Jɔɔnn 19 - Yennu Gbounpaauŋ Mɔɔr

¹ Li yoo na ki Pailat te ki bi boo Yisa kpaasir.

² Ki lanjimanba na luu kunkonii fokirik ki yirimɔ, ŋaan gbabinɔ baanmuŋ nna,

³ ki nyi baat ki gbaa u tɔɔnn, ki yeen a “Juu teeb kpanbar, ti foonta,” ŋaan pebitɔ tanpakii.

⁴ Ŋanne ki Pailat bia ŋamm ki daa nyii nanyer ki bet yudamm na, “Gotir man, n baat nanɔ i boor, ki yin bann nan n ki la u biiti.”

⁵ Ŋanne ki bi baar nan Yisa, niib na boor ni, ki u yir kunkonii fokirik na nan baanmuŋ na. Ki Pailat betib a “Gotir man, nirɔ maŋe na.”

⁶ Yennu jiantu yudamm nan bi toontunna nba lau na, ki bi tian tintianii, ki yaa a “Kpaamɔ dapunpunn paak! Kpaamɔ dapunpunn paak!” Ki Pailat betib a “Yimm jiimɔ man ki kpaau dapunpunn paak i mɔŋ, kimaan min ki la u biiti.”

⁷ Ki Juu teeb yudamm na jiin yaa a “Ti mɔk sennsau, ki sennu maŋ want nan u kpan lek tee wun kpoe, kimaan u yaa a u tee Yennu Bijae.”

⁸ Pailat nba din gbat nna, ki jaŋmaanii ji soorɔ bonchiann;

⁹ ki u ŋmat kɔɔ ŋaan yiin Yisa, ki tan boiɔ a “A nyii lee?” Ŋaan Yisa din ki jiinɔ siari.

¹⁰ Ki Pailat bia boiɔ a “A kan pak jiinimii? A ki mi nan n mɔk yikoo ki sa te ki bin ŋaa-a, ki bia mɔk yikoo ki sa te ki bin kpaa-a dapunpunn paak ki kpianii?”

¹¹ Ki Yisa ji jiinɔ a “Yennu-i bo-i kii chaba yikoo, a bo kii mɔk n yikoo. Li paak, daanɔ nba soorin ki jiin kubina na, u biit yab bonchiann ki gar a yara.”

¹² Pailat nba gbat nna maŋ, ki u lek ji loon ki wun ŋaau nan nunmɔnn, ŋaan ki Juu teeb yudamm na yakii kpayakit ki yaa a “Li-i tee ki a ŋaau, ŋann a ji ki tee kpanbara yudaanɔ Siisa yɔɔ kaa, kimaan daanɔ nba pur u mɔŋ kpanbar, u tee kpanbara yudaanɔ na dataake.”

¹³ Pailat nba gbat nna, ki u nyii nan Yisa nanyer po, ki kar u buut kaanu paak, ki bi yir Binbintir. (Juu teeb maan ni, bi yir Gabata na.)

¹⁴ Li din tee kut munnloob yoo sanyiɔk nie, ki li sa yent ki yukitgar tiaru jaamm-n di. Ki Pailat yet Juu teeb yudamm na a “I kpanbarii na!”

¹⁵ Ki bi yakii kpayakit ki yaa a “Kpimɔ! Kpimɔ! Kpaamɔ dapunpunn paak.” Ki Pailat boib “I loon ki n kpaa i kpanbar ki kpiu-uu?” Ki Yennu jiantu yudamm na jiin a “Ti ki mɔk kpanbarsɔɔ see kpanbara yudaanɔ Siisa kuukɔɔ.”

¹⁶ Ki Pailat ji chab a bin kpaa Yisa ki kpiu. Ŋanne ki Rom teeb lanjimanba na ji gaar Yisa,

Ba kpaa Yisa ki tabinɔ dapunpunn paak biaŋinba

¹⁷ ki nyii nanɔ doo na kpiŋ; ki u jii u kuun dapunpunn. Ki bi saa baar siaminba ki bi yir “Yukpabuk” na. (Juu teeb maan ni, bi yi ŋanne “Golgota” na.)

¹⁸ Leŋe ki bi kpaau dapunpunn paak; ki bia kpaa niib bannlee dapunpuna paak ki pukin Yisa po, ki yenɔ be u chianu ki lɔɔ mun be u chianu, ŋaan ki Yisa be sinsuuk ni.

¹⁹ Ki Pailat sɔb sɔbu ki bi tabin Yisa dapunpunn na yur paak, ki li yaa a “Nasaret nirɔ Yisa wunba tee Juu teeb kpanbarii na.”

²⁰ Ki Juu teeb bonchiann din karin sɔbu maŋa, kimaan siaminba ki bi din kpaa Yisa dapunpunn paak na, li din ki fɔk nan Jerusalemi. Sɔbu na, li din sɔb Juu teeb nan Rom teeb nan Griik teeb maan nie.

²¹ Ŋanne ki Juu teeb Yennu jiantu yudamm saan Pailat boor ni, ki saa betɔ a “Li bo ki ŋan ki a sɔb a ‘Juu teeb kpanbarii na.’ Li bo ŋan ki a sɔb a ‘Jɔɔ na pur u mɔŋ a u tee Juu teeb kpanbare.’ ”

²² Ki Pailat jiin a “Ma sat sɔb linba, n sɔbe.”

²³ Lanjimanba nba kpaa Yisa na poorpoe, ki bi jii u tiat ki chentir taar munna, ki lanjimanba na kur din gaar tor. Li poorpoe biak ki bi jii u tiŋ po liatfouk, linba ki bi luur bonmunn, ki li ki mɔk nyarmu na;

²⁴ ki bi yet bi leeb a “I daa pati. Ŋaant ki ti tɔ tiatia ki laan wunba sa yentir.” Li din teen nna, a Yennu gbouŋ nba din yet nna, lin fit lian gbee a “Bi chent n tiat, ki bia tɔ tiatia n tiŋ po liatfouk paak.” Nnee ki lanjimanba na set din tun.

Yisa nba chabit u naa ki kubintɔ sɔɔ biaŋinba

²⁵ Ki Yisa naa din see kpia u dapunpunn na; ŋɔɔ nan u niipoo, ki bi yiu Mari wunba tee Klopas ŋaapoo, nan Mari Magdaliin, ki bi lakin see leŋ.

²⁶ Ki Yisa la u naa, ki bia la u poorpoweitɔɔ nba ki u mantik loonɔ na, ki u mun see leŋ, ki Yisa yet u naa a “N naa, a bijai na jik,”

²⁷ ŋaan bet u poorpoweitɔɔ maŋ a “A mun, a naai na jik.” La din nyii li yoo na ki u poorpoweitɔɔ na ji din jii Yisa naa ki kun nanɔ u ŋaak ni.

Yisa kuun labaar

²⁸ Li poorpoe, Yisa din mi nan bonsiar kur nba ki u din tuun na, li ji gbenna, ŋaan yet a “Nyunyukiru mɔkin.” U yet nna a lin gbeen linba sɔb Yennu gbouŋ ni na.

²⁹ Ŋmaŋ din see nan damiituk leŋ, ki bi jii saapo ki tun damiituk maŋ ni, ki jii daauk ki fin saapo na, ki teen u mɔb ni,

³⁰ ki u fɔɔnt ki nak, ŋaan yet a “Li gbenna,” ŋaan tibin ki chab u seek ki tur Yennu, ki kpo.

Biaŋinba ki bi jii kpann ki ŋmuu Yisa lokir ni

³¹ Tɔn, Juu teeb yudamm na din ki loon niib na ki bii be dapunpuna paak foon daari; la sa yent ki li tee foon daar na. Foondasiar nba din sa yent maŋ din tee dajaanne. Li paak, ki bi din saan Pailat boor, a wun chab ki bin kɔnn kɔnn niib na taa, ki bin kpo yian, ki bin fit kpaatib dapunpuna maŋ paak.

³² Li paak, ki lanjimanba na saan ki saa kɔnn binba lakin kpaa nan Yisa na taa,

³³ ŋaan baar Yisa boor ni, ki sɔɔ ki u kpoa. Li paak bi din ki kɔnn u taa.

³⁴ Ki lanjimanba yenɔ jii kpann ki ŋmuu Yisa lokir ni. Li taakpaak ni ki sɔn nan nyun ji nyi.

³⁵ Min nba sɔbin gbouŋ nee la ba teen biaŋinba na nan n mɔŋ ninbina, ki teen siara nan li tee mɔniie, ki n mi nan n siara maŋ tee barmɔniie, ki n sɔbin linba tee barmɔnii na a i fit lian teen yada.

³⁶ Li din teen Yisa nna a lin gbeen linba sɔb Yennu gbouŋ ni a “Bi kan yeer u kpaba nan yennkɔɔwa.”

³⁷ Ki Yennu gbouŋ bia yet siar po a “Niib tan sii gorii ba ŋmuu wunba kpann na.”

Yisa gbanant piinu labaar

³⁸ Li poorpoe ki Josef, wunba tee Arimatea nirɔ na, saan Pailat boor ni, ki saa miarɔ Yisa gbanant. Josef din tee Yisa poorpoweitɔɔe, ŋaan u din waau woonin nie, kimaan u din tiin Juu teeb yudamme jaŋmaanii. Ki Pailat chabɔ; ki u saan ki saa kpaat Yisa ki jiiu.

³⁹ Ki Nikodemus mun baar, wunba din poŋ mi ki baar Yisa peŋ nyiɔk na; ki u dia tulaarii nba sa teen Yisa gbanant, ki li yab bonchiann. (Bi din jii bonsiar nba ki bi yir mir nan bonsiar nba ki bi yir alos ki ŋmat ki nan tulaarii maŋ.)

⁴⁰ Ki bi jii Yisa ki pɔbinɔ chinchenŋana ni nan tulaarii na, kaman nan Juu teeb kupiinu kaar nba tee biaŋinba na.

⁴¹ Ba din kpaa Yisa siaminba na, kpaab din be leŋ, ki kapaauŋ poŋ be leŋ, ki bi din daa ki pii sɔɔ kaauk maŋ ni.

⁴² Juu teeb foon daar nba per na, ki kaauk na bia ki fɔk na, ki bi pii Yisa leŋ.