Jɔɔnn 10 - Yennu Gbounpaauŋ Mɔɔr

Pekpaarik barjouk

¹ Ki Yisa bia yetib a “Barmɔniie ki n beeri na, nirɔ nba ki tɔkin pelook tammɔb ki kɔɔ, ŋaan doo joonn ki kɔɔ, li yɔɔe tee nanyukɔɔ.

² Ŋaan nirɔ nba tɔkin pelook na tammɔb ki kɔɔ, li yɔɔe tee pei maŋ kpaarik.

³ U-i taŋŋi baat a wun kɔɔ, tammɔguurɔ na sa loote, wun kɔɔ; ki u yi u mɔŋ mɔŋ pei na sana, ki bi gbia u mɔb, ki u nyintib.

⁴ U-i nyinn u mɔŋ pei kur yoonba, u tuu gar bi tɔɔnn nie, ki bi waa u poor, kimaan bi mi u kunkɔr.

⁵ Ŋaan bi kan wei saamɔ ŋarimi, kimaan bi ki mi u kunkɔri. See ki bi chiar.”

⁶ Yisa din yimm barjouk na, ŋaan ki bi ki bann li paaki.

⁷ Li paak, ki u bia ŋamm ki betib a “Barmɔniie ki n beeri na, mine tee pelook na tammɔb.

⁸ Ŋaan binba kur gar n tɔɔnn ki baar na tee nanyukibe nan fatiteeb, ŋaan pei na ki gbia bi mɔbu.

⁹ Mine tee tammɔb na, ki daanɔ nba wein ki kɔɔ, ŋɔɔe sa la tinnu, ki sii yɔɔ gaar kɔɔ, ki ŋmat nyi, ki laat jeŋant.

¹⁰ Nanyukɔɔ ŋarin baat a wun tan jan pei nae, ki bia kpib, ki bia biirib. Mine baar a niib-n la manfoor nba tee manfoor nan barmɔnii.

¹¹ “Mine tee pekpaaŋaŋ, ki pekpaaŋaŋe kpenn u pei paak.

¹² Ŋaan wunba kpaar pei likirii paak, ŋaan ki ki tee pekpaarik nan mɔnii, ki bia ki yen pei na, li-i tee ki u la ki kinkatir tan baat yoonba, see ki u chiar ŋaan nyik pei na; ki kinkatir-n ji baar ki soorib, ki pelei na-n yat.

¹³ U tuu chiare, kimaan u kpaar pei na likirii paake, ki u baka kaa pei na ni.

^14-15 Mine tee pekpaaŋaŋ. N Baa Yennu nba min, ki n mun miu na, li mun bia tee nnee ki n mi n pei, ki bi mun min, ki n sa lu n miar bi paak.

¹⁶ Pelei be ki tee n yab, ŋaan ŋamm ki tee pelook maŋ ni yabi. See ki n baar nan ŋamm mun biak, ki bi sa sak n mɔb, ki bi kur ji sii tee pebooryeŋ, ki mɔk pekpaaryeŋ kɔɔ.

¹⁷ “N Baa Yennu loonin, kimaan n yaa n nyinn n manfoor, ki li poorpo ki n bia sa ŋamm la n manfoor maŋ.

¹⁸ Sɔɔ kaa ki sa nyinn n manfoor maŋi, ŋaan n mɔŋ mɔŋe yaa n nyinnir, kimaan n mɔk yikoo ki sa nyinnir, ki bia mɔk yikoo ki tan sa lar. Nnee ki n Baa betin a n tun.”

¹⁹ Wa yet nna yoonba, ki Juu teeb yudamm bia ŋamm bɔkit;

²⁰ ki bi siab bonchiann yaa a “Narinbiiuk be u ni, a ki waatuk bia mɔkɔ; ki bee teen ki i gbiintir u maami?”

²¹ Ki leeb mun yaa a “Nirɔ nba ki narinbiiuk be u ni na kii piak nna. Nlee ki nirɔ nba ki narinbiiuk be u ni na sa fit nyɔɔnt jɔɔŋi?”

Juu teeb yudamm nba yêt Yisa biaŋinba

²² Li poorpoewa ki bi tan mɔk bi jaamm nba ki bi teen Yennu niipoouk bi jiantu ŋasaakak po na. Jaamm maŋ din be Jerusaleme. Li yoo din tee fufuk yooe;

²³ ki Yisa din somm lin barintir nba ki bi yir Solomon barintir na ni, ki li din be Yennu jiantu ŋasaakak ni.

²⁴ Ki Juu teeb yudamm din baar ki tikir ki lintɔ, ŋaan boiɔ a “A yaa lin yukir nleewa, ki tin tan bann nan a tee Yennu Niganntɔɔ Masia? Li-i tee ki a tee ŋɔɔie, fan betit barmɔnii.”

²⁵ Ki Yisa jiimm, “N poŋ daan betiiwa, ŋaan ki i ki teenin yada. Toona nba ki n tuun nan n Baa Yennu yaak na ni, ŋannii want ma tee wunba.

²⁶ Ŋaan ya ki tee n pei na paak, ŋannii te ki i ki teenin yada.

²⁷ N pei saak n mɔb, ki n mib, ki bi waan,

²⁸ ki n teemm manfoa nba kaa gbennu, ki bi kan mi ki kpo, ki sɔɔ bia kaa ki sa fit fatib n nuu ni.

²⁹ N Baa nba jiib ki teemm n nuu ni na, ŋɔɔe chee gar sɔɔ kur. Li paak teen ki sɔɔ kan fit fatib n Baa maŋ nuu ni.

³⁰ Min nan n Baa maŋ tee yomme.”

³¹ Li yoo na ki Juu teeb yudamm na tɔkii tana a bin jaatɔ ki kpiu.

³² Ki Yisa yetib a “I poŋ la ki n tun toonŋana bonchiann, linba ki n Baa Yennu yaa a n tun, ki toonŋana maŋ ni, lann paake te ki i ji yaa i jaatimi?”

³³ Ki bi jiin ki yetɔ a “Ti ki loon ki tin jaata tana toonŋansiar paak kaa, ŋaan fa jikit a mɔŋ ki yek nan Yennu na paak. A kpan tee nirɔe, ŋaan yi a mɔŋ Yennu, ki li tee bonbilankante.”

³⁴ Ki Yisa jiin yetib a “Li sɔb i mɔŋ mɔŋ sennu nba be Yennu gbouŋ ni na a ŋɔɔ Yennu yet a niib tee u waase,

³⁵ ki ti mun mi nan Yennu gbouŋ kan faar faak fabaa; ki ŋɔɔ Yennu yi niib u waas, kimaan ŋamme tee niib nba ki u din pak u maan ki turib na.

³⁶ Ŋaan min ŋarin, n Baa Yennue gannin ki tumin tingbouŋ na ni; ki ma yet yaa a n tee Yennu Bija na, nlee ki i yaa a li tee bonbilankanti?

³⁷ Li-i tee ki n ki tuun n Baa Yennu na toonaie, ŋann i daa tee-n yada.

³⁸ Ŋaan li-i tee ki n tuun ŋɔɔ Yennu toona maŋie, li-i lekii tee ki i ki teenin yada, ŋaan yin teen n toona maŋ yada. Ŋannii ki i sa bann nan barmɔnii nan n Baa Yennu be n ni, ki n mun bia be u ni.”

³⁹ Ŋanne ki Juu teeb na tan yaa bin soorɔ; ki u buut nyii,

⁴⁰ ki ŋmat poot Jɔɔdann mɔk-pootir, ki saa be siaminba ki Jɔɔnn din tuu wuur niib Yennu nyunwuru na.

⁴¹ Ki niib bonchiann din baar Yisa peŋ, ki din piak nan bi leeb a “Jɔɔnn ŋarin din ki tun toonjaansiari, ŋaan linba kur ki u din piak ki jikit saa Yisa po, li tee barmɔniie.”

⁴² Ki niib bonchiann din teen Yisa yada leŋ.