Jɔɔnn 11 - Yennu Gbounpaauŋ Mɔɔr

Lasarus kuun labaar

¹ Tɔn, jasɔɔ nna din be Betani, ki u sann yi Lasarus, ki u din tan yiar. Betani din tee Mari nan u yɔɔrɔ Maata dooe.

² Mari din tee daanɔ nba but tulaarii ti Yomdaanɔ Yisa taa paak, ŋaan jii u yut ki fiar fiar na. Ŋɔɔ Mari ninja Lasaruse yiar. Wa tan yiar na,

³ ki u niipoob Mari nan Maata tun toomii a wun saan ki saa bet Yisa a “Ti Yomdaanɔ, a naasinyɔɔk nba ki a mantik loonɔ na yiare.”

⁴ Yisa nba gbat nna yoonba ki u yet u poorpoweiteeb na a “Lasarus nba yiar na, yiaru maŋ ki tee u manfoor terik kaa na, ŋaan li tee linba ki niib sa dont Yennu sann li paake, ki bia sa dont min Yennu Bija sann mun biak.”

⁵ Tɔn, Yisa din loon Maata nan Mari nan Lasarus.

⁶ Wa gbat a Lasarus yiar na, ŋaan u din teen daa ŋannlee ki daa be leŋ.

⁷ Li poorpoe ki u din tan bet u poorpoweiteeb na a “Ŋaant man ki tin ŋmat saan Judea.”

⁸ Ki bi yetɔ a “Chanbaa, daa ŋannlelee na, ki Juu teeb yudamm na daan yaa bin jaata tana, ŋaan ki a bia yaa ti ŋmat leŋii?”

⁹ Ki Yisa betib a “Yentu tuu be yendo po mɔkmɔk nan yenbaa poe. Li-i tee ki nirɔ somm yennu ni, u kan gbiati, kimaan u laat tingbouŋ na yentu na.

¹⁰ Ŋaan u-i somm nyiɔk, u gbiatire, kimaan yentu kaa.”

¹¹ Yisa din yet nnee, ŋaan bia yet a “Ti yɔɔk Lasarus gɔɔnte, ŋaan n sa saan fiinɔwa.”

¹² Ki u poorpoweiteeb na yetɔ a “Ti Yomdaanɔ, li-i tee ki u gɔɔntie, u sa la laafiawa.”

¹³ Yisa din want ki li tee a Lasarus kpoe, ŋaan ŋamm din mi a u want a Lasarus gɔɔnte.

¹⁴ Li paak din te ki u betib gbenn a “Lasarus kpoa,

¹⁵ ŋaan i paak n mɔk parpeenn nan ma daan kaa u boor ni na, kimaan ŋannii sa te ki i fit lian teenin yada. Ŋaant tin saan u peŋ man.”

¹⁶ Ki Tomas, wunba ki bi yiu Jaak na, yet u leeb a “Ŋaant ki ti mun-n saan man. Li-i sii tee kuun, timm nan ŋɔɔ-n kpo.”

¹⁷ Yoo nba ki bi tan per Betani na, ki u gbat a ba pii Lasarus, li daa ŋannae na.

¹⁸ Betani din ki fɔk nan Jerusalemi; li fɔkint din tee kaman nan maar ŋannlee nee.

¹⁹ Li paak din teen ki Juu teeb bonchiann din baar Maata nan Mari peŋ, a bin maan bi para, kimaan bi ninja na kuun paak.

Wunba fiint kpeemm ki teemm manfoa na labaar

²⁰ Maata nba tan gbat a Yisa baat yoonba, ki u nyii chetɔ, ŋaan ki Mari ŋarin biar be ŋaak ni.

²¹ Ki Maata bet Yisa, “N Yomdaanɔ, li-i tee ki a daan bo be nna na, n ninja na daan bo kan kpo.

²² Ŋaan n mi nan mɔtana gbaa, li-i tee ki a miar Yennu linba kur po, u sa turawa.”

²³ Ki u betɔ, “A ninja sa fiir kuun niwa.”

²⁴ Ki Maata jiinɔ, “N mi nan u tan sa fiir kuun ni dunia gbennu daar, daar nba ki kpeemm tan sa fiir kuun ni na.”

²⁵ Ki Yisa betɔ, “Mine fiint kpeemm ki teemm manfoa. Daanɔ nba teenin yada, ŋɔɔe sii mɔk manfoor, u lekii kpo gbaa;

²⁶ ki daanɔ nba mɔk manfoor ŋaan teenin yada, u kan mi ki kpo. A teen yada nan linba na-aa?”

²⁷ Ki u jiin a “N Yomdaanɔ, nn, n teen yada nan fine tee Yennu Niganntɔɔ Masia, ki bia tee ŋɔɔ Yennu Bija wunba ki ti tuu daan u baaru na.”

²⁸ Maata nba yet nna maŋ, ŋaan ŋmat kun, ki saa yiin u waarɔ Mari soonna, ki betɔ a “Wanntɔɔ na be nnawa, ŋaan yiia.”

²⁹ Mari nba gbat nna yoonba, ki u fiir yian yian, ki saan u boor ni.

³⁰ Ki Yisa din daa ki baar digbanbik maŋi, ŋaan daa be siaminba ki Maata chetɔ nee.

³¹ Ki Juu teeb nba be nan Mari ŋaak ni ki maant u par na, ba la ki u nyii yian yian na, ki bi mun wei nyii, kimaan bi mi a u saa kaauk boore a wun saa bui kpemɔnii.

³² Mari nba baar Yisa boor ki lau yoonba, ki u gbaan u tɔɔnn, ŋaan yetɔ a “N Yomdaanɔ, li-i tee ki a daan bo be nna na, n ninja na daan bo kan kpo.”

³³ Ki Yisa la ki u mɔ, ki Juu teeb nba weiɔ ki baar na, ki bi mun mɔ, ki ninbaauk soorɔ bonchiann, ki u kurii u par ni.

³⁴ Ki u boib, “I piiu lapoe?” Ki bi betɔ, “Ti Yomdaanɔ, baat ki tan got.”

³⁵ Ki Yisa bui.

³⁶ Ki Juu teeb na yet a “Gotir man wa jia loon Lasarus biaŋinba.”

³⁷ Ki siab yaa a “Daanɔ nba nyɔɔnt jɔɔŋ na, u daan bo kan fit te ki Lasarus daa kpennii?”

Yisa nba fiin Lasarus kuun ni biaŋinba

³⁸ Ki Yisa yan bia ŋamm yêt, ki u saan kaauk na boor ni. Kaauk na din tee tanfiɔko, ki katanu bii li mɔb.

³⁹ Ki Yisa betib a “Biitir kaauk maŋ man.” Ki Maata wunba tee kpeemɔ na niipoo, yetɔ a “N Yomdaanɔ, li sii pɔi hei, kimaan ba piiu, li daa ŋannae na.”

⁴⁰ Ki Yisa boiɔ, “N bo ki beta a li-i tee ki a teenin yada, a sa la Yennu nba mɔk panchiauŋ biaŋinba-aa?”

⁴¹ Ŋanne ki bi biit kaauk na. Ki Yisa gokit sanpaapo, ŋaan yet a “N Baa Yennu, n teena niipoouk nan fa sak n miaru na.

⁴² N mi nan yoo kur a saak n miaru, ŋaan ma yet nna na, kimaan n loon ki nibur nba be nna na-n gbat ki teen yada nan fine tumin.”

⁴³ Wa yet nna maŋ, ŋaan yiin sanpaapowa a “Lasarus, nyimin na.”

⁴⁴ Ki kpeemɔ na nyii; ki u taa nan u nii ki li fin fin nan katiŋ, ki chinchenbik boob u numm po. Ki Yisa betib a “Fintir katiŋ maŋ ki ŋaau.”

Yudamm nba lor a bin kpi Yisa biaŋinba

⁴⁵ Ki Juu teeb bonchiann nba din baar a bin maan Mari par na, ki ba la linba ki Yisa tun, ki bi teenɔ yada.

⁴⁶ Ŋaan bi siab saan Farisiinba peŋ, ki saa betib linba ki Yisa tun.

⁴⁷ Li paak ki Farisiinba maŋ nan Yennu jiantu yudamm yiin tintaankaanu, ki bi tikir; ki bi boi bi leeb a “Ti sa teen nlee? Jɔɔ maŋ tuun toonjaana bonchiann.

⁴⁸ Ti-i ŋaan ki u ŋammit ki tuun nna ki pukii, sɔɔ kur sa teenɔ yadawa, ki Rom teeb-n baar ki yeer Yennu jiantu ŋasaakak na, ŋaan bia boont ti niib.”

⁴⁹ Ki bi yenɔ, wunba yi Kayafas, ki tee Yennu jiantu yudaanɔ li binn ni na, yetib a “Yimm ŋarin ki mi siari.

⁵⁰ I ki mi nan li ŋan ki niyenɔkɔɔ-n gaar niib na kura paak ki kpo, ki gar ki ti niib kur-n boontii?”

⁵¹ U din ki pak linba na nan u mɔŋ kaa, ŋaan wa din tee Yennu jiantu yudaanɔ binn maŋ ni na, ki Yennu te ki u pak bunt buntir, a Yisa tan sa gaar Juu teeb na paak ki kpo.

⁵² Ŋaan li ki tee Juu teeb kuukɔɔ kaa ki u tan sa gaar bi paak ki kpo, ŋaan nan binba kur tee Yennu niib ki yat be tingbouŋ na ni nae ki u sa gaar bi paak ki kpo, ki bin taan nan leeb mɔyomm.

⁵³ Ki li daar maŋ ki jii saa ki Juu teeb yudamm na lor soor a bin kpi Yisa.

⁵⁴ Li paak ki u ji din ki somm paanu ni Juu teeb tiŋ ni, ŋaan ki u tan yaat saan doo nba ki bi yi Efreem, ki li kpia nan tanbiinpaanu na; ki ŋɔɔ nan u poorpoweiteeb ji be leŋ.

⁵⁵ Tɔn, ki Juu teeb yukitgar tiaru jaamm tan per, ki niib bonchiann nyii digbana ki baar Jerusalem, a bin daa ŋamm bi mɔŋa, ki fit lian teen bi mɔŋ siir ki di jaamm na.

⁵⁶ Ki niib na din loon Yisa. Ba tikir Yennu jiantu ŋasaakak ni yoonba, ki bi boi bi leeb a “I dukii nlee? U mantik kan baar jaamm na amii?”

⁵⁷ Ki Yennu jiantu yudamm nan Farisiinba na tur mɔb a “Wunba mi u boor, wun baar ki tan ŋmaa ti taar ki tin soorɔ.”