bi tuun ki biir bi gbanant, ki bia tee tubkangbata, ki bia sukii Yennu malakanba.

⁹ Ŋaan malakanba saakɔɔ nba ki u sann yi Maikel na, ŋɔɔ nan Sintaanii nba din kɔn Moses gbanant paak na, ŋaan Maikel mɔsɔɔ din ki sukir Sintaanii, ŋaan din betɔ a “Ti Yomdaanɔ sa wanna yan.”

¹⁰ Ŋaan niib na ŋanin sukii bont kur nba ki bi ki bann li paake, ŋaan tuun linba kur ki bi loon kaman nan bonkobit nba ki mɔk dudukit na, ki biir bi mɔŋ.

¹¹ Parbiir be bi paak; kimaan bi wei Keenn sɔnbiiuk nawa; bi bia tee kpinkpannii damm likirii paak kaman nan Balaam nba din tee biaŋinba na; ki bia tuun kaman nan Kora nba din tun ki ki sak Yennu mɔb ki tan kpo na; bi mun tan sa kpo nnee.

¹² Bi tee baritee i mɔtaauk jaamm dinu ni, ki lakin di nan leeb, ki ki tiin Yennu, ki mɔk gɔrit ki dint bi mɔŋ kuukɔɔ. Bi tee kaman nan sanpagbant nba ki baat nan saak ŋaan ki wouŋ da nee; ki bia tee kaman nan tiinii nba ki loon li lomm yoo na, bi kpoe ki sa tɔr, kimaan bi jiina kur fikita ki bi koor.

¹³ Bi tee kaman nan mɔkgbeŋŋir nyunpana nba fi ki pukir nan jakint nee. Bi bia tee kaman nan ŋmaabira nba tuu ŋabir ki lin nee; ki bunbɔnchiauŋ nba kaa gbennu be ki guub.

¹⁴ Enok wunba paa Adam yoo paak munnlore ni na din sɔkin ki yet bi po a “Ti Yomdaanɔ nan u malakanbaŋamm tusa tusa baat

¹⁵ a wun bu nifosaarik kur buut, ki biir binba kur ki tiinɔ, ba tuun toonbiit, ki ki saak u mɔb biaŋinba na; nan biitdamm kura, ba piak mabiit kur ki biirɔ biaŋinba na, ki bi baka kaa nanɔ.”

¹⁶ Bi tee bunburimii damme; bi numm ki mi gboo; ki bi tuun bi mɔŋ loonbiit, ki mɔk parbifaant bonchiann, ki korin niib a bin la siar.

¹⁷ N naa walonkai, i tian man maan nba ki ti Yomdaanɔ Yisa Masia toomiinba din yet na.

¹⁸ Bi din yet a “Dajoontii daa maŋ ni, niib nba waa bi mɔŋ gbanant loonbiit na tan sa fiir ki sarikiti.”

¹⁹ Li niboorue baat nan bɔkitu i sinsuuk ni; bi gbanant loomm kuukɔɔe diab, Yennu Seyeeŋ kaa bi ni.

²⁰ N naa walonkai, yii chee i para man Masia labayeen nba ki i teenir yada na paak, kii mei Yennu u Seyeeŋ paŋ ni,

²¹ kii tee niib nba ki Yennu loomm, kii guu yoo nba ki ti Yomdaanɔ Yisa Masia sa turi manfoor nba kaa gbennu, u ninbatinu paak.

²² Binba dudukit laŋ na, yi tinib ninbaauk, ki soorib

²³ ki nyinnib Sintaanii muu ni; ki binba mɔk bi loonbiit dɔk na, yi tinib ninbaauk, ki bia ŋmat nan jaŋmaanii bi boor, i daa nakii bi biit boori.

Yenpaku

²⁴ Yennu sa fit guui ki i daa baa, ki sa baar nani u tɔɔnn yentsaakar ni, ki i ki mɔk biiti, ŋaan sii mɔk parpeenn bonchiann;

²⁵ ŋɔɔ nba tee Yen-yenɔkɔɔ ki tinnit ti Yomdaanɔ Yisa Masia paak na, u yen paku nan yent nan paŋ nan bont kur yudant, yoo nba din gar na, nan mɔtana, nan yoo nba kaa gbennu. Mɔmɔmm.