Jɔɔnn 8 - Yennu Gbounpaauŋ Mɔɔr

Poochonchonsɔɔ labaar

¹ Li poorpoe ki sɔɔ kur kun, ŋaan ki Yisa doo Olif Tiinii kunkonn paak.

² Ki li yent sanyapob ni, ki u ŋmat kɔɔ Yennu jiantu ŋasaakak ni; ki niib bonchiann tikir baar kɔɔ lintɔ, ki u kar ki wantib.

³ Ŋanne ki sennu wannteeb nan Farisiinba baar nan poo nba tun bonchonchonn toonn, ki te ki u set Yisa tɔɔnn po,

⁴ ŋaan yet Yisa a “Wanntɔɔ, ti la poo na, ki u tuun chonchonn toonne, ki ti soorɔ li yoo na.

⁵ Ti sennu ni, Moses din senn a li poobooru ŋan ki bin jaatɔ tanae ki kpiu, ki fin ŋarin dukin la nlee?”

⁶ Bi din yet nna, ki loon bin kpar Yisae, ki fit lian la u biit. Ki Yisa tibin ŋaan jii u niibir ki sɔb tiŋ ni.

⁷ Ba bia lek see ki boiɔ buboit yoonba na, ki u tibit ki betib a “Wunba ki mi ki tun toonbiit, li yɔɔ-n sint jaau tansinsinn,”

⁸ ŋaan ŋamm tibin ki sɔb tiŋ ni.

⁹ Ba gbat ki u yet nna maŋ, ki bi piin yat yenɔ yenɔ, ki nikpera na dɔŋ yat, ŋaan ki Yisa biar, ŋɔɔ nan poo na, ki u bia daa see u tɔɔnn po.

¹⁰ Ki u tibit boiɔ, “N diamm, bi saan lee? Sɔɔ ki biar a wun pak biiranii?”

¹¹ Ki u jiin a “Chanbaa, sɔɔ ki biari.” Ki Yisa yetɔ a “N mun kan pak biirani. I kun. A ji daa mi ki tuun toonbiiti.”

Yisa nba tee yentu biaŋinba

¹² Ŋanne ki Yisa bia ŋamm piak nan niib Yennu jiantu ŋasaakak ni, a “Mine tee tingbouŋ na niib yentu, ki daanɔ nba waan, ŋɔɔe sii mɔk yentu nba sii yentir u binbeŋ, ki u kii turin bunbɔnn ni.”

¹³ Ki Farisiinba na bia yetɔ a “Fa piak ki want a mɔŋ po na, ŋaan li tee yanne.”

¹⁴ Ki Yisa jiin betib, “Mi-i lekii piak ki want n mɔŋ poie, ŋaan ma yet linba, li tee mɔniie, kimaan min mi ma nyii siaminba, ki bia mi ma saa siaminba. Yimm ŋarin ki mi ma nyii siami. I bia ki mi ma saa siami.

¹⁵ Yimm gorii nirɔ nanyer poe ki bu u buut, ŋaan min ŋarin ki bu sɔɔ buuti.

¹⁶ Mi-i poŋii yaa n bu nirɔ buutie gbaa, n sa bu u buut nan barmɔniie, kimaan n ki bu buut n kuukɔɔ kaa, ŋaan n Baa nba tumin nee be nanin.

¹⁷ Tɔn, li poŋ sɔb i sennu ni a niib bannlee siara-i jaŋ nan leer, ŋannii tee barmɔnii.

¹⁸ N piak want n mɔŋ po, ki n Baa wunba tumin na mun bia piak want n po nnee.”

¹⁹ Ki bi boiɔ a “A Baa maŋ be lee?” Ki Yisa pak jiimm a “I ki mimi, ki tan boi n Baa. I-i bo-i mimie, i mun bia bo sii mi n Baawa.”

²⁰ Yisa din pak maan na yoo nba ki u din want niib; ki bi din be Yennu jiantu ŋasaakak ni siaminba ki bi sent Yennu piinii likirii lakir na; ŋaan sɔɔ ki soorɔ, kimaan u sooru yoo daa ki baari.

Yisa nba kpaan Juu teeb na biaŋinba

²¹ Ki Yisa bia ŋamm pak yetib a “N sa yaata, ki i tan sa lomin ki kan lami. I tan sa kpo ŋaan kan poŋ la nyikinchabi; i bia tan kan fit saan ma saa siami.”

²² Ŋanne ki Juu teeb na yet a “U yaa a ti kan fit saan wa saa siami. U yaa wun kpi u mɔŋee?”

²³ Ki Yisa jiin a “Yimm tee tiŋ nna yabe, ŋaan min tee sanpaapo yɔɔe; yimm nyii tingbouŋ na nie, ŋaan min ki nyii tingbouŋ na ni kaa.

²⁴ Li paake te ki n yeti ma i sa kpo ŋaan kan poŋ la nyikinchabi; ki li-i tee ki i ki teen yada nan n tee ma tee wunba na, i set sa kpo ŋaan kan poŋ la nyikinchabi.”

²⁵ Ki bi boiɔ a “Fin ŋmee?” Ki u jiimm a “N tee wunba ki n tuu yɔɔ beeri na.

²⁶ N bo sii fit piak maan bonchiann ki biiri; ŋaan wunba tumin nae tee barmɔnii daanɔ; ki n piak beer tingbouŋ na niib linba ki n gbia u boor nae.”

²⁷ Ŋaan niib na din ki mi nan u piak u Baa Yennu poe.

²⁸ Li paak ki Yisa betib, “Yoo nba ki i sa jii min nisaarik Bik ki donnin sanpaapo na, li yooe ki i tan sa bann nan n tee ma tee wunba, ki i bia sa bann nan n ki tuun siar nan n mɔŋ mɔŋ yikoo, ŋaan n bia yeen linba ki n Baa wannin a n tan yete.

²⁹ Ki wunba tumin nae be nanin. U ki nyikit n kuukɔɔ, kimaan n tuu tuun linba gboot u numme.”

³⁰ Niib bonchiann nba din gbat Yisa nba pak nna maŋ, ki bi teenɔ yada.

Binba nyii yiar ni nan barmɔnii na labaar

³¹ Ŋanne ki Yisa yet Juu teeb nba teenɔ yada na, “Li-i tee ki i saak n mɔmaan, i set tee n poorpoweiteeb nan barmɔniie, ki i bia sa bann barmɔnii wannu,

³² ki barmɔnii wannu maŋ sa nyinni yiar ni.”

³³ Ki bi yetɔ a “Ti tee Abraham yaaboonae, ki ti ki mi ki teen sɔɔ daaba. Nlee ki a yaa a ti tan sa nyi yiar ni?”

³⁴ Ki u yetib a “Barmɔniie ki n beeri na, sɔɔ kur nba tuun toonbiit, u tee biit daabire.

³⁵ Daabir ki tee ŋaak yɔɔ kaa, ŋaan ŋaak bik ŋarin tee ŋaak yɔɔe yoo kur.

³⁶ Li-i tee min Yennu Bija nyinti yiar nie, i set sa nyi yiar ni nan barmɔniiwa.

³⁷ N mi nan i tee Abraham yaaboonae, ŋaan ki i lek yabii a i kpin, kimaan n maan maŋ ki kɔɔ i tuba ni.

³⁸ Ma tuu be n Baa peŋ ki laat linba, ŋanne ki n piak, ŋaan yimm tuun linba ki i baa beti a yii tuun nee.”

³⁹ Ki bi jiinɔ yaa a “Ti baa tee Abrahame.” Ki Yisa betib a “Li-i tee ki i bo tee Abraham waas nan mɔniie, i bo sii tuun Abraham toonbooru nawa,

⁴⁰ ŋaan ki mɔtana ki i yabii a i kpin, nan ma tee nirɔ nba beeri barmɔnii nba ki n gbat Yennu peŋ na. Abraham ŋarin din ki teen nna.

⁴¹ Ŋaan yimm tuun i baa nba tuun biaŋinbae.” Ki bi jiin betɔ a “Timm ki tee kpenkiŋmia kaa. Ti mɔk baa yenɔkɔɔe, ki ŋɔɔe tee Yennu.”

⁴² Ki Yisa betib, “Li-i bo-i tee ki Yennu mɔŋ tee i baa, i bo sii loonima, kimaan n nyii ŋɔɔ Yennu peŋe ki baar nna. N bia ki baar nan n mɔŋ mɔŋ yaak kaa, ŋaan ŋɔɔe tumin.

⁴³ Bee teen ki i ki bann n maan na paaki? kimaan ya kan fit gbat n maan maŋ na.

⁴⁴ I tee i baa Sintaanii waase, ki loon ki i tuun i baa maŋ yanbɔɔtoona. Sinsinn u poŋ din tee nikpiiruko, ki bia fɔk nan barmɔnii, kimaan barmɔnii kaa u ni nan waama. U-i faar faak yoonba, li poŋ tee u toonkpere, kimaan wa tee faak daanɔ na. Fai kur nyi u boore.

⁴⁵ Ma beeri barmɔnii nee te ki i ki teenin yada.

⁴⁶ I ŋmee sa fit wann n biiti? Aaii, sɔɔ kaa. Ma beeri barmɔnii biaŋinba na, bee teen ki i ki teenin yada?

⁴⁷ Wunba nyii Yennu peŋ, ŋɔɔe gbia Yennu maan; ŋaan ya ki nyii Yennu peŋ na, li paake te ki i ki gbia Yennu maan maŋi.”

Yisa nan Abraham po

⁴⁸ Ŋanne ki Juu teeb na jiin ki yet Yisa a “Ta yet ki yaa a tee Samaria nirɔ, ki narinbiiuk bia be a ni na, li ki tokinii?”

⁴⁹ Ki Yisa jiin a “Narinbiiuk kaa n ni. Min baakit n Baa Yennu, ŋaan ki yimm ŋarin siannin.

⁵⁰ Ŋaan li ki tee min kaa loon nibaakir ki teen n mɔŋi. Yennue loon ki niib-n teenin nibaakir, ki ŋɔɔe tee buut daanɔ.

⁵¹ Barmɔniie ki n beeri na, daanɔ nba saak n maan, u kan mi ki kpo.”

⁵² Ki Juu teeb na betɔ a “Mɔtana ti set bann nan narinbiiuk be a ni. Abraham din kpoa, ki Yennu sɔkiniinba mun din kpoa, ŋaan ki a yaa a daanɔ nba saak a maan kan mi ki kpo.

⁵³ Ti chanbaa Abraham nba din kpo na, a dukii mi a a cheeu-ee? Yennu sɔkiniinba mun bia din kpoa. I got! Fin dukii mi a a tee ŋmee?”

⁵⁴ Ki Yisa jiimm a “Mi-i bo-i dontir n mɔŋie, li bo sii tee yanne, ŋaan wunba dontirin tee n Baae. Ŋɔɔe tee daanɔ nba ki i yaa a u tee i Yennu na.

⁵⁵ I ki miu, ŋaan min ŋarin miu. Li-i bo-i tee ki n yaa a n ki miu, n bo sa teen faak daanɔ kaman nan yimm nawa. Ŋaan n miu, ki bia saak u maan.

⁵⁶ I chanbaa Abraham din mɔk parpeenn bonchiann, kimaan u yaa wun tan la yoo nba ki n sa sik tingbouŋ na ni; ki u set tan la li yoo maŋa, ki li maŋŋɔ.”

⁵⁷ Ki Juu teeb na boiɔ, “A daa ki baar binpiiŋŋmu, ŋaan tan la Abrahamii?”

⁵⁸ Ki Yisa jiin yetib a “Barmɔniie ki n beeri na, ba din tan maar Abraham na, ŋaan sɔɔ ki min ŋarin poŋ kpan be.”

⁵⁹ Ŋanne ki bi ji tɔkii tana a bin jaatɔ ki kpiu; ki u lir ki nyii Yennu jiantu ŋasaakak ni.