Jɔɔnn 4 - Yennu Gbounpaauŋ Mɔɔr

Samaria poosɔɔ labaar

¹ Tɔn, ki Farisiinba din gbat a Yisa daak niib ki wuurib Yennu nyunwuru ki bi tee u poorpoweiteeb, ki bi yab gar Jɔɔnn yaba.

² Barmɔnii ŋarime Yisa din ki wuur niib u mɔŋi, ŋaan u poorpoweiteebe din wuurib.

³ Yisa nba bann nan Farisiinba na gbat biaŋinba maŋ na, ki u nyii Judea tiŋ ni ki ŋmat saa Galilee tiŋ ni.

⁴ Ki u sɔnu maŋ ni, ki li tee talase nan wun gar Samaria tiŋ ni.

^5-6 Ki yensuuk ni, wa din tan per Samaria teeb digbansiar ni, ki bi yir Saika, ki u baar nakin Jakɔb bunbunn boor. Leŋ din ki fɔk nan kpaab nba ki Jakɔb din tur u bik Josef na. Wa din tan per bunbunn na, ki bakint ji din soorɔ ki u bak kimaan sommir na paak, ki u biar kar bunbunn na nyakir.

⁷ Ŋanne ki Samaria poosɔɔ tan baar bunbunn maŋ boor, a wun luun nyun. Ki Yisa miarɔ a “Turin nyun ki n nyu.”

⁸ Li yoo na amii ki sɔɔ ki u poorpoweiteeb poŋ saan doo niwa, a bin saa daa jeet, ŋaan ki u biar u kuukɔɔ.

⁹ Ki Juu teeb na din tuu siŋ Samaria niibe, ki ki loon bii taant nammi. Li paak, ki poo na ji boiɔ a “A tee Juu nirɔe, ki n mun tee Samaria pooe, ki li teen nleewa ki a tan mein nyumi?”

¹⁰ Ki Yisa din jiinɔ, “Li-i tee ki a bo mi bakitnauŋ piinii nba ki Yennu loon wun pia na, ki bia mi ma tee wunba ki meia nyun na, a bo sa boin ki n tura manfoor nyun, ki n set bo sa turawa.”

¹¹ Ki poo na yetɔ a “Chanbaa, bunbunn na sumii hei, ki a mun bia ki mɔk gooka. Lee ki a sa luun manfoor nyun maŋi?

¹² Ti yeja Jakɔb din lukir bunbunn na, ki ŋɔɔ nan u waas nan u bonkobit kura din nyu leŋe. A dukii nan a gar Jakɔb amii?”

¹³ Ki Yisa yetɔ a “Wunba nyuu bunbunn na nyun, nyunyukiru tan sa ŋamm soorɔwa,

¹⁴ ŋaan mi-i tur wunba n nyun na ki u nyuu, nyunyukiru kan mi ki soorɔ jiki, kimaan mi-i tur sɔɔ n nyun na, li sii bunii manfoor nyume u ni, ki bia sa turɔ manfoor nba kaa gbennu.”

¹⁵ Ki poo na yetɔ a “Chanbaa, turimin li nyun, ki nyunyukiru ji daa mi ki somi, ki n bia ji daa mi ki baat nna ki tan lu nyumi.”

¹⁶ Ki Yisa betɔ a “I saa ki saa yiin a sɔrɔ ki jen nanɔ na.”

¹⁷ Ki u betɔ a “N ki mɔk sɔrɔ.” Ki Yisa jiinɔ, “Fa yaa a a ki mɔk sɔrɔ na, ŋann a mɔk mɔnii,

¹⁸ kimaan a poŋ kun jab baŋŋmuua, ki jɔɔ nba ki a daa be nanɔ mɔtana na, u ki tee a sɔrɔ nan mɔnii kaa. A set pak mɔniie.”

¹⁹ Ki poo na yetɔ a “Chanbaa, n ji bann nan a tee Yennu sɔkiniie.

²⁰ Timm Samaria teeb yejamm din jiantir Yennu jɔɔr na paake, ŋaan ki yimm Juu teeb ŋarin yaa a Jerusaleme tee siaminba ŋan nan Yenjiantu.”

²¹ Ki Yisa betɔ, “N diamm, teentin yada, yoo baat ki niib tan kii jiantir ti Baa Yennu jɔɔr na paaki, ki bia tan kii jiantirɔ Jerusalem mun biaki.

²² Yimm Samaria teeb ki mi ya jiantir wunba, ŋaan timm Juu teeb ŋarin mi ta jiantir wunba, kimaan niib tinnu nyii Juu teeb nie.

²³ Ŋaan yoo baat, ki li poŋ set baar na, ki binba jiantir ti Baa Yennu nan barmɔnii na sii jiantirɔ u Seyeeŋ paŋ paak nan bi para kur, kimaan li niboorue ki Yennu loon bii jiantirɔ nna.

²⁴ Yennu tee Seeke, ki binba jiantirɔ na, li tee talase bii jiantirɔ nan barmɔnii, u Seyeeŋ paŋ paak.”

²⁵ Ki poo na yetɔ, “N mi nan Yennu Niganntɔɔ Masia nba ki bi yiu Kristo na tan sa baar na. U-i taŋŋi baar yoonba, u sa betit barii kura.”

²⁶ Ki Yisa jiinɔ a “Mine na, min nba piak nana na.”

²⁷ Li yoo maŋe ki Yisa poorpoweiteeb jen, ki li teemm bakitnauŋ nan Yisa nba piak nan pooe na, ŋaan bi sɔɔ ki boi poo na a u loon bee, ki bia ki boi Yisa a bee ki u piak nanɔ.

²⁸ Ŋanne ki poo na nyik u nyunsɔɔr na, ŋaan ŋmat saan doo na ni, ki saa yiin niib a

²⁹ “I baar man, ki tan got jɔɔ nba betin bonsiar kur nba ki n poŋ mi tun. I dukii nan ŋɔɔe tee Yennu Niganntɔɔ Masia-aa?”

³⁰ Ba gbat nna yoonba, ki bi nyii doo na ni ki saan Yisa peŋ.

³¹ Yoo nba ki poo na daa din piak nan niib doo na ni na, ki Yisa poorpoweiteeb barimɔ, ki yaa a “Chanbaa, dimin jeet.”

³² Ki Yisa jiimm yaa a “Min mɔk jeet nba ki n sa di, ŋaan ki i ki mi li po.”

³³ Ki u poorpoweiteeb ji boi bi leeb a “I mi sɔɔ tan sii turɔ jeeti?”

³⁴ Ki Yisa jiimm, “Min yaa jeet tee ki mii tuun Yennu nba tumin na yanbɔɔtoona ki gbenn.

Dii jaŋ nan jaamuwa

³⁵ “I dukii nan li tenn ŋmaarii ŋannae nan bin jaan dii. Gotir man, niib bonchiann poŋ teen siir nan ki i dakib ki bin teenin yada, kimaan bi tee kaman nan dii nba tuu beer ki jaŋ nan jaamu nee.

³⁶ Ki dijaara tan sa gaar bi paauk, ki dii nba ki bi jaan na mun, ŋamme tee niib nba tan sa la manfoor nba kaa gbennu, ki damm nba buur nan binba jaan, bi kur tan sii mɔk parpeenn bi dii maŋ paak.

³⁷ Ti mɔk barjouk, ki li yiin a ‘Yenɔe buur, lɔɔe mun tuu tan jaan,’ ki li set tee mɔnii.

³⁸ N te ki i jaan siaminba ki i ki koo. Siabe poŋ koowa, ki bi konu maŋ sommii ki i laat dii.”

³⁹ Ŋanne ki Samaria doo maŋ ni niib bonchiann gbat poo na nba beerib yaa a “Yisa betin bonsiar kur nba ki n poŋ mi ki tun,” ki bi teen Yisa yada,

⁴⁰ ŋaan saan bunbunn na boor ni Yisa peŋ, ki barimɔ a wun biar kii be namm. Ki Yisa sak ki biar be namm daa ŋannlee,

⁴¹ ki din piak u maan ki teemm. Ba din gbat nna ki bi bonchiann teen yada ki jii bi mɔŋ ki turɔ.

⁴² Li yoo na ki bi bet poo na “Ta teenɔ yada mɔtana na, li ki tee fa betit u po na kuukɔɔ kaa, ŋaan ta gbat u mɔŋ mɔŋ maan na paake ki ti teenɔ yada, ki bann nan ŋɔɔe set tee tingbouŋ na ŋaateeb Tinntɔɔ.”

Yisa nba din te ki yudaansɔɔ bija paak biaŋinba

⁴³ Li daa ŋannlee poorpoe, ki Yisa nyii leŋ ki saan Galilee tiŋ ni,

⁴⁴ kimaan u mɔŋ mɔŋ poŋ yet a “Yennu sɔkinii kan la nibaakir u mɔŋ mɔŋ doo ni.”

⁴⁵ Ŋaan wa din baar Galilee yoonba, niib na din gaarɔ, kimaan ba daan saan yukitgar tiaru jaamm Jerusalem na, bi daan la linba kur ki u poŋ tun Jerusalem ni jaamm yoo na.

⁴⁶ Wa din lin Galilee tiŋ ni na, ki u din saan Kana, siaminba ki u din te ki nyun kpant tilɔɔna daan na. Ki yudaansɔɔ din be Kapenaum, ki u bija din yiar.

⁴⁷ Ki u din gbat a Yisa nyii Judea ki baar Galilee tiŋ ni. Ki u baar u peŋ, ki barimɔ a wun baar Kapenaum, a ki tan te ki u bija-n paak, kimaan u yaa wun kpoe.

⁴⁸ Ki Yisa betɔ a “Li-i tee ki i ki la nyina nan bakitnauŋ toonjaanai kaa, i kan teenin yada.”

⁴⁹ Ki yudaanɔ na jiin yetɔ a “Chanbaa, ŋaant tin saan, ki n bik daa ki kpo na.”

⁵⁰ Ki Yisa betɔ “I kun. A bija na paaka.” Ŋanne ki yudaanɔ na teen yada nan Yisa nba pakɔ linba maŋ, ki ji ŋmat kun.

⁵¹ U sɔnu nie ki u toontunna chetɔ nan labaar a “A bik na paaka.”

⁵² Ki u boib a “Nlee yooe ki bik maŋ paaki?” Ki bi yetɔ a “Wonn, kut youŋ yenlekir, ki bik na gbanu won maak.”

⁵³ Ki jɔɔ na tiar nan li yooe tee yoo nba ki Yisa won betɔ a “A bija na paaka na.” Li paak ki ŋɔɔ nan u ŋaateeb kura teen Yisa yada.

⁵⁴ Yisa nba din tun toonjaann maŋ na, li din tee toonjaann nba pukin ŋannlee ki u tun yoo nba ki u nyii Judea tiŋ ni ki baar Galilee tiŋ ni nee.