Jɔɔnn 14 - Yennu Gbounpaauŋ Mɔɔr

Yisa nba yaa a ŋɔɔe tee sɔnu biaŋinba

¹ Li yoo na ki Yisa betib a “I daa mɔk parbiiri. Teent Yennu yada, ki mun teenin yada.

² Diit bonchiann be n Baa Yennu ŋaak ni, ki n kun ma n sa teen i diit siir. Li-i bo-i kii tee barmɔnii, n bo kan betiini.

³ Ki mi-i kun ki sa teen i diit na siir ki gbenn, n bia sa jenna ki tan jii-i, ki i mun tan sii be siaminba ki n tan sii be na.

⁴ Ki bia jenna, i poŋ mi ma saa siaminba, ki bia mi sɔnu nba ki i sa saan leŋ.”

⁵ Ki Tomas boiɔ, “N Yomdaanɔ, ti ki mi fa saa siami. Nlee ki ti sa bann sɔnu nba ki ti sa saan leŋi?”

⁶ Ki Yisa betɔ, “Mine tee sɔnu na, ki bia tee mɔmɔmm, ki bia tee manfoor. Sɔɔ kaa ki sa baar n Baa Yennu boor ni, ki li ki tee ki u sint baarimi.

⁷ Li-i bo-i tee ki i min, i bia bo sii mi n Baa nawa; ŋaan mɔtana ki jikit saa, i ji miu ki bia laatɔ.”

⁸ Ki Filip yetɔ a “N Yomdaanɔ, wantit a Baa maŋ, ki ti numm-n gboo.”

⁹ Ki Yisa jiin a “Filip, n poŋ be nani ki li yukira, ŋaan ki a daa ki mimii? Wunba lan, u set la n Baa maŋe na. Ki bee ki a yaa a n wanni n Baa maŋi?

¹⁰ N be n Baa nie, ki n Baa mun be n ni; i ki teen linba na yada-aa? Maan nba ki n pak ki turi na, li ki nyii n ni kaa, ŋaan li nyii n Baa Yennu boore. Ŋɔɔe be n ni ki tuun u toona maŋ.

¹¹ Li paak, teentin yada nan n be n Baa Yennu ni, ki n Baa Yennu mun be n ni. Li-i kii tee nna biaki, yin teen bakitnauŋ toonjaana nba ki n tuu tuun na yada.

¹² “Barmɔniie ki n beeri na, daanɔ nba teenin yada, u sii tuun toonjaana kaman nan ma tuun biaŋinba na, ki u toonjaana maŋ gbaa sa gar n yara, kimaan n saa n Baa Yennu boore.

¹³ Ki linba kur ki i sii meiɔ li po nan n sann ni, n sa tuma, ki ŋɔɔ Yennu-n la dontir n paak.

¹⁴ Ki li-i tee ki i meiɔ linba kur po nan n sann ni, n sa tuma.

Yennu Seyeeŋ baaru labaar

¹⁵ “Li-i tee ki i loonin, i sii saak n mɔb,

¹⁶ ki n sa miar n Baa Yennu, ki u sa turi Sommtɔlɔɔ. Ŋɔɔe tee u Seyeeŋ nba want barmɔnii wannu, ki sii be nani yoo nba kaa gbennu.

¹⁷ Ki tingbouŋ na ŋaateeb kan fit gaarɔ, kimaan bi ki miu, ki bia ki mi nan u be. Ŋaan yimm ŋarin miu, kimaan u be nani, ki bia sii yɔɔ be i ni.

¹⁸ “Mi-i tei yaat saan, ŋaan n kan nyiki yann ki sɔɔ ki goriini, kimaan n sa jen i peŋ na.

¹⁹ Ki li-i yann waaminna, tingbouŋ na ŋaateeb ji kan lami, ŋaan yimm ŋarin bia sa lama. Tɔn, ma tan sa jen n manfoor ni na, i mun tan sa jen i manfoa niwa.

²⁰ Ki bia jenna, mi-i tei jen n manfoor ni yoonba, i tan sa bann nan n be n Baa Yennu nie, ki i mun bia be n ni, ki n mun be i ni.

²¹ “Daanɔ nba bant n sennii ki bia saakir, li daanɔe loonin. N Baa Yennu sii loon ŋɔɔe, ki n mun sii loonɔ, ki sa fiit n mɔŋ ki wannɔ ma tee wunba.”

²² Ki Judas, (wunba ki tee Judas Iskariot na) boiɔ a “N Yomdaanɔ, bee teen ki a sa fiit a mɔŋ ki wannit, ŋaan kan fiit a mɔŋ ki tur tingbouŋ na ŋaateebi?”

²³ Ki Yisa jiin betɔ a “Daanɔ nba loonin, u sii saak n maan, ki n Baa Yennu sii loonɔ, ki min nan n Baa Yennu sa baar u boor ki sii yɔɔ be u ni.

²⁴ Ki jenna, daanɔ nba ki loonimi, u ki saak n maami, ki ya gbat maan nba na, li ki tee n yar kaa, ŋaan li tee n Baa Yennu nba tumin na yare.

²⁵ “Ma daa be nani na, n beeri maan nba na.

²⁶ Ŋaan ki n Baa Yennu sa tun Sommtɔɔ i boor, n sann ni. Li Sommtɔɔe tee u Seyeeŋ na; ŋɔɔe sa wanni barii kur, ki bia sa tiari linba kur ki n poŋ beti.

²⁷ “Mi-i yaa n saan, n sa pi-i piinii nba tee n parmaasir na. Li ki tee tingbouŋ na parmaasir na booru kaa. I daa mɔk parbiiri. I bia daa tiin jaŋmaanii.

²⁸ I poŋ gbat ki n yeti a ‘N nyikitie, ŋaan n bia sa jen i boor ni na.’ Ki li-i tee ki i loonimie, i sii mɔk parpeenn nan ma saa n Baa Yennu boor ni na, kimaan u cheen.

²⁹ “N daa beeri linba tan sa teene, ki yoo nba ki li tan sa teenewa, ki yin teen yada.

³⁰ N kan pak nani ki yukiri, kimaan tingbouŋ na yudaanɔ Sintaanii baat, ŋaan u ki mɔk n yaaki.

³¹ N loon tingbouŋ na teeb-n bann nan n loon n Baa Yennu nan mɔnii; li paake teen ki n tuu tuun linba ki u tuu betin a n tun. “Ŋaant man ki tin fiir ki yaat.”