Jɔɔnn 7 - Yennu Gbounpaauŋ Mɔɔr

Yisa waarii nba ki teenɔ yada biaŋinba

¹ Li poorpoe ki Yisa ji din be Galilee tiŋ ni, ŋaan lin leŋ digbana ni. U din ki loon wuu be Judea tiŋ ni, kimaan Juu teeb yudamm din loon bin kpiu.

² Ki Juu teeb jaamm nba ki bi yir lanbont jaamm na tan per.

³ Ŋanne ki Yisa waarii yetɔ a “Nyikin nna, ŋaan saan Judea tiŋ ni, ki a poorpoweiteeb nba be leŋ na-n la toona nba ki a tuun na.

⁴ Li-i tee ki nirɔ loon wun wann u mɔŋ nan u tee sɔɔ, li ki ŋan ki wun bɔr toona nba ki u tuumi. Li-i tee ki a tuun toonjaana, fan wann niib paanu ni nan a set tee li daanɔe.”

⁵ U waarii na lek din ki teenɔ yada; li paak ki bi din pakɔ nna maŋ.

⁶ Ki Yisa jiimm a “Li daa ki baar nan yoo nba ki n sa saani. Yimm ŋarin, li ki bi nan ki i saani,

⁷ kimaan tingbouŋ na ŋaateeb ki namiini, ŋaan min ŋarin bi namin, kimaan ma beerib a bi sɔnii ki ŋan na paak.

⁸ Tɔn, yimm-ii saa jaamm maŋ, ŋaan min ŋarin daa ki saa, kimaan n sinsaan yoo daa ki baari.”

⁹ U din betib nnee, ŋaan biar be Galilee.

Yisa nba din saan jaamm maŋ biaŋinba

¹⁰ Yisa waarii na nba din saan jaamm na, ki li poorpo ki Yisa tan wei ki saan. U din ki saan peee peee kaa, ŋaan u din bɔre ki saan.

¹¹ Ki Juu teeb yudamm din lin ki loonɔ jaamm maŋ ni, ki boi niib a “U be lee?”

¹² Ki niib bonchiann nba be leŋ na burin ki piak bonchiann ki jikit saa u po; ki siab yaa a “U tee niŋanɔe,” ki leeb yaa a “Aaii, a u kpann niib nae;”

¹³ ŋaan sɔɔ din ki pak u po peee peee ni, kimaan bi tiin Juu teeb yudamm jaŋmaaniie.

¹⁴ Ki jaamm na yoo sinsuuk ni, ki Yisa saan kɔɔ Yennu jiantu ŋasaakak ni, ki piin ki want niib Yennu maan.

¹⁵ Juu teeb nba gbiintirɔ yoonba, ki li teemm bakitnauŋ; ki bi boi a “Nlee ki nirɔ na mantik jia mi gbouŋ nna, ŋaan ki kɔɔ ti sakursaakari?”

¹⁶ Ki Yisa yetib a “Ma want wannu nba na, li ki tee n mɔŋ mɔŋ wannu kaa, ŋaan li nyii Yennu nba tumin na boore.

¹⁷ Wunba loon wun tun Yennu yanbɔɔtoona, ŋɔɔe sa bann linba ki n piak ki want na nan li nyii Yennu boor amii n boor.

¹⁸ Daanɔ nba piak u mɔŋ mɔŋ wannu, ŋɔɔ loon nibaakir ki teen u mɔŋe. Ŋaan wunba loon a niib-ii baakit wunba tumɔ na, ŋɔɔe tee popeendaanɔ, ki ki mɔk biiti.

¹⁹ “Li ki tee Moses kaa din turi ti sennu-uu? Ŋaan i sɔɔ ki dia li sennu maŋi. Ki bee ki i loon ki i kpimi?”

²⁰ Ki niib nba na yetɔ a “Narinbiiuk be a ni! Ŋmee yaa wun kpiani?”

²¹ Ki Yisa jiin betib a “N tun toonjaann foon daar ki te ki nirɔ paak, ki li toonn maŋ teen i kura bakitnauŋ.

²² Ŋaan li-i tee ki i pot bonjabik foon daar, i mun tuu tuun toonn foon daarii na. Li din tee Mosese din senn yaa a yii porii bonjabis, ŋaan i yejamme din piin punpotu sinsinn.

²³ Tɔn, li-i tee ki i pot bonjabis foon daar, a i daa bot Moses sennue, nlee ki i donn wutoor n paak a ma te ki baatɔɔ paak foon daar na?

²⁴ Daa gorii nirɔ nanyer po ki bu u buuti, ŋaan i tuu dukin bonŋann ki la nan li mɔnii.”

Niib nba boi bi leeb Yisa po biaŋinba

²⁵ Ŋanne ki Jerusalem nisiab boi bi leeb a “Nirɔ nba nee ki bi yabii a bin kpiu na-aa?

²⁶ Gotir, u ki yeen ki bɔrii niib ni, ki sɔɔ mun bia ki pak siar a wun tiau. Li pasiar ti yudamm dukii a u tee Yennu Niganntɔɔ Masia na.

²⁷ Ti mi jɔɔ na nba nyii siaminba, ŋaan Yennu Niganntɔɔ Masia na-i taŋŋi baar, sɔɔ kan fit bann wa nyii siami.”

²⁸ Yisa nba want niib wannu na Yennu jiantu ŋasaakak ni na, ki u tan pak sanpaapo ki yetib a “I dukii nan i min bonŋann, ki bia dukii a i mi ma nyii sian. N ki baar n mɔŋ baaru kaa. Daanɔ nba tumin na, ŋɔɔe mɔk barmɔnii kur; ki i ki miu.

²⁹ Ŋaan min miu, kimaan n tuu be u boor nie, ki u tan tumin nna.”

³⁰ Ŋanne ki bi din yabii a bin soorɔ, ŋaan ki sɔɔ ki soorɔ, kimaan u sooru yoo daa din ki baari.

³¹ Ki nibur na ni niib bonchiann din teenɔ yada, ki boi bi leeb a “Yennu Niganntɔɔ Masia na-i taŋŋi baar, u sii tuun toonjaana bonchiann ki gar jɔɔ na yaraa?”

Yisa nba yaa a u sa yaata

³² Ki Farisiinba din gbat niib nba burin burin piak nna maŋ Yisa po na, ki ŋamm nan Yennu jiantu yudamm din tun Yennu jiantu ŋasaakak lanjimanba a bin saan ki saa soor Yisa.

³³ Ŋaan ki Yisa din bet nibur na a “N sii be nani yoo waaminne, ki li poorpo ki n ŋmat ki saan wunba tumin na peŋ.

³⁴ I tan sa lon n boor, ŋaan i kan lami, kimaan siaminba ki n tan sii be na, i kan fit baar leŋi.”

³⁵ Ki Juu teeb na boi bi leeb a “U yaa wun tan saan lee, ki ti kan lau? U yaa wun tan saan Griik doi ni siaminba ki Juu teeb be na, kii sii want Griik teeb na amii?

³⁶ Wa yet nna, li paak tee bee? a ti tan sa lon u boor ŋaan kan lau, a ki bia tan kan fit saan siaminba ki u sii be na.”

Manfoor nyun labaar

³⁷ Tɔn, ki jaamm maŋ gbennu daar din tee dajaanne. Li daar maŋe ki Yisa fiir set ki pak sanpaapowa a “Wunba ki nyunyukiru gbatɔ, wun baar n boor ni ki tan nyu,

³⁸ kimaan Yennu gbouŋ yet a ‘Wunba teenin yada, a manfoor nyun sii tɔ nyunkpanae ki nyi u par ni.’ ”

³⁹ Yisa nba din piak na, li din want Yennu Seyeeŋ poe; ki binba din tee Yisa yada na din yaa bin tan la Seyeeŋ maŋ. Li yoo na dinn, Yennu daa din ki tur niib Seyeeŋ maŋi, kimaan u daa din ki donn Yisa sanpaapo.

⁴⁰ Niib bonchiann nba din be nigbouŋ na ni ki gbat ki u yet nna maŋ, ki bi yet a “Jɔɔ na set tee Yennu sɔkiniisɔɔ nan barmɔniie,”

⁴¹ ki siab yaa a “U tee Yennu Niganntɔɔ Masiae,” ki leeb mun yaa a “Yennu Niganntɔɔ Masia na kan nyi Galilee.

⁴² Yennu gbouŋ wann a Masia na tan sii tee David yaaboonne, a ki bi bia tan sa marɔ Betlehem doo nba din tee ŋɔɔ David doo na nie.”

⁴³ Ki niib na ji soor bɔkit kimaan Yisa paak.

⁴⁴ Ki siab bia loon bin soorɔ, ŋaan bi ni sɔɔ ki soorɔ.

Juu teeb yudamm nba yêt yada teenu biaŋinba

⁴⁵ Li poorpoe ki lanjimanba na ji ŋmat Yennu jiantu yudamm nan Farisiinba na boor ni; ki bi boib a “Bee teen ki i ki jen nanɔ?”

⁴⁶ Ki lanjimanba na jiin betib a “Sɔɔ daa ki mi ki pak maan kaman nan jɔɔ na mabooru nba ki u piak na.”

⁴⁷ Ki Farisiinba na boib a “Ki u mun kpanniinii?

⁴⁸ I tan mi ki la ki ti yudamm nan Farisiinba sɔɔ teenɔ yada-aa?

⁴⁹ Ŋaan nigbouŋ na nba ki mi Yennu sennu na, mɔbiir be bi paak.”

⁵⁰ Ki yudamm maŋ ni yenɔe din tee Nikodemus. Ŋɔɔe tee daanɔ nba din saan a wun saa la Yisa na; ki u betib a

⁵¹ “Ti sennu ni ki wann nan ti bu nirɔ ki biirɔ, ŋaan daa ki gbat u mɔb ni ki bann u biiti.”

⁵² Ki bi boiɔ, “A mun tee Galilee nirɔee? Gotir Yennu gbouŋ ni. A sa la nan Yennu sɔkinii ki mi nyii Galilee tiŋ ni.”