Jɔɔnn 16 - Yennu Gbounpaauŋ Mɔɔr

¹ “N poŋ mi paki muksuk na poewa a i tan daa nyikit n weiu.

² Bi tan sa yɔɔ nyinni Yenjiantu ni. Ki yoo baat ki wunba tan kpi-i, u sii dukii mi a u tuun nna ki teen Yennue.

³ Bi tan sa tun linba na ki turiiwa, kimaan bi ki mimi, ki bia ki mi n Baa.

⁴ Ŋaan n beeri linba na mɔtana, a li yoo-i taŋŋi baar, ki i ji sa lian tiar n maan nba ki n paki na. “N din ki beti linba na sinsinni, kimaan min nan yimme tuu be.

Yennu Seyeeŋ toona nba sii tee biaŋinba

⁵ Ŋaan mɔtana n saa Yennu wunba tumin na peŋe. Ŋaan i sɔɔ ki boin ki laan n saa lee.

⁶ Ŋaan ma beti linba mɔtana na, ki i ji mɔk parbiir bonchiann.

⁷ N beeri barmɔniie, nan li ŋan i po nan ki n yaat saan, kimaan mi-i kii saani, Sommtɔɔ na kan baar i peŋi. Ŋaan mi-i taŋŋi saan, n sa tumɔ i peŋ na.

⁸ “U-i taŋŋi baar yoonba, u sa wann tingbouŋ na ŋaateeb a bi mɔk biit. U bia sa wannib yentinu nba tee biaŋinba, ki bia sa wannib Yennu barbuut nba tan sii tee biaŋinba.

⁹ U sa wannib a bi mɔk biit, kimaan bi ki teenin yada.

¹⁰ Ki jenna, u sa wannib yentinu nba tee biaŋinba, kimaan n sa saan n Baa Yennu boor, ki bi ji kan lami.

¹¹ Ki bia jenna, u sa wannib Yennu barbuut nba tan sii tee biaŋinba, kimaan u poŋ bu tingbouŋ na teeb yudaanɔ Sintaanii buut ki biirɔwa.

¹² “Maan be bonchiann ki n bo sa paki, ŋaan i kan fit gaar mɔtana.

¹³ Yennu Seyeeŋ nba want barmɔnii na, u-i taŋŋi baar yoonba, u sa wanni barmɔnii kur wannua. U tan kii piak nan u mɔŋ mɔŋ maan kaa, ŋaan u tan sii wanti linba ki u gbia Yennu boore, ki bia sii beeri linba tan sa teen na.

¹⁴ Ki jenna, u bia tan sii dont n sann kimaan u tan sii jikit n labaare ki fiitir ki wanti.

¹⁵ Linba kur ki n Baa Yennu mɔk, li tee n yare. Li paake teen ki n yaa ma Yennu Seyeeŋ sii jikit n labaar ki wanti.

Parbiir nan parpeenn po

¹⁶ “Li-i yann waaminna i ji kan lami, ŋaan li-i biakii yann waaminna, i bia sa lama.”

¹⁷ Ki u poorpoweitesiab boi bi leeb a “Linba na paak tee bee? Ki u yaa a li-i yann waaminna, a ti kan lau, a ŋaan li-i biakii yann waaminna, a ti sa lauwa. Ki u bia yaa a kimaan u saa u Baa peŋe.

¹⁸ ‘Li-i yann waaminna’ paak tee bee? Ti ki mi wa piak linba na paaki.”

¹⁹ Ki Yisa bann nan bi yaa bin boiɔ buboite. Li paake te ki u boib a “Ma yaa a li-i yann waaminna i kan lami, ki bia yaa a li-i bia yann waaminna i sa lama na, i boi i leebe a i bann li paakii?

²⁰ Barmɔniie ki n beeri na, i tan sii fabin ki mɔ, ŋaan tingbouŋ na ŋaateeb ŋarin tan sii mɔk parpeenne. I sii mɔk parbiir, ŋaan li poorpo ki i parbiir maŋ tan sa tunn ki teen parpeenn.

²¹ “Li tee kaman nan poo nba tuu yaa wun mar, ki mɔk parbiir nee, kimaan u fara yoo baara, ŋaan u-i taŋŋi mar bik yoonba, u ji tuu tamm u fara na poe, ŋaan ji mɔk parpeenn nan wa mar bik tingbouŋ ni na paak.

²² Li tan sii tee i mun nnee; mɔtana ya mɔk parbiir na, ŋaan n bia tan sa laiwa, ki i para tan sa penn bonchiann, ki sɔɔ kaa ki tan sa nyinn parpeenn maŋ i ni.

²³ “Li yoo-i taŋŋi baar, i tan kan boin buboiti, kimaan i tan sii mi li paak. Barmɔniie ki n beeri na, linba kur ki i mei n Baa Yennu nan n sann ni, u sa turiiwa.

²⁴ Ŋaan nan mɔtana, i daa ki mi miarɔ bonsiar nan n sann ni. Yii meiɔ, ki i sa la, ki fit lian la parpeenn ki saa yakir.

Linba tan sa baar labaar

²⁵ “N poŋ tuu yiini barjokite, ŋaan yoo baat ki n ji tan kii yiini barjokiti, ŋaan n tan sii piak ki yentir i numm poe ki jikit saa n Baa Yennu po.

²⁶ Ŋaan li yoo-i taŋŋi baar, i tuu sii meiɔ nan n sann ni. Li bia tan kan kpaa talasi nan ki n gaar i paak ki miarɔ ki turiini,

²⁷ kimaan n Baa Yennu mɔŋ mɔŋ looni; ki wa looni maŋ paak tee nnee, kimaan ya loonin ki bia teen yada nan n nyii n Baa maŋ boore na.

²⁸ N din nyii n Baa maŋ peŋe ki sik tingbouŋ na ni, ki mɔtana n ji nyikit tingbouŋ maŋe na, ŋaan ŋmat u peŋ.”

²⁹ Ŋanne ki u poorpoweiteeb na yetɔ a “Mɔtana a ji kpan piak yentir ti numm poe na. A ji ki yiint barjokit kaa.

³⁰ Mɔtana ti ji bann nan a mi bonsiar kur, ki poŋ bia mi ti buboit ŋaan ki ti daa ki boiani. Li paake teen ki ti teen yada nan a nyii Yennu peŋe.”

³¹ Ki Yisa boib a “I ji teenin yada mɔtanawa-aa?

³² Yoo baat, ki li poŋ baar gbenna, ki i kur tan sa yat kun, ŋaan ki n tan sa biar n kuukɔɔ. Ŋaan li set ki tee n tan sii kpan be n kuukɔɔ kaa, kimaan min nan n Baa Yennue tan sii be.

³³ N beti fara na baaru po a i tan fit kii laat parmaasire, kimaan ya gaa n paak na. I tan sii di fara tingbouŋ na ni. Ŋaan yii mɔk parcheenn man, kimaan min ŋarin nyann tingbouŋ nawa.”