Jɔɔnn 20 - Yennu Gbounpaauŋ Mɔɔr

Yisa nba fiir kuun ni biaŋinba

¹ Ki Juu teeb foon daar tan gar, ŋaan ki lasir daar sanyapob nie ki sɔɔ li yoo daa bɔn, ki Mari Magdaliin saan Yisa kaauk boor, ki la ki bi birint katanu kaauk maŋ mɔb boora;

² ki u chiar saan Simon Piita nan Yisa poorpoweitɔlɔɔ nba ki Yisa mantik tuu loonɔ na peŋ, ki betib a “Bi piit ti Yomdaanɔ kaauk na niwa, ki ti ki mi ba birɔ siaminba.”

³ Ŋanne ki Piita nan Yisa poorpoweitɔlɔɔ na nyii ki chiar saan,

⁴ ki Yisa poorpoweitɔlɔɔ na chiar paak Piita, ki saa dɔŋ baar kaauk maŋ boor sinsinn,

⁵ ŋaan ki kɔɔ. U din tibine ki la kuun katiŋ.

⁶ Ki Simon Piita tan yɔɔnt ki baar ki kɔɔ, ki la ki katiŋ na dɔɔ leŋ,

⁷ ki bia la chinchenbik nba ki bi daan fin Yisa yur na, ki ŋann fin li biaŋ ki dɔɔ li kuukɔɔ.

⁸ Ŋanne ki Yisa poorpoweitɔlɔɔ nba din dɔŋ ki baar na, ki u mun kɔɔ jik ki la li biaŋ, ki teen yada nan Yisa fiir kuun niwa.

⁹ Ŋaan bi daa din ki bann linba sɔb Yennu gbouŋ ni na paak, a Yisa sa fiir kuun ni.

¹⁰ Ki bi ŋmat ki kun.

Yisa nba din dɔkit Mari Magdaliin paak biaŋinba

¹¹ Mari ŋarin din biare see kaauk maŋ boor ni ki mɔ, ki tan tibin ki got kaauk na ni,

¹² ki la malakanba bannlee, ki bi lia tapeenii, ki yenɔ kar siaminba po ki bi daan bir Yisa na li yur po, ki lɔɔ na mun kar li taa po.

¹³ Ki bi boiɔ a “Poo na, bee ki a mɔ?” Ki u jiin a “Kimaan bi piit n Yomdaanɔe, ki n ki mi ba teenɔ siami.”

¹⁴ Wa yet nna, ŋaan ŋmant la ki Yisa see, ŋaan ki u ki mi a Yisae na.

¹⁵ Ki Yisa boiɔ “N niipoo, bee ki a mɔ? A gorii loon ŋmee?” Mari ŋarin din mi a u tee kpaab na toontunnɔe, ki u yetɔ a “Li-i tee ki a jiiue, fan betin fa teenɔ sian, ki n saan ki saa jiiu.”

¹⁶ Ki Yisa yiinɔ a “Mari.” Ki u ŋmant ki tokinɔ, ki yiinɔ Juu teeb maan ni a “Rabboni!” (Li paak tee a “Wanntɔɔ.”)

¹⁷ Ki Yisa betɔ “Ji daa siitimi, kimaan n daa ki do sanpaapo n Baa boor ni; ŋaan i saa n naa waas peŋ, ki saa betib a n sa do sanpaapo, wunba tee n Baa nan i Baa na peŋa; ŋɔɔe bia tee n Yennu nan i Yennu na.”

¹⁸ Ki Mari Magdaliin ŋmat Yisa poorpoweiteeb peŋ ki saa betib a “N la ti Yomdaanɔ nawa,” ŋaan betib wa betɔ linba.

Yisa nba dɔkit u poorpoweiteeb paak biaŋinba

¹⁹ Lasir daar maŋ nyiɔko, ki Yisa poorpoweiteeb na tan lakin leeb ki be diiuk ni, ŋaan kpar gann, kimaan bi tiin Juu teeb yudamm jaŋmaaniie, ki tan sɔɔ ki Yisa see bi sinsuuk ni, ki betib a “Parmaasir-ii be i paak.”

²⁰ Wa yet nna poorpoe, ŋaan wannib u niipantin fɔna nan u lokir ni fɔnn na. U poorpoweiteeb nba la bi Yomdaanɔ maŋ, ki bi ji mɔk parpeenn bonchiann.

²¹ Ki Yisa bia ŋamm yetib a “Parmaasir-ii be i paak. N Baa nba tumin biaŋinba na, n mun yaa n tumi li biaŋe.”

²² Li poorpoe ki u foont bi paak ŋaan yetib a “Gaat Yennu Seyeeŋ man.

²³ Li-i tee ki i nyik chab sɔɔ biit, u set la nyikinchab biit maŋ paaka; ŋaan li-i tee ki i ki nyik chab sɔɔ biiti, u ki la nyikinchabi.”

Biaŋinba ki Yisa wann u mɔŋ ki tur Tomas

²⁴ Ŋaan u poorpoweitɔyenɔ Tomas, wunba ki bi din yiu Jaak na, ŋɔɔ din kaa yoo nba ki Yisa baar bi ni na.

²⁵ Ki Yisa poorpoweiteleeb na betɔ a “Ti la ti Yomdaanɔ.” Ki Tomas yetib a “Min ŋarin, li-i kii tee ki n tan lau nan u niipantin fɔna na, ki jii n niibir ki tun siaminba ki bi kpaa kpai na, ki bia jii n nuu ki tun u lokir na ni kaa, n kan teen yada.”

²⁶ Li daa ŋanniin poorpoe ki Yisa poorpoweiteeb na bia tan lakin leeb ki be diiuk ni, ki Tomas ji be bi ni, ki bi yaan kpar gann; ki Yisa tan baar see bi ni, ki betib a “Parmaasir-ii be i paak,”

²⁷ ŋaan bet Tomas a “Jiin a niibir ki tun n niipant ni, ŋaan bia tant a nuu ki tun n lokir ni, ki ji daa birisi, ŋaan teenin yada.”

²⁸ Ki Tomas yetɔ a “Fine tee n Yomdaanɔ ki bia tee n Yennu.”

²⁹ Ki Yisa boiɔ a “Fa ji lan na paake ki a teenin yada-aa? Binba ki laatin ŋaan teenin yada na, parpeenn tee bi yare.”

Gbouŋ na sɔbu paake na

³⁰ Ki Yisa din tuun bakitnauŋ toonjaana bonchiann u poorpoweiteeb peŋ, ŋaan ŋann ki sɔb gbouŋ na ni.

³¹ Ŋaan toonjaana nba sɔb ki be nna na, bi sɔb a yin teen yada nan Yisae tee Yennu Niganntɔɔ Masia, ki bia tee Yennu Bija. Li-i tee ki i teenɔ yada, i sa la manfoor nba kaa gbennu, u paak.