Jɔɔnn 17 - Yennu Gbounpaauŋ Mɔɔr

Yisa nba miar Yennu biaŋinba

¹ Yisa nba din pak nna maŋ, ŋaan gokit got sanpaapo, ki yet a “N Baa, yoo maŋ baar na. Ŋaant ki min a Bija-n la dontir, ki fit lian te ki a mun-n la dontir,

² kimaan fine turin yikoo niib kur paak, a man fit lian tur niib kur nba ki a turin maŋ manfoor nba kaa gbennu.

³ Ki manfoor maŋe, ki niib sa nakin bann fin nba tee Yennu nan barmɔnii, ki sɔɔ ji kaa; ki bi bia mun sa bann min, Yisa Masia, wunba ki a tumɔ na.

⁴ Toona nba ki a turin a n tun na, n ji tun ki gbenna, ki dont a sann tingbouŋ na ni.

⁵ N Baa, turimin dontir a boor ni mɔtana, dontbooru nba ki n din laat, ma din be a boor ni ki a daa din ki nan dunia na.

⁶ “Niib nba ki a din gann ki turin na, n te ki bi bannawa. Bi din tee a yabe, ki a din jiib ki turin, ki bi mun sak a maama.

⁷ Ki mɔtana bi mi nan bonsiar kur nba ki a turin na, li nyii a boore,

⁸ kimaan n pakib maan nba ki a turin nawa, ki bi mun gaara, ki mɔtana bi ji bann nan n set nyii a peŋe nan mɔnii, ki bi teen yada nan fine tumin.

⁹ “Tɔn, mɔtana n ji meia bi paake na. N ki meia tingbouŋ na niib kur paak kaa, ŋaan mɔtana n meia binba ki a turin na paake, kimaan bi tee a yabe.

¹⁰ N yab kur tee a yabe; ki a yab kur mun tee n yab; ki bi bia dont n sanne.

¹¹ Ki mɔtana n ji baat a boor nie na; n ji kii be tingbouŋ na ni, ŋaan ŋamm ŋarin daa sa biar tingbouŋ na niwa. Tɔn, n Baa, Popeendaanɔ na, i diab fanu nan a sann ni, sann nba ki a din purin na, a bin fit lian taan yomm kaman nan min nan fin nba kpan tee yomm na.

¹² Ma daa be namm na, n diab fanu nan a sann nba ki a din purin na ni. N baak bi paak, ki bi ni sɔɔ ki teen yanni, see wunba tee Sintaanii yɔɔ na. Wa teen yann na, li tee kaman nan la sɔb Yennu gbouŋ ni biaŋinbae.

¹³ Ki mɔtana n baat a peŋe; ki ma daa be tingbouŋ na ni na, n piak linba na ki teemm, a bin fit lian la n parpeenn na booru ki saa yakir.

¹⁴ “N pak a maan na turiba. Li paak ki tingbouŋ na ŋaateeb namm, kimaan bi ki tee tingbouŋ na ni yabi, kaman nan ma mun ki tee tingbouŋ na ni ŋaayɔɔ na.

¹⁵ N ki meia ma a nyinnib tingbouŋ na ni kaa, ŋaan n meia ma i baak bi paake fanu, ki bonbiiuk daanɔ Sintaanii daa baat ki biiribi.

¹⁶ Ma ki tee tingbouŋ na ŋaayɔɔ na, li mun bia tee nnee, bi ki tee tingbouŋ na ŋaayabi.

¹⁷ “Wantib a maan nba set tee barmɔnii na, ki lin teemm popeendamm.

¹⁸ Fa din tumin tingbouŋ na ni biaŋinba na, nnee ki n mun bia tumm tingbouŋ ni na.

¹⁹ Ki bi paake ki n jikit n mɔŋ ki teena na, a bin fit lian teen a tiauŋ yab nan barmɔnii.

²⁰ “N ki meia ki teen ŋamm kuukɔɔ kaa; n bia meia ki teen binba tan sa teenin yada bi mɔɔntii paakewa.

²¹ N bia meia ma bi kura-n taan mɔyomme. N Baa, fa be n ni, ki n mun be a ni biaŋinba na, ŋaant ki bi mun-n taan nant mɔyomm ti ni nna; ŋannii sa te ki tingbouŋ na ŋaateeb-n teen yada nan fine tumin.

²² Popeenn binbeŋ nba ki a turin na, n mun turiba, ki bi sa fit lian taan mɔyomm, kaman nan min nan fin nba tee mɔyomm biaŋinba na.

²³ N be bi ni, ki a mun be n ni, a bin fit lian taan mɔyomm chib. Ŋannii sa te ki tingbouŋ na ŋaateeb-n bann nan fine tumin, ki bi sa bann nan a loonib kaman nan fa loon min biaŋinba na.

²⁴ “N Baa, a turib mine, ki n loon ki bii taŋŋi be ma tan sii be siaminba, ki bin fit lian la fa dont n sann biaŋinba na, kimaan a din loonime yoo nba ki a daa din ki nan dunia na.

²⁵ N Baa, Popeendaanɔ na, tingbouŋ na ŋaateeb ŋarin ki miani, ŋaan min ŋarin mia, ki n poorpoweiteeb na mi nan fine tumin nna.

²⁶ N fiit a binbeŋ ki wanniba, ki bia sii ŋammit ki fiitir a binbeŋ ki wantib, ki jenna, loomm nba ki a loonin na, ki bin fit lian gaar, ki n mun sii fit lian be bi ni.”