Jɔɔnn 3 - Yennu Gbounpaauŋ Mɔɔr

Jɔɔ nba ki u sann din yi Nikodemus na po

¹ Jasɔɔ nna din be ki u sann yi Nikodemus. U din tee Juu teeb yudaanɔe, ki bia din tee Farisii nirɔe;

² ki nyiɔsiɔk ki u tan baar Yisa boor ni, ki yetɔ a “Chanbaa, ti mi nan a tee wanntɔɔ nba nyii Yennu boor, kimaan sɔɔ kan fit tun toonjaana nba ki a tuun na booru, ki li ki tee ki Yennu be nanɔ kaa.”

³ Ki Yisa betɔ a “Barmɔniie ki n beera na, sɔɔ kan fit ki kɔɔ Yennu naan ni, ki li ki tee ki bi ŋamm marɔ kaa.”

⁴ Ki Nikodemus boiɔ “Nlee ki bi sa ŋamm ki mar nirɔ nba ki tee bik biaki? kimaan u ji kan fit ki ŋmat kɔɔ u naa poor ni, ki wun ŋamm marɔ.”

⁵ Ki Yisa yetɔ a “Barmɔniie ki n beera, nirɔ maaru, li kan fit jaŋ nan wun baar Yennu naan ni, ŋaan see ki u la maaru munnlee, ki li tee Yennu Seyeeŋ yar. Nnee-i kaa, u kan fit ki baar Yennu naami.

⁶ Nisaarik ŋarin maar nisaarik, ŋaan Seyeeŋ na ŋarin maar Seyeeŋ yɔɔe.

⁷ Li paak, a daa te ki li teea bakitnauŋ nan ma yaa a ‘See ki bi ŋamm mari na.’

⁸ Wouŋ na tuu da la loon siaminba na, ki a ki mi wa nyi sian ki da. A bia ki mi wa saa siami, ŋaan a gbia ki u dae. Li mun bia tee nnee ki tur sɔɔ kur nba ki Yennu Seyeeŋ marɔ na.”

⁹ Ki Nikodemus boiɔ a “Nlee ki li sa teen nna?”

¹⁰ Ki Yisa jiinɔ a “A tee daanɔ nba want Israel teeb Yennu maan, ŋaan tan ki mi linba na paakii?

¹¹ Barmɔniie ki n yaa n beta, ti beeri linba ki ti mi, nan ta bia la linbae, ŋaan ki i ki gaan ti maami.

¹² Li-i tee ki i ki teenin yada, nan ma beeri tingbouŋ na bona po na, li-i tee ki n beti Yendɔuŋ ni bona po, nlee ki i ji sa teenin yada?

¹³ Sɔɔ kaa ki doo Yendɔuŋ ni see min nisaarik Bik nba nyii Yendɔuŋ ni na.”

¹⁴ Moses nba din jii kut waauk ki finnɔ daauk paak ki donnɔ muuk ni, li mun bia tee nnee ki bi tan sa jii nisaarik Bik na, ki donnɔ sanpaapo,

¹⁵ ki wunba teenɔ yada, u sa la manfoor nba kaa gbennu.

¹⁶ Kimaan Yennu mantik din loon timm tingbouŋ na niib bonchiann; li paak, ki u turit u Bijayemmir, ki wunba teen u Bija maŋ yada u tan kan kɔɔ muu ni, ŋaan u sii mɔk manfoor nba kaa gbennu,

¹⁷ kimaan Yennu nba din tun u Bija tingbouŋ na ni, u din ki tumɔ a wun tan bu tingbouŋ na niib buut ki biirib kaa, ŋaan u din yaa wun tinnibe.

¹⁸ Ki daanɔ nba teen Yennu Bija maŋ yada, Yennu kan bu u buut ki biirɔ, ŋaan wunba ki teeu yada, Yennu poŋ bu u yaa buut ki biirɔwa, kimaan u ki teen ŋɔɔ Yennu Bijayemmir maŋ yada.

¹⁹ Linba paak te ki Yennu bu bi buut ki biirib maŋ tee nnee: Yennu Bija din baar tingbouŋ na ni a wun yent tingbouŋ na niib nummpo, ŋaan ki nifosaarik loon bunbɔnn ki gar yentu maŋ, kimaan bi toona nba bi biaŋinba na paak,

²⁰ kimaan daanɔ nba kur tuun toonbiit, u nân yentu maŋe, ki ki loon wuu nakiiɔ, kimaan u ki loon nan u toonbiit na-n tan nyi paanu.

²¹ Ŋaan wunba waa Yennu barmɔnii wannu ki bia tuun li biaŋ, ŋɔɔe baat yentu maŋ boor, a sɔɔ kur-n bann nan u toona kur, Yennu be li ni.

Jɔɔnn nba want Yisa po biaŋinba

²² Li poorpoe ki Yisa nan u poorpoweiteeb din nyii leŋ ki saan Judea siar po, ki saa be leŋ kaman nan daa ŋaŋŋa nna; ki bi din wuur niib Yennu nyunwuru.

^23-24 Li yoo na ki sɔɔ ki Jɔɔnn wunba wuur niib Yennu nyunwuru na daa ki kɔɔ dansariki, ki be Enon, siaminba ki nyun din yab na, ki niib din tuu baat u boor, ki u wuurib nyun. Enon din ki fɔk nan Salimi.

²⁵ Ŋanne ki mɔniɔk tan fiir Jɔɔnn maŋ poorpoweiteeb nan Juu nirɔ nna sinsuuk ni ki jikit saa Yennu nyunwuru po.

²⁶ Ki Jɔɔnn poorpoweiteeb na saan u boor, ki saa betɔ “Chanbaa, nirɔ nba ki a daan be nanɔ na Jɔɔdann mɔk-pootir, ki yaa a u tee Yennu Niganntɔɔ na, ti gbat ki u wuur niib Yennu nyunwuru, ki sɔɔ kur saa u boor ki u wuurib.”

²⁷ Ki Jɔɔnn maŋ betib a “Yennu nyint sɔɔ kur nan u toona. Nirɔ kan fit tun siar ki li ki tee Yennu nyinnɔ.

²⁸ I mɔŋ poŋ mi gbat ki n yet ma min kaa tee Yennu Niganntɔɔ Masia, ŋaan min ŋarin, Yennu dɔŋ tun mine, a n tan teen u baaru siir.

²⁹ Poosɔrɔe tee wunba yen pooyookir na. Wunba tee poosɔrɔ na yɔɔk ki be u boor ki gbiintirɔ, ŋɔɔe mɔk parpeenn poosɔrɔ na kunkɔr paak. Nnee ki n mun set mɔk parpeenn bonchiann Masia na paak.

³⁰ “Li kpaa talas nan ŋɔɔ Masia-ii yabitir, ŋaan ki min-ii waabit.”

Wunba nyii Yendɔuŋ ni labaar

³¹ Wunba nyii sanpaapo, ŋɔɔe chee sɔɔ kura; ŋaan binba nyii tingbouŋ na ni, ŋamm tee tingbouŋ na teebe, ki bia piak nisaarii maan. Wunba nyii Yendɔuŋ ni, ŋɔɔe chee sɔɔ kur,

³² ki bia jenna ki beer niib linba ki u la ki bia gbat, ŋaan sɔɔ kur kaa gaar u maami.

³³ Ki bia jenna, ki wunba gaar u maan maŋ, li want nan ŋɔɔe saak nan Yennu maan maŋ tee barmɔnii.

³⁴ Yennu Bija nba ki u tumɔ na, wa piak maan nba na, li tee Yennu maame, kimaan Yennu tur u Bija maŋ Seyeeŋ nba yab ki kaa bikinu.

³⁵ Yennu loon u Bija, ki kubinɔ bona kur u nuu ni.

³⁶ Daanɔ nba tee Yennu Bija yada, u sii mɔk manfoor nba kaa gbennu, ki daanɔ nba mun ki saak Yennu Bija na mɔb kan la manfoor maŋi, ŋaan Yennu wutoor sa do u paak ki kan gbenni.